Luka 2:1-52
2 Muna lumbu yayina, Kaisa Auguseto wavaikisa nsiku vo nza yawonso yasonama.
2 (Eyayi i nsonama yantete yavangama vava kiayala Kwirenio kuna Suria.)
3 Wantu awonso bele kuyisonekesa, konso muntu kuna vata diandi.
4 Yosefe mpe, okatukidi kuna Ngalili, kuna vata dia Nazarete, otombokele kuna Yuda, kuna vata dia Davidi, dina ye nkumbu Beteleme, wau vo yandi i mwisi nzo ye kanda dia Davidi.
5 Wele kuyisonekesa yo Maria wa nkaz’andi, muna kolo kiaki e ntangw’andi ya wuta yafinama.
6 Ekolo bakala kwakuna, e ntangw’andi ya wuta yafwana.
7 Owutidi mwana andi ayakala, mwan’antete, unzingidi vana nlele, unlekese muna dikilwa kia twelezi, e kuma kadi, ke bakala ye suku ko muna nzo zina anzenza balwakilanga.
8 Muna zunga kiakina mpe mukedi avungudi muna nzanza, beyingilanga e kambi diau o fuku.
9 Kuna kinsalukisa, o mbasi a Yave wizidi telama vana bena, o nkembo a Yave ubatemene, bamwene kikilu o wonga.
10 O mbasi ubavovese vo: “Ke numoni wonga ko, tala, nsangu zambote inutwasidi, ezi zimwesa nkangu awonsono e kiese.
11 Kadi o unu kuna vata dia Davidi i nuwutukìlu mvuluzi, una vo i Kristu wa Mfumu.
12 Ekiaki i sinsu kwa yeno: “Numon’e kimwana-mwana kizingilu o nlele, kilekeso muna dikilwa kia twelezi.”
13 Vana vau, vana vena mbasi vezidi ndong’a vu kia zulu, basanisini Nzambi, yo vova vo:
14 “Nkembo kwa Nzambi muna kayè, ova nsi luvuvamu muna akwa dienga.”*
15 E mbasi vava zavutuka kuna zulu, avungudi bayantikidi vovaziana, oku vo: “Yambula twenda kuna Beteleme, twamona dina divangamene, dina tuzayisu kwa Yave.”
16 Bele-bele, basolwele Maria yo Yosefe, ye kimwana-mwana kilekeso muna dikilwa kia twelezi.
17 Vava bamwene dio, bazayisi e nsangu zina bavoveso mu kuma kia kimwana-mwana kiaki.
18 Awonso bawidi wo, basivikidi dina bavoveso kw’avungudi,
19 vo i Maria, olundidi mambu mama mawonso, wayindulanga mo muna ntim’andi.
20 Avungudi bavutukidi, bakembelenge yo sanisina Nzambi muna mawonso bawidi yo mona, wauna bavoveswa.
21 Vava kialung’e lumbu kia nana kia kunzengesa, oveno nkumbu a Yesu, ina yavewa kwa mbasi una Maria kayimiti ko.
22 Vava kiafwana e ntangwa ya luveleleso lwau mun’owu wa Nsiku a Mose, batombokele yandi kuna Yerusaleme, bansunzula kwa Yave,
23 nze una wasonama muna Nsiku a Yave vo: “Konso mwan’a yakala oziula vumu kia ngudi andi, oyikilwa vo wavauka kuna kwa Yave.”
24 Batambikidi o lukau luna lwasikidiswa muna Nsiku a Yave: “Mbwela zole, yovo nsweswe miole mia mayembe.”
25 Kuna Yerusaleme kwakala muntu nkumbu andi Simone, muntu ansongi, nkwa vumi wa Nzambi, wavingilanga lufiaulwisu lwa Isaele, o mwand’avelela wakala muna yandi.
26 Nzambi wansengomwena dio muna mwand’avelela vo ke mona lufwa ko, yavana kemona Kuswa* kia Yave.
27 O mwanda unète muna tempelo, o se yo ngudi batwese Yesu wa mwan’au, bamvangila dina diasikidiswa muna Nsiku,
28 obongele mwana, unsidi vana nkond’a moko mandi, osanisini Nzambi, oku vo:
29 “E Mfumu Nzambi, wau se sindika ntaudi aku muna luvuvamu, wauna wavova,
30 kadi o meso mame mamwene nzil’aku otwasila luvuluzu
31 luna wakubika vana ndose a nkangu miawonso,
32 ntemo ukatula e tombe kwa zula yo nkembo kwa nkangu aku Isaele.”
33 O se ye ngudi a kimwana-mwana basivikidi e mambu mavovelo mu kuma kiandi.
34 Simone ubasambwidi, ovovese Maria wa ngudi a mwana vo: “Tala, o mwana ndioyu yandi wasolwa mu bwisa yo telamesa diaka ayingi muna Isaele, okala mpe se sinsu kia luvezo
35 (elo, o nsosolo tompola utompola ntim’aku*), mu sengomona makani mena muna ntima miayingi.”
36 Vakedi ngunz’a nkento, nkumbu andi Ana, wa mwan’a Fanwele, mwisi kanda dia Asire. Se nunu kikilu, mvu nsambwadi kaka kazinga yo nkaz’andi tuka basompanena,
37 wafwilwa yakala, owau wina ye mvu 84 Kakondwanga muna tempelo ko, wasadilanga Nzambi fuku yo mwini muna fionkonona* yo dodokela.
38 Oyandi mpe ubafinamene muna ntangwa yayina, otondele Nzambi, omokenen’e diambu dia mwana ndioyu kw’awonso ana bevingilanga lukûlu lwa Yerusaleme.
39 Vava bamene vanga mawonso masikidiswa muna Nsiku a Yave, bavutukidi kuna Ngalili, kuna Nazarete, kuna vata diau.
40 O mwana okudidi, okumamene, o zayi wandi mpe uwokele, e dienga dia Nzambi dikedi yandi.
41 O se diandi yo ngudi andi bayendanga kuna Yerusaleme mvu miawonso, kuna nkinzi a Nduta.
42 Vava kakala ye kimbuta kia mvu 12, nze una bavanganga, batombokele kuna nkinzi.
43 Vava e lumbu ya nkinzi yafokoka, una bavutukanga, o nleke Yesu osidi kuna Yerusaleme, o se diandi yo ngudi andi ke bazeye wo ko.
44 Kadi edi babenze vo bena yandi muna buka, badiete lumbu kiamvimba lembi kumvava, i bosi bayantikidi kumvava vana ven’e yitu ye ana bazayanene yau.
45 Wau balembele kumona, bavutukidi kuna Yerusaleme, bele amvavi.
46 Muna lumbu kina kietatu, bansolwele muna tempelo, ovuende vana vena alongi, okubawanga yo kubayuvula yuvu.
47 Awonso banwidi, basivikidi umbakuzi wandi ye mvutu zandi.
48 Vava mase mandi bàmwene, basivikidi, o ngudi andi umvovese vo: “E mwana, ekuma utuvangìdi wau? Omono yo se diaku ngeye tukwend’avavinge kuna ntantu zawonso.”
49 Ubavovese vo: “Ekuma numpavìdi? Ke nuzeye wo ko vo omu nzo a Se diame i mfwete kal’e?”
50 Ke babakwidi wo ko, una kabavovese.
51 I bosi, okulumukini yau, wele kuna Nazarete, okwamanene kubatumamena.* O ngudi andi mpe olundidi e mvovo miami miawonso muna ntim’andi.
52 Yesu onungunukini muna zayi ye ntela, watondwanga kwa Nzambi ye kwa wantu.
Mvovo vana yand'a lukaya
^ Yovo “wantu ana kayangalele.”
^ Sina, “Kristu.”
^ Yovo “moyo aku.”
^ Yovo “mina nsoki.” Tala Nsas’a Mvovo.
^ Yovo “kubalemvokela.”
