Luka 20:1-47
20 Lumbu kimosi, una kalonganga nkangu muna tempelo yo samuna nsangu zambote, nganga zambuta y’asoneki ye akuluntu bezidi kwa yandi,
2 bamvovese vo: “Utusamunwina, mu nkia wisa ovangilanga mambu mama? Yovo nani uvene wisa kiaki?”
3 Ubavutwidi vo: “Omono mpe diambu ikunuyuvula, nunsamunwina:
4 E mvub’a Yoane ku zulu yatuka yovo kwa wantu?”
5 Bavuende mfulu, oku vo: “Avo tuvovele vo, ‘Ku zulu,’ okutuyuvula vo, ‘Ekuma nwalembi kunkwikidila?’
6 Kansi, avo tuvovele vo, ‘Kwa wantu,’ ozevo o nkangu awonso bekutuvondela muna matadi, kadi bena ye ziku vo Yoane i ngunza.”
7 Bavutwidi vo ke bazeye ko kuna yatuka.
8 O Yesu ubavovese vo: “Omono mpe kikunuvovesa ko kana mu nkia wisa ivangilanga mambu mama.”
9 I bosi, otelele nkangu kingana eki: “Muntu mosi okunini mpatu a vinyu yo sompeka yo kw’avati, wele kuna nsi ankaka, okedi ko kolo kiayingi.
10 Vava kialuaka e nsungi, otumini ntaudi kuna kw’avati, bamvan’e kunku kiandi kia mbongo a mpatu a vinyu. Kansi avati, banwende, bansindikidi moko-moko.
11 Otumini diaka ntaudi ankaka. Oyandi mpe banwende, bamvezele, bansindikidi moko-moko.
12 Otumini diaka ona wetatu; oyandi mpe banlwekele, banyinganese.
13 O mfumu a mpatu a vinyu ovovele vo, ‘Aweyi mpanga? Yambula yatuma mwan’ame, ona wanzolwa. Nanga zitisa bekunzitisa.’
14 Avati wau bàmwene, bavovazianene vo, ‘I yandi ndioyu osala ye fwa dia mpatu a vinyu. Yambula twamvonda, e fwa diakala se dieto.’
15 Dianu vo, bamvaikisi kuna mbazi a mpatu a vinyu, bamvondele. Ozevo, o mfumu a mpatu a vinyu aweyi kekubavanga?
16 Kwiza kekwiza kavonda avati awaya, yo vana mpatu a vinyu kwa wantu ankaka.”
Vava bawidi wo, bavovele vo: “Ke dilendi vangama ko!”
17 Ubatadidi, ovovele vo: “Ayeyi i nsas’a sono eki: ‘E tadi dina diabembolwa kw’atungi i diau diakituka se mbuta tadi dia konko’?*
18 Konso ona obwa vana tadi diadi, kosomoka kekosomoka. Konso ona dibwila, tufakesa dikuntufakesa.”
19 Asoneki ye nganga zambuta bavavidi kunsia o moko muna ntangwa yayina, kansi bamwene nkangu o wonga, kadi babakwidi wo vo mu kuma kiau katelele kingana kiaki.
20 Una bankondelele, batumini alangi ana bafuta nzimbu kuna sweki bayivunina vo wantu ansongi, kimana bambakila muna mpov’andi yo kunyekola kwa luyalu ye muna wisa kia nguvulu.
21 Banyuvuidi vo: “E Nlongi, tuzeye wo vo otoma vovanga yo longa, kutalanga ndose ko, muna ludi olongelanga nzil’a Nzambi:
22 Nga diansongi kwa yeto dia futa e mpaku kwa Kaisa yovo ve?”
23 Kansi wau kazeye umpuki wau, ubavovese vo:
24 “Nunsonga denali. E fwaniswa ye sono ya nani ina mo?” Bavutwidi vo: “Ya Kaisa.”
25 Ubavovese vo: “Nuvana kwa Kaisa ina ya Kaisa, kwa Nzambi ina ya Nzambi.”
26 Ke balendele kumbakila muna mpov’andi ko vana vena nkangu. Kansi wau basivikidi e mvutu zandi, babutamene kwau.
27 I bosi, vezidi Asaduki ankaka, ana bevovanga vo ke vena lufuluku ko, banyuvuidi vo:
28 “E Nlongi, o Mose watusonekena vo, ‘Avo muntu ofwidilu o mpangi, kasisa nkento, kansi yandi kawuti wana, o nleke andi obonga nkento ndioyo, kawutila mpangi andi e mbongo.’
29 Vakala ye mpangi nsambwadi. Ona wantete kasompa nkento yo fwa, yandi kasisi wana.
30 Ona wanzole,
31 ona wantatu mpe umbongele. Diau dimosi yau nsambwadi; bafwidi yau ke basisi wana.
32 I bosi, o nkento mpe ofwidi.
33 Muna lufuluku, nkento a nani kekala? Kadi yau nsambwadi bambonga se nkaz’au.”
34 Yesu ubavovese vo: “O wan’a tandu* kiaki sompa besompanga yo sompeswa,
35 kansi, ana befwaniswa mu vua moyo muna tandu kiakina yo fuluka muna mafwa, ke besompa ko, ngatu sompeswa.
36 Ke balendi fwa diaka ko, bekala nze ambasi ye wan’a Nzambi, kadi i wan’a lufuluku.
37 Muna diambu dia mafwa mana mefuluka, o Mose nkutu wazayisa dio muna lusansu lwa nti walemanga, vava kayikila Yave vo, ‘Nzambi a Abarayama, Nzambi a Isaki ye Nzambi a Yakobo.’
38 Ke Nzambi a mafwa ko, kansi Nzambi y’awana ben’o moyo, kadi kuna kwa yandi* awonso ben’o moyo.”
39 Akaka asoneki bavutwidi vo: “E Nlongi, otomene vova.”
40 Ke bakedi ye unkabu wa kunyuvula diaka diambu ko.
41 I bosi, ubayuvuidi vo: “Ekuma bevovelanga vo Kristu i mwan’a Davidi?
42 Kadi o Davidi yandi kibeni wavova muna nkand’a Nkunga vo, ‘Yave ovovese Mfumu ame vo: “Vuanda oku koko kwame kwalunene
43 yavana nsia mbeni zaku se nsikinw’a tambi yaku.”’
44 Wau vo Davidi kakunyikila vo Mfumu; aweyi kenena se mwan’andi?”
45 Una nkangu awonso benwanga, ovovese alongoki andi vo:
46 “Nuyikenga ye asoneki, ana bazola kangadila muna mvuela yo kayiswa muna mazandu yo vuanda vana kunda yantete* muna masambilu ye vana fulu y’akwa tunda muna malambu,
47 ana beyiyanga e nzo* za akento bafwilwa akala yo samba e sambu yandá muna kuyisonga kwa wantu. Awaya tumbu kisundidi bevewa.”
Mvovo vana yand'a lukaya
^ Sina, “ntu a konko.”
^ Tala Nsas’a Mvovo.
^ Yovo “muna ngindu zandi.”
^ Yovo “yambote.”
^ Yovo “lekwa.”
