Luka 22:1-71
-
Anganga bavuende mfulu mu vonda Yesu (1-6)
-
Nkubika za Nduta yansuka (7-13)
-
Nlekelo a Mfumu usikidisu (14-20)
-
‘Ndiona okungiekola, una yame ova meza’ (21-23)
-
Ntantani zangolo kana nani osundidi onene (24-27)
-
Kangu dia Yesu dia Kintinu (28-30)
-
Osakwidi vo Petelo okumvakula nkalu (31-34)
-
Mfunu wakubama; nsosolo miole (35-38)
-
Sambu kia Yesu vana Mongo a Olive (39-46)
-
Yesu obakamene (47-53)
-
Petelo ovakwidi Yesu nkalu (54-62)
-
Basakanene Yesu (63-65)
-
Ofundisu kuna Mbazi a Nkanu (66-71)
22 Nkinzi a Mbolo Zakondwa Mfuna, una uyikilwanga vo Nduta, ufinamene.
2 E nganga zambuta y’asoneki, bavavidi una bafwete kumvondela, e kuma kadi bamwene nkangu o wonga.
3 O Satana okotele muna Yuda, mwisi Kereote, mosi vana vena yau Kumi ye Zole,
4 okatukidi, wele mokena ye nganga zambuta ye mbuta za makesa ma tempelo, e ngiekola kekunyekola kwa yau.
5 Bayangalele dio, bawizanene vo bamvana nzimbu za palata.
6 Otambulwidi, ovavidi ntangw’ambote muna kunyekola kwa yau, vana ke vekala ndonga ko.
7 E lumbu kiantete kia Mbolo Zakondwa Mfuna kilueke, kina kifwete kelwa kimenga kia Nduta;
8 dianu vo, Yesu otumini Petelo yo Yoane, oku vo: “Nwenda kubik’e Nduta, twadia kweto.”
9 Bamvovese vo: “Akweyi ozolele twakubikila yo?”
10 Ubavovese vo: “Vava nukota muna mbanza, nuwanana yo muntu onete mvungu a maza. Nunlanda yamuna nzo ina kekota.
11 Nusamunwina mfumu a nzo vo, ‘O Nlongi uvovese vo: “Akweyi dina e seka dia nzenza muna mfwete dila e Nduta ye alongoki ame?”’
12 Okunusonga seka diampwena dia ntandu diakubikwa. Mûna nukubikil’e Nduta.”
13 Bele, bawene mawonso wauna kabavovesele, bakubikidi e Nduta.
14 E ntangwa vava yafwana, ovuende kuna meza, kumosi ye ntumwa zandi.
15 Ubavovese vo: “Tima diayingi ngina diau mu dia e Nduta yayi vamosi yo yeno ekolo kiamwene mpasi ko;
16 kadi inusamunwini vo, kidia yo kwame diaka ko yavana ilungana muna Kintinu kia Nzambi.”
17 Otambwidi e kopo, una katondele, ovovele vo: “Nubonga, nunua dio, konso muntu kaviokesa kwa nkw’andi,
18 kadi inusamunwini vo, tuk’omu unu, kinua diaka má kia bundu kia vinyu ko yavana kikwiz’e Kintinu kia Nzambi.”
19 Obongele mpe mbolo, otondele, obukunwini, ubavene yo, ovovele vo: “Eyayi nitu ame isunzulanga, ina ivaninwa mu kuma kieno. I wau wuwu nuvanganga muna luyindulu lwame.”
20 Diau adimosi mpe kavangidi ye kopo, vava bamene dia nlekelo, ovovele vo: “E kopo diadi kangu diampa disunzulanga muna diambu dia menga mame, mana mebungukila mu kuma kieno.
21 “Tala! o koko kwa ndiona okungiekola, kuna yame ova meza.
22 Kadi o Mwan’a muntu okwenda kwandi wauna kasikidisilwa; kansi, tâtu kwa ndiona okunyekola!”
23 Bayantikidi oyuvuziana kana nani kieleka lenda wo vanga.
24 Vabwidi mpe ntantani zangolo vana bena, kana nani muna yau osundidi onene.
25 Kansi Yesu ubavovese vo: “Ntinu mia zula bediatidilanga nkangu, ana mpe bena ye wisa muna yau beyikilwanga vo, Mimpanga-mawete.
26 Vo i yeno, ke nukadi wau ko. Kansi ndiona wanene vovo nwina, mbula kakituka se nleke, ndiona mpe wina vo ntu, kakala nze ndiona osadilanga akaka.
27 Nani i nene? Ndiona odianga vana meza yovo ndiona osadilanga akaka? Ke ndiona odianga ova meza ko e? Kansi omono ngina va kati kweno nze ndiona osadilanga akaka.
28 “I yeno nuzizididi yame muna ntonta zame;
29 omono nkangidi yeno e kangu, wauna Se diame kakangila yame e kangu dia kintinu,
30 kimana nuadia, nwanua kuna meza mame muna Kintinu kiame, nwavuanda vana kunda mu fundisa makanda 12 ma Isaele.
31 “E Simone, e Simone, Satana olombele kanuveva nga masa.
32 Kansi omono ndodokele mu kuma kiaku, o lukwikilu luaku lwalembi yoya; ongeye avo ovilukidi o ntima,* kumika mpangi zaku.”
33 Umvovese vo: “E Mfumu, nkubamene ngienda yaku muna pelezo yamuna lufwa.”
34 Kansi, ovovele vo: “E Petelo, isamunwini vo, o unu e nsusu ke ikuyikokolwela ko yavana okumpanina nkalu nkumbu tatu vo, kunzeye ko.”
35 Ubavovese mpe vo: “Vava yateka kunutuma, ke nwanata nkutu a nzimbu ko yovo kifunda, ngatu nsampatu, nga ma nwakondw’e?” Bavutwidi vo: “Nkatu kwandi!”
36 Ubavovese vo: “Kansi owau, ona una ye nkutu a nzimbu, mbula kanata yo, diau adimosi mpe ye kifunda, ona kena ye nsosolo ko, yambula kateka yunga kiandi, kasumba wo.
37 Kadi inusamunwini vo, edi diasonama difwete lunganena omu mono, i sia vo, ‘Wabadikilwa kumosi ye yimpumbulu.’ Kadi ediadi mu lungana dina omu mono.”
38 Bavovele vo: “E Mfumu, tala, nsosolo miole.” Ubavovese vo: “Nusila wowo.”
39 Ovaikidi, wele kuna Mongo a Olive kadi i fu kiandi, alongoki mpe banlende.
40 Vava kalueke vana fulu, ubavovese vo: “Nusambanga kimana nwalembi bwa muna lutonto.”
41 Ubavavukìdi tini kiafwana tubwa e tadi, ofukamene, oyantikidi samba,
42 oku vo: “E Tata, avo ozolele wo, unkatwila e kopo diadi. Kansi luzolo lwame ke lwau ko, olwaku kaka lwavangama.”
43 I bosi, mbasi otukidi kuna zulu osengomokene kwa yandi, unkumikini.
44 Wau kamwene kikilu ntantu, osiamanene o samba; e kiufuta kiandi kikitukidi nga matonsi ma menga masonselenge ova ntoto.
45 Vava kamene samba, wizidi kw’alongoki, ubawene kuna tulu, bayoyele mu kuma kia ntantu.
46 Ubavovese vo: “Ekuma nulekele? Nutelama, nukwamanana samba kimana nwalembi bwa muna lutonto.”
47 Una kavovelenge, e ndonga yo Yuda, mosi vana vena yau Kumi ye Zole, ubavitidi kuna ntwala, ofinamene Yesu, kamfiba.
48 Kansi, Yesu umvovese vo: “E Yuda, nga muna mfibu oyekolwele Mwan’a muntu e?”
49 Ana bakedi yandi wau bamwene oma se mevangama, bavovele vo: “E Mfumu, twabasâkila muna nsosolo e?”
50 Omosi vana bena ozengele kutu kwalunene kwa ntaudi a ngang’ambuta.
51 Kansi, Yesu ovutwidi vo: “Sila wowo.” Oviakane kutu kwandi, unsaswidi.
52 I bosi, Yesu ovovele kwa nganga zambuta ye mbuta za makesa ma tempelo, ye akuluntu, ana bezidi kwa yandi vo: “Nuvaikidi ye nsosolo ye bota nze yeno nwizidi kwa mwivi e?
53 Vava yakedinge yeno lumbu yawonso muna tempelo yeno ke nunsie moko. Kansi e yayi i ntangw’eno ye wisa ki’awana bena mu tombe.”
54 Bambakidi, banète, bankotese muna nzo a ngang’ambuta; vo i Petelo, walandanga kuna vala.
55 Vava balungidi tiya vana yanzala, bafongele vamosi, Petelo mpe ofongele vana bena.
56 O ntaudi ankento umwene wau kafongele vana ntemo a tiya, untadidi e tuku-tuku, oku vo: “Ondioyu mpe kakala yandi.”
57 Kansi ovakwidi wo nkalu, oku vo: “Kinzeye kwame ko.”
58 Ke vavioka kolo ko, muntu ankaka umwene, ovovele vo: “Ongeye mpe u mosi muna yau.” Kansi Petelo ovovele vo: “Ke mono ko.”
59 Vioka tezo kia ola mosi, wankaka diaka ovovele ye ziku kiawonso vo: “Kieleka, ondioyu mpe kakala yandi, kadi Mungalili!”
60 Kansi Petelo ovovele vo: “Kizeye wo ko owu ovovele.” Ekolo kevovanga, e nsusu ikokwele.
61 O Mfumu ovilukidi, otadidi Petelo. Petelo osungamene mvovo mia Mfumu, vava kamvovesa vo: “O unu, vitila e nsusu yakokola okumpanina nkalu nkumbu tatu.”
62 Ovaikidi kuna mbazi, obokomokene ye dilu.
63 O wantu ana balangididi Yesu, bansakanene, banwende;
64 bamfukidi o luse, banyuvuidi vo: “Sakula! Nani uwende?”
65 Bamvovese mambu mayingi kuna lutiangu.
66 O kuma una kwakia, e buka ki’akuluntu a nkangu ye nganga zambuta ye asoneki bakutakene, banète muna seka dia Mbazi a Nkanu,* oku vo:
67 “Avo nge i Kristu, utusamunwina wo.” Kansi, ubavovese vo: “Kana inusamunwini wo, ke nukwikila wo ko.
68 Kana inuyuvuidi, ke nuvana mvutu ko.
69 Kansi tuk’owau, o Mwan’a muntu ovuanda kuna koko kwalunene kwa nkuma kwa Nzambi.”
70 Muna diadi, awonso bavovele vo: “Ngeye i Mwan’a Nzambi e?” Ubavovese vo: “Yeno kibeni nuvovele dio vo i Mwan’a Nzambi.”
71 Bavovele vo: “Nkia kimbangi diaka tuvuidi o mfunu? Kadi yeto kibeni tuyiwididi muna nu’andi.”
