Luka 24:1-53
24 Kansi, muna lumbu kiantete kia lumingu, muna mene-mene bezidi oku ziami, batwese má yansunga yina bakubikidi.
2 Kansi bawen’e tadi dianengomoka kuna ziami,
3 vava bakotele, ke bawene dio ko e vimbu dia Mfumu Yesu.
4 Ekolo betokananga mu kuma kia diambu diadi, tala, wantu wole ye mvuatu miau mikezimanga batelamene vana bena.
5 Akento bamwene wonga, babukikidi ndose zau, babavovese vo: “Ekuma nuvavilanga muntu amoyo vana vena mafwa?
6 Kena mo ko, ofulukidi kwandi. Nusungamena una kanuvovesa vava kakala kuna Ngalili,
7 oku vo, o Mwan’a muntu kafwete yekolwa kw’asumuki, kavondelwa vana nti yo fuluka muna lumbu kina kietatu.”
8 I bosi, basungamene mvovo miandi,
9 bakatukidi kuna ziami, bele samuna mambu mama mawonso kuna kwa yau Kumi ye Mosi ye kw’awonso.
10 Akento awaya i Maria Mandala yo Yoana yo Maria wa ngudi a Yakobo. Akaka muna akento bakedi yau basamunwini mpe mambu mama kwa antumwa.
11 Kansi, wau vo mambu mama kuna kwa yau makedi nze ma uzowa, ke bakwikidi akento ko.
12 Kansi Petelo otelamene, wele ntinu kuna ziami, oyenzamene, okengelele, omwene kaka nlele mia lino. Ovutukidi, osivikidi dina divangamene.
13 Muna lumbu kiakina mpe, nwole vana bena, bayendanga kuna vata diyikilwanga vo Emau, tezo kia kilometa kumi ye mosi* tuka kuna Yerusaleme,
14 bamokenenge mambu mawonso mana mabwidi.
15 Wau bamokenenge yo yuvuziana mambu mama, o Yesu yandi kibeni ofinamene, oyantikidi kwenda yau,
16 kansi meso mau makakwa kimana balembi kunsungamena.
17 Ubavovese vo: “Nkia mambu mama numokenanga wau nukwendanga?” Baningamene, bayindalele.
18 Omosi, nkumbu andi Keleopa, umvutwidi vo: “Nga u nzenza ye ngeye mosi kaka okalanga muna Yerusaleme olembele zayila oma mabwidi e lumbu yayi e?”
19 Ubayuvuidi vo: “Nkia mambu?” Bamvovese vo: “Oma ma Yesu wa Nazarete, ona wasonga e ziku vo ngunza, wakumama muna mavangu ye mvovo oku kwa Nzambi yo nkangu awonso;
20 ye ngiekola banyekola nganga zambuta y’akuluntu eto kimana kazengelwa nzengo a lufwa yo kunkoma vana nti.
21 Kansi oyeto tuna ye vuvu vo yandi kikilu okûla Isaele. Vana ntandu a mama mawonso, o unu i lumbu kiatatu, tuka kiabwila mambu mama.
22 Akento akaka vava twina batusivikisi kikilu, kadi bakedi o mene-mene kuna ziami,
23 wau ke bawene vimbu diandi ko, bezidi vova mpe vo mona-meso kia ambasi bamwene, ana bavovele vo una kwandi o moyo.
24 Ankaka mpe bena yeto, bakwenda kuna ziami, bawene kio wauna uvovele akento, kansi yandi ke bamoni.”
25 Ubavovese vo: “Yeno amazowa, akwa ntima miafuki muna kwikila mawonso mavovua kw’angunza!
26 Nga Kristu kafwete mona mpasi zazi ko, kakota muna nkembo andi e?”
27 Oyantikidi kubasasila o mambu ma yandi kibeni muna Sono yawonso, tuka muna Mose ye Ngunza zawonso.
28 Vava bafinamene e vata dina bekwendanga, ovangidi nze yandi ozolele vioka kuna ntwala.
29 Kansi, bandodokele, oku vo: “Kala yeto, kadi se masika, o kuma se kufwa.” Okotele, okedi yau.
30 Una kadianga yau vana meza, obongele mbolo, osambwidi, obukunwini zo, oyantikidi kubakayila.
31 Vana vau o meso mau matemokene, bantonene; kansi ovididi vana bena.
32 Bavovazianene vo: “Nga ntima mieto ke mizinininge ko wau kamokenenge yeto muna nzila yo toma kutusasila e Sono e?”
33 Batelamene muna ntangwa yayina, bavutukidi kuna Yerusaleme, bele wana yau Kumi ye Mosi y’awana balungalakene yau,
34 bavovele vo: “O Mfumu ofulukidi kikilu, omonekene kwa Simone!”
35 I bosi, basamwini mambu mavangamene muna nzila ye una kayisongele kwa yau vava kabukunwini e mbolo.
36 Una bavovelenge mambu mama, yandi kibeni otelamene vana kati kwau, ubavovese vo: “Luvuvamu kwa yeno.”
37 Kansi bamwene wonga yo zakama, babenze vo mwanda bamwene.
38 Ubavovese vo: “Ekuma nutelamenw’e mioyo? Ekuma nukatikisilanga muna ntima mieno?
39 Nutala moko mame ye tambi yame, i mono kwame yuyu; nunsimba, nwatala, kadi mwanda ke una ye nitu ye visi ko, nze yayi numbwene yau.”
40 Una kavovele wau, ubasongele o moko ye tambi yandi.
41 Kansi wau balembele kwikila mu kuma kia kiese yo sivika, ubavovese vo: “Nga má kia dia nwina kiau vav’e?”
42 Bamvene tini kia mbizi a maza ayangwa,
43 otambwidi, odididi kio vana bena.
44 I bosi, ubavovese vo: “I mau mam’o mambu mame yanuvovesa vava yakala yeno vo, mambu mawonso masonama mu kuma kiame muna Nsiku a Mose yo muna Ngunza yo muna Nkunga, mafwete lungana.”
45 I bosi wabaziula e ntima kimana babakul’e Sono,
46 ubavovese vo, “I wau wasonama vo: O Kristu omona e mpasi yo fuluka muna mafwa muna lumbu kietatu,
47 o luviluku lwa ntima yo luloloko lwa masumu lusamunwinwa muna nkumbu andi muna zula yawonso—tuka kuna Yerusaleme.
48 Oyeno nu mbangi za mambu mama.
49 Wá, ikunutwikila dina o Se diame kasil’o nsilu. Kansi oyeno nukal’omu mbanza yavana nuvuikw’o nkuma utuka muna kayengele.”
50 I bosi, wele yau yakuna Betania, ozangwidi o moko mandi, ubasambwidi.
51 Una kabasambwidinge, ubakatukidi, onatukini kuna zulu.
52 Bankundidi, bavutukidi kuna Yerusaleme ye kiese kiayingi.
53 Bakwamanene kwenda kuna tempelo, bakembelelenge Nzambi.
Mvovo vana yand'a lukaya
^ Sina, “stadia 60.” 185 lwa meta lukalanga muna stadia mosi.
