Luka 4:1-44
4 I bosi, Yesu wazala yo mwand’avelela, wakatuka kuna Yodani, wanatwa kuna makanga kwa mwanda
2 mu lumbu 40, kuna katontelwa kwa Nkadi ampemba. Yandi kadie má muna lumbu yayina, vava yafokoka, omwene nzala.
3 Muna kuma kiaki, Nkadi ampemba umvovese vo: “Avo ngeye u mwan’a Nzambi, vovesa e tadi diadi diakituka se mbolo.”
4 Kansi, Yesu umvutwidi vo: “Diasonama vo, ‘Ke mu mbolo kaka ko i kezingil’o muntu.’”
5 Untombwele yo kunsonga yintinu yawonso ya nza mu fikolo.
6 I bosi, Nkadi ampemba umvovese vo: “Ikuvana e wisa kiaki kiawonso, yo nkembo au, kadi kwa mono kiavewa, mvana kio kwa konso ona nzolele.
7 Avo unkundidi, ozevo e wisa kiaki kiawonso kikala se kiaku.”
8 O Yesu umvutwidi vo: “Diasonama vo, ‘Yave wa Nzambi aku kaka ofwete sambila, yandi kaka ofwete sadila salu kiavauka.’”
9 I bosi, unète kuna Yerusaleme, untelamese vana lusangidiku* lwa tempelo, umvovese vo: “Avo ngeye u mwan’a Nzambi, uyituba ova nsi,
10 kadi diasonama vo, ‘Okanikina mbasi zandi muna diambu diaku, batanina,’
11 ‘Bekutambula muna moko mau, walembi wandama o kulu vana tadi.’”
12 O Yesu umvutwidi vo: “Diavovua vo, ‘Kufwete tonta Yave wa Nzambi aku ko.’”
13 O Nkadi ampemba vava kamene kuntonta, okatukidi vana kena yavana kevua diaka ntangwa yambote.
14 O Yesu muna ngolo za mwanda ovutukìdi kuna Ngalili. E nsangu zandi zimwanganene muna zunga kiawonso.
15 Oyantikidi longela muna masambilu mau, wantu awonso bankembele.
16 Olueke kuna Nazarete, kuna kakudila, wau vo i fu kiandi, muna lumbu kia Vundu okotele muna sambilu, otelamene katanga.
17 O nkand’a Yesaya wa ngunza uveno kwa yandi, oyalumwini wo, osolwele fulu kiasonama vo:
18 “O mwand’a Yave una yame, e kuma kadi, unkusidi mazi yateleka nsangu zambote kw’asukami. Untumini yasamuna luvevoko kwa abakami, e mbweno kwa mpofo, yasindika awana bebangikwanga benda kwau,
19 yasamun’o mvu a dienga dia Yave.”
20 Obundikidi o nkanda, ovutwidi wo kwa selo, ovuende; o meso ma wantu awonso muna sambilu mavuidi kuntungununa.
21 Oyantikidi kubavovesa vo: “O unu e sono kiaki nuwidi kilunganene.”
22 Awonso bayantikidi kunsila umbangi wambote, basivikidi mpe muna mambu mangemba mavaikidi muna nu’andi, bavovele vo: “Ondioyu nga ke mwan’a Yosefe ko e?”
23 Ubavovese vo: “Kalukatikisu ko vo, se nwavova diambu diadi mu kuma kiame, ‘E nganga, ukiwuka. Mana tuwidi mavangamene muna Kafanau, vanga mo mpe mwamu vata diaku.’”
24 Ovovele vo: “Kieleka, inuvovese vo, ke vena nkutu ngunza ko ozitiswanga muna vata diandi.
25 Inuvovese e ludi vo: Akento ayingi bafwilwa akala muna Isaele muna tandu kia Eliya wa ngunza, una kiakangama e mvula mu mvu ntatu ye ngonde sambanu, mwakala mvengele angolo muna nsi yawonso.
26 Kansi, Eliya katumwa kw’akento awaya ko, kuna kwa nkento wafwilwa yakala kuna Sarefate a Sidone kaka katumwa.
27 Diau adimosi mpe, akwa wazi ayingi bakala muna Isaele muna tandu kia Elesa wa ngunza, kansi ke mosi ko muna yau waveleleswa,* Namani kaka wa mwisi Suria.”
28 Wantu awonso muna sambilu bafungidi makasi vava bawidi mambu mama,
29 batelamene, bamvaikisi kuna mbazi a vata, banète kuna lunenge-nenge lwa mongo vana vatungilwa e vata diau, kimana banèngomona.
30 Kansi, oyandi oviokèle vana bena, wele kwandi.
31 I bosi, okulumukini kuna Kafanau, e vata dia Ngalili. Ubalongele muna lumbu kia Vundu,
32 basivikidi kikilu e mpil’andi ya longela, e kuma kadi kuna wisa kavovela.
33 Muna sambilu mukedi nkwa nkuya, nkwa mwand’a usafu, okazidi muna nding’angolo, oku vo:
34 “Nkia diambu tuna diau yo ngeye, e Yesu wa nkwa Nazarete? Nga wizidi kutufwasa e? Ntomene kuzaya, u Mveledi a Nzambi.”
35 Yesu otumbidi wo, oku vo: “Butama, vaika muna yandi.” O nkuya umbwisidi vana kati, uvaikidi muna yandi, ke usidi kumvanga diambu ko.
36 Yau awonso basivikidi, bavovazianene vo: “Nkia diambu diadi? Kadi muna wisa ye ngolo kavovesele mianda mia usafu, mivaikidi!”
37 E nsangu zandi zimwanganene muna zunga kiawonso.
38 Vava kavaikidi muna sambilu, okotele muna nzo a Simone. O kô* wa Simone wakala ye ngianduka yangolo, bamvovese kansadisa.
39 Otelamene vana kakedi, otumbidi e ngianduka, osasukidi. Vana vau otelamene, oyantikidi kubasadila.
40 Una kiadimuk’e ntangwa, awonso bakala ye mbevo za mpila mu mpila babatwese vana kena. Otensekele moko mandi muna yau awonso, ubasaswidi.
41 E nkuya mpe mivaikidi muna wantu ayingi, bakazidi yo vova vo: “Ongeye u Mwan’a Nzambi.” Ubatumbidi, kabayambwidi ko bavova, kadi bazaya wo vo yandi i Kristu.
42 Oku mene-mene, ovaikidi, wele kuna makanga. Kansi, e ndonga imvavidi, bezidi kwa yandi, bankakididi kalembi katuka kuna bena.
43 Ubavovese vo: “Mfwete kwenda mpe muna mavata mankaka, yasamun’e nsangu zambote za Kintinu kia Nzambi, kadi i diau yatuminwa.”
44 Dianu vo, wele alonginge muna masambilu ma Yuda.
