Luka 5:1-39
5 Lumbu kimosi una katelamene vana yanga dia Ngenesarete,* e ndonga izidi mu wá e diambu dia Nzambi, imfinangese.
2 Omwene nzaza zole vana nteto a yanga, kansi abaki a mbizi bavuidi mo kulumuka kadi makonde mau besukulanga.
3 Okotele muna nzaza ya Simone, undodokele vo kanunguna yo fioti muna maza. Ofongele muna nzaza, oyantikidi longa e ndonga.
4 Vava kamene longa, ovovese Simone vo: “Nunguna nzaza vana kati, nwaleka makonde meno, nwabaka e mbizi.”
5 Simone ovutwidi vo: “E Mfumu, o fuku wawonso tusadidi yeto ke tubaki má, kansi muna diambu diaku ileka makonde.”
6 Bavangidi wo, babakidi mbizi zayingi za maza. O makonde mau mayantikidi bâkuka.
7 Babokele akw’au muna nzaza yankaka beza kubasadisa. Bezidi, bazadisi e nzaza zau zole, i bosi ziyantikidi dimuka.
8 Simone Petelo wau kamwene wo, obwidi vana makungunu ma Yesu, oku vo: “E Mfumu, katuka kwaku vava ngina, kadi i nsumuki kwame.”
9 Kadi osivikidi kikilu ye awonso bakedi yandi, muna diambu dia mbaka babaka mbizi za maza,
10 diau adimosi mpe kwa wan’a Zebedayo, Yakobo yo Yoane, ana basalanga ntwadi yo Simone. Yesu ovovele kwa Simone vo: “Kumoni wonga ko. Tuk’omu unu wantu obaka.”
11 Batwese nzaza zau vanakumu, bayambwidi lekwa yawonso, banlende.
12 Vava kakala muna vata dimosi, muntu mosi wabilam’o wazi omwene Yesu, oyinzikidi o ntu, undodokele vo: “E Mfumu, avo ozolele wo, umpelelesa.”
13 Olambwidi o koko, unsimbidi, oku vo: “Nzolele wo! Velela kwaku.” Vana vau o wazi unkatukidi.
14 I bosi, Yesu okanikini o muntu vo kazayisi dio kwa muntu ko: “Kansi wenda kuyisonga kwa nganga, watambika lukau lwa mpelela aku, wauna Mose kakanikina, muna umbangi kwa yau.”
15 Kansi e nsangu zandi zimwanganene kikilu, e ndong’ayingi izidi lungalakana bawá, yo wukwa muna mayela mau.
16 Wele kuna makanga, kasamba.
17 Muna lumbu yayina vava kalonganga, Afarisi y’alongi a Nsiku, ana batuka muna mavata mawonso ma Ngalili, y’oma ma Yuda, y’oma ma Yerusaleme, bakedi kûna; e ngolo za Yave za wuka zakala yandi.
18 Tala, o wantu benatanga nkwa vola vana kipoyo, bavavidi una balenda kunkotesela yo kunluakisa vana vakala Yesu.
19 Kansi wau ke balendele kunkotesa ko mu kuma kia ndonga, batombokele kuna nludi, bankulumwini muna kipoyo, vana kati kw’awana bakala kuna luse lwa Yesu.
20 Vava kamwene lukwikilu lwau, ovovele vo: “E nkundi, masumu maku malolokelo.”
21 I bosi, asoneki ye Afarisi bayantikidi yindula, oku vo: “Nani ndioyu otiangunanga Nzambi? Nani olenda loloka masumu, avo ke Nzambi kaka ko?”
22 Kansi, Yesu obakwidi ngindu zau, ubavutwidi vo: “Adieyi nuyindulanga omo ntima mieno?
23 Adieyi diasazu mu vova, ‘O masumu maku malolokelo’ yovo vova vo, ‘Telama yo diata’?
24 Kansi kimana nwazaya vo Mwan’a muntu ovuidi e wisa kialoloka masumu ova nza—” ovovese mbevo a vola vo: “Ivovese vo, Telama, bonga kipoyo kiaku, wenda kuna nzo aku.”
25 Vana vau otelamene vana bena, onete kipoyo kina kalekeswa, wele kuna nzo andi, wele kembelelanga Nzambi.
26 Awonso basivikidi kikilu, bakembele Nzambi, bamwene o wonga, bavovele vo: “Mambu masivi tumwene o unu!”
27 I bosi, ovaikidi, omwene nkwa mpaku, nkumbu andi Levi, ovuende vana vevakulwilwanga e mpaku, umvovese vo: “Undanda.”
28 Otelamene, osisidi yawonso, oyantikidi kunlanda.
29 I bosi, Levi unlambisidi lambu diampwena muna nzo andi, mwakala ndong’ayingi, avakulwisi a mpaku y’akaka mpe badidi yau vana meza.
30 Afarisi ye asoneki au bayidimìni alongoki andi, oku vo: “Ekuma nudilanga yo nua kumosi ye avakulwisi a mpaku ye asumuki?”
31 Yesu ubavovese vo: “Ana bena yo vimpi ke bavuidi ngang’a mawuku mfunu ko, kansi ambevo kaka.
32 Kiayiza bokela ansongi ko, asumuki kaka baviluk’o ntima.”
33 Bamvovese vo: “Alongoki a Yoane bekwamanananga fionkonona* yo samba, alongoki a Afarisi mpe i wau bevanganga, kansi alongoki aku, dia yo nua.”
34 O Yesu ubavutwidi vo: “Nga akundi a toko dia nsompi balenda fionkonona,* avo toko dia nsompi una yau?
35 Kansi vekala ye lumbu yina e toko dia nsompi kekatulwa vana bena; muna lumbu yayina befionkonona.”*
36 Ubatelele diaka e kingana vo: “Ke vena muntu ko ozenganga tenda kia mvuatu wampa kalonda kio muna mvuatu wankulu. Kadi ke mvuatu wampa kaka ko kefwasa, kansi e tenda kiampa ke kifwanana ko ye mvuatu wankulu.
37 Diau dimosi, ke vena muntu ko osianga vinyu ampa muna madila mankulu ma nkand’a bulu. Kadi e vinyu ampa ibukisa madila, yo tiamuka, e madila mefwasuka.
38 Kansi vinyu ampa muna madila mampa isiwanga.
39 Ke vena muntu ko onwini vinyu ankulu kazola ina yampa, kadi edi kevova vo, ‘Ina yankulu iwete.’”
Mvovo vana yand'a lukaya
^ I sia vo, Mbu a Ngalili.
^ Yovo “mina nsoki.” Tala Nsas’a Mvovo.
^ Yovo “mina nsoki.” Tala Nsas’a Mvovo.
^ Yovo “mina nsoki.” Tala Nsas’a Mvovo.
