Luka 6:1-49
6 Una kaviokelenge muna mpatu za masa muna lumbu kia vundu, alongoki andi batolwele ntu mia masa, bavinzidi mio, badidi.
2 Vava bamwene wo, akaka muna Afarisi bavovele vo: “Ekuma nuvangilanga edi ke diansongi ko omu lumbu kia Vundu?”
3 Kansi, Yesu ubavutwidi vo: “Nga ke nwatanga dio ko dina Davidi kavanga vava kafwa e nzala kumosi ye ana bakala yandi e?
4 Wakota muna nzo a Nzambi yo bonga e mbolo zatambikwanga vana ndose a Nzambi, wadia zo yo vana mpe kw’awana bakala yandi, edi ke diansongi ko kwa muntu mu dia zo, anganga kaka.”
5 I bosi, ubavovese vo: “O Mwan’a muntu i Mfumu a lumbu kia Vundu.”
6 Muna lumbu kiakaka kia vundu, okotele muna sambilu, oyantikidi longa. Mukedi muntu una yo koko kwalunene kwayuminina.*
7 Asoneki ye Afarisi balangididi Yesu kana vo owuka muna lumbu kia Vundu, kimana basolola dina bekumfundila.
8 Kansi wau kazaya makani mau, ovovese nkwa koko kwayuminina* vo: “Telama, wiza ova kati.” Otelamene, wele vana kati.
9 I bosi Yesu ubavovese vo: “Diambu ikunuyuvula, Nga diansongi mu vanga mawete yovo mambi mu lumbu kia Vundu, vuluza moyo yovo vonda wo?”
10 Una katadidi yau awonso, ovovese muntu vo: “Lambul’o koko kwaku.” Ovangidi wo, o koko kwandi kusasukidi.
11 Kansi oyau, bafungidi kikilu makasi, bayantikidi vovaziana dina balenda vanga kwa Yesu.
12 Muna lumbu yayina wele vana mongo kasamba, osambidi kwa Nzambi fuku wawonso.
13 Vava kwakia, obokele alongoki andi, osolele 12 vana bena, ubayikidi vo antumwa:
14 Simone, ona kavana mpe nkumbu a Petelo yo Andere wa nleke andi, Yakobo, Yoane, Filipo, Batolomai,
15 Matai, Toma, Yakobo wa mwan’a Alefayo, Simone ona oyikilwanga vo “nkwa vema,”
16 Yuda wa mwan’a Yakobo yo Yuda wa mwisi Kereote, ona wakituka se nyekodi.
17 Okulumukini yau, otelamene vana ndimba, vakedi ndong’ayingi y’alongoki andi yo nkangu wayingi watuka muna Yuda yawonso ye muna Yerusaleme, ye muna mbel’a mbu a Turo ye Sidone, ana bezidi wá yo wukwa yimbevo yau.
18 Kana nkutu awana babangikwanga kwa mianda mia usafu basaswilu.
19 E ndonga yawonso ivavidi kumviakana kadi ngolo zavaikanga muna yandi yo wuka yau awonso.
20 Otadidi kuna kw’alongoki andi, ovovele vo:
“Kiese kwa yeno asukami, kadi e Kintinu kia Nzambi i kieno.
21 “Kiese kwa yeno nufwa nzala owau, kadi nuyukuta.
“Kiese kwa yeno nudilanga owau, kadi nuseva.
22 “Nukala ye kiese konso ntangwa o wantu bekunumenga, kunubembola, kunuveza yo yivisa e nkumbu zeno nze yimpumbulu muna diambu dia Mwan’a muntu.
23 Muna lumbu kiakina numona kiese yo yangalala, kadi o nsendo eno wanene kuna zulu, i wau mpe bavanga mase mau kuna kwa ngunza.
24 “Tâtu kwa yeno mvuama, kadi numwene kala lufiaulwisu lweno.
25 “Tâtu kwa yeno nuyukwiti owau, kadi nzala nufwa.
“Tâtu kwa yeno nusevanga owau, kadi nukendalala yo dila.
26 “Tâtu kwa yeno, ovo nusanisinwa kwa wantu awonso, kadi i wau mpe mase mau bavanga kuna kwa ngunza zaluvunu.
27 “Kansi mpovele kwa yeno nuwanga: Nuzolanga mbeni zeno, nuvanga mawete kw’awana bekunumenganga,
28 nusambula awana bekunusibanga, yo samba mu kuma kia awana bekunutiangunanga.
29 Ndiona uwende vana bundi dimosi, untambika diankaka; ona obongele kinkutu kiaku, unyambulwila mpe e yunga kiaku.
30 Konso on’okulomba, umvana, on’obongele lekwa yaku, kunlombi yo ko.
31 “Mana nuzolele vo wantu banuvanga, i mau mpe nuvanga kwa yau.
32 “Avo nuzolele kaka ana bekunuzolanga, nkia wete nuvangidi? Kadi asumuki mpe bezolanga ana bekubazolanga.
33 Avo nuvanga mawete kw’awana bekunuvanganga mawete, nkia wete nuvangidi? Kadi asumuki nkutu diau adimosi bevanganga.
34 Avo nusompekele kw’awana nusia vuvu kia kunuvutulwila, nkia wete nuvangidi? Asumuki nkutu besompekanga akw’au asumuki yo tambula kaka kina basompekele.
35 Kansi tu, nuzolanga atantu eno, yo kubavanga mawete, nusompeka lembi sia vuvu kiatambula diaka; o nsendo eno wayingi ukala, nwakala nu wan’a Mpungu, kadi oyandi nkwa walakazi kuna kwa ntokozi, yo kuna kwa wantu ambi.
36 Nukalanga akwa nkenda, nze Se dieno una vo nkwa nkenda.
37 “Nuyambula fundisa, nwalembi fundiswa; nuyambula yelesa, nwalembi yeleswa. Nulolokanga,* ozevo nulolokwa.*
38 Nukayanga, ozevo nukayilwa. Nuvaninwa muna mfokola zeno e nzongo ambote, waniemenenwa, wabandilwa, yo siwa mabetomona. Kadi muna nzongo una nuzongela i nuzongelwa mpe.”
39 I bosi, ubatelele kingana vo: “O mpofo nga olenda kwandi fila nkw’andi mpofo e? Yau awole, nga ke bebwa muna wulu ko e?
40 O nlongoki kasundidi nlongi andi ko, kansi konso ona otomene longwa, okala nze nlongi andi.
41 Ozevo, aweyi omwenene titi kina muna disu dia mpangi aku, kansi kumwene mwangu una omo disu diaku ko?
42 Aweyi olenda vovesela mpangi aku vo, ‘E mpangi, yambula yakatula e titi kina mu disu diaku,’ ekolo ngeye kibeni kumwene mwangu una omo disu diaku ko e? Mpuki! Teka katula o mwangu una omo disu diaku, i bosi otoma mona una olenda katulwila e titi kina muna disu dia mpangi aku.
43 “Kadi o nti ambote ke uyimanga mbongo ambi ko, ngatu nti ambi wayima mbongo ambote.
44 Kadi konso nti uzayilwanga muna mbongo andi. Muna bong’e nona, ke bevelanga nsanda muna nsende ko, ngatu vela uva muna nti a nsende.
45 Muntu ambote muna lusalu lwambote lwa ntim’andi i kevaikisilanga oma mambote, kansi muntu ambi muna lusalu lwandi lwambi i kevaikisilanga oma mambi; kadi o nu’andi uvovanga mana mazele muna ntima.
46 “Ekuma nukungikilanga vo, ‘e Mfumu, e Mfumu,’ kansi oma ivovanga ke nuvanganga mo ko?
47 Konso ona okwiza oku ngina yo wá mambu mame, yo vanga mo, ikunusong’owu kena:
48 Una nze muntu otunganga nzo, otimini yamuna sina, okubidi nkubilwa vana nsenzele.* E kizalu vava kiayiza, e nkukwila iwandamene muna nzo yayina, kansi ke ilendele yo nikuna ko, kadi yatoma tungwa.
49 Kansi, konso ona owidi mo yo lembi vanga diambu, una nze muntu otungidi nzo vana ntoto, lembi kuba nkubilwa. E nkukwila iwandamene muna nzo, vana vau ibwidi yo kosomoka.”
Mvovo vana yand'a lukaya
^ Yovo “kwavanguka.”
^ Yovo “kwavanguka.”
^ Yovo “nuyambulwilanga.”
^ Yovo “nuyambulwilwa.”
^ I sia vo, fulu kia matadi.
