Luka 8:1-56
-
Akento ana bakangalanga yo Yesu (1-3)
-
Kingana kia nkuni (4-8)
-
Ekuma Yesu kasadila yingana (9, 10)
-
Nsas’a kingana kia nkuni (11-15)
-
Mini ke kifukilwanga ko (16-18)
-
Ngudi ye mpangi za Yesu (19-21)
-
Yesu ovuvikidi tembwa (22-25)
-
Yesu osindikidi nkuya muna ngulu (26-39)
-
Mwan’a Yairo; nkento oviakene mvuatu a Yesu (40-56)
8 I bosi, wele kangala muna mbanza ye muna mavata, wele alonginge yo samunang’e nsangu zambote za Kintinu kia Nzambi. Yau Kumi ye Zole bakedi yandi,
2 kumosi ye akento akaka ana bawukwa yimbevo yo vaikiswa mianda miambi: Maria ona wayikilwanga vo Mandala, ona wavaikiswa nkuya nsambwadi;
3 yo Yoana wa nkaz’a Kuza, wa selo kia Erodi, yo Susana, ye akento ayingi akaka mpe, ana babasadidinge muna mavua mau.
4 E ndong’ayingi vava ilungalakene, y’awana batukidi muna mavata mawonso bezidi oku kena, ubatelele kingana, oku vo:
5 “O nkuni wele kuna e mbongo andi. Wau kakunininge, e mbongo yankaka ibwidi vana mbel’a nzila imene diatakeswa, yo diwa kwa nuni za zulu.
6 Eyaka ibwidi vana vena matadi, ova imenene, izinini kadi o ntoto wayuma.
7 Yankaka mpe ibwidi vana vena nsende, imenene kumosi ye nsende, zifinangese yo.
8 Kansi, yankaka ibwidi vana ntoto ambote, imenene, iwutidi mbongo nkama-nkama.” Wau kavovelenge mambu mama, ovovele mu nding’angolo, oku vo: “Ndiona una ye matu manwe, yambula kawa.”
9 Kansi, alongoki andi banyuvuidi e nsas’a kingana kiaki.
10 Ovovele vo: “Kwa yeno diavewa edi dia bakula mbumb’avauka ya Kintinu kia Nzambi, kansi kuna kw’akaka muna yingana, kadi kana una vo betalanga yau ke bamoni, kana una vo bewanga yau ke babakudi.
11 Ozevo, i yau yiyi e nsas’a kingana: E mbongo i diambu dia Nzambi.
12 Ana bena muna mbel’a nzila, i yau yana bawidi, i bosi Nkadi ampemba wizidi yo katul’e diambu muna ntima miau, kimana balembi kwikila yo vuluzwa.
13 Ana bena vana vena matadi, i yau yana, vava bawidi e diambu, batambwidi dio kuna kiese, kansi awaya ke bena ye mianzi ko. Bakwikidi mu fikolo, kansi muna ntangw’ampasi, babembwele lukwikilu.
14 Ina ibwidi vana vena nsende, i yau yana bawidi, kansi wau bafilakeswa kwa ntelamw’a moyo ye umvuama yo mawete ma zingu kiaki, bafinangeswa mvimba yo yima mbongo yasuluka.
15 Ina ibwidi vana ntoto ambote, i yau yana, vava bawidi e diambu muna ntim’ambote, batatididi dio yo yima mbongo kuna luzindalalu.
16 “Ke vena muntu ko okwika mini, kafukila kio mbangu,* ngatu sia kio kuna nsi a mfulu, kansi vana fulu kiazanguka kaka, kimana ana bekota mo bamona o ntemo.
17 Kadi ke vena diambu ko diaswekama dilembi zayakana, ngatu lekwa kiatoma swekama, kialembi moneka yo senzekwa.
18 Dianu vo, nutoma tala e ngwa nuwa, kadi konso ona una ye má, yayingi kevewa, kansi ndiona kena ye má ko, kana nkutu kina keyindulanga vo una kiau, katulwa kikunkatulwa.”
19 O ngudi andi ye mpangi zandi bezidi kwa yandi, kansi ke balendele luaka vana kena ko mu kuma kia ndonga.
20 Bamvovese vo: “O ngudi aku ye mpangi zaku batelamene kuna mbazi, bazolele kumona.”
21 Ubavutwidi vo: “O ngudi ame ye mpangi zame i yau yaya bewanga mambu ma Nzambi yo sadila mo.”
22 Lumbu kimosi, okotele muna nzaza ye alongoki andi, ubavovese vo: “Tusauka kweto kuna simu dia yanga.” Bele.
23 Una bayelenge, obakamene kwa tulu. Tembwa kiangolo kizidi vana yanga, e nzaza iyantikidi zala ye maza, e sumbula kibaluakìdi.
24 Bezidi kunsikamesa, bavovele vo: “E Nlongi, e Nlongi, se tufwa!” Una katelamene, otumbidi e tembwa ye mavuku, malembamene, vakedi e pi-i.
25 I bosi, ubavovese vo: “O lukwikilu lweno alweyi?” Bamwene wonga, basivikidi, bavovazianene vo: “Ondioyu ozevo nani? Kadi ovovese tembwa yo maza, manlemvokele.”
26 Bele kuna zunga kia Angerasa kina mantalani ye Ngalili.
27 Una Yesu katombokele kuna seke, wizidi wanwa kwa yakala dimosi, mwisi mbanza una ye nkuya. Se kolo kiayingi kevuatanga nlele ko, kekalanga mpe mu nzo ko, kuna ziami kaka.
28 Vava kamwene Yesu, okazidi, obwidi vana kena, ovovele muna nding’angolo, oku vo: “Nkia diambu ngina diau yo ngeye, Yesu wa Mwan’a Nzambi a Mpungu? Dodokolo diaku, kumbangika ko.”
29 (Kadi Yesu wavovesa mwand’a usafu wavaika omu muntu. Nkumbu miayingi ukumbakanga, okangwanga muna luvambu yo muna kû, yo langidilwa, kansi odanunanga kangwa, yo natwa kwa nkuya muna makanga.)
30 O Yesu unyuvuidi vo: “Nkumbu aku nani?” Oyandi vo: “I mvengo,”* kadi nkuya miayingi miakota mu yandi.
31 Mindodokele vo kabasindiki mu mbilu ko.
32 Vana mongo vadilang’e kambi diayingi dia ngulu, mindodokele vo kabayambula bakota muna ngulu. Ubayambwidi.
33 I bosi e nkuya mivaikidi muna muntu, mikotele muna ngulu, e kambi dinengomokene yamuna yanga, dinuini nkaki.
34 Ana badikidinge ngulu, vava bamwene edi dibwidi, batinini, basamwini dio muna mbanza ye muna mavata.
35 O nkangu bezidi tala edi dibwidi. Balueke kwa Yesu, bamwene o muntu wavaikwa e nkuya, ovuete, o zayi wandi uvutukidi, ofongele vana ndambu a malu ma Yesu, bamwene o wonga.
36 Awana bamwene dio, babasamunwini e nsasuka kasasukidi o nkwa nkuya.
37 I bosi, ndong’ayingi itukidi muna zunga kia Ngeresa bandodokele kakatuka vana bena, kadi wonga wingi ubabakidi. I bosi, okotele muna nzaza, wele.
38 Kansi ndiona wavaikwa e nkuya, undodokele kenda yandi, unsindikidi, oku vo:
39 “Nda vutuka kuna nzo aku, wenda samuna dina Nzambi kavangidi kwa ngeye.” Dianu vo, okatukidi kwandi, wele samuna muna vata diawonso dina Yesu kamvangidi.
40 O Yesu vava kavutukidi, e ndonga itomene kuntambula, kadi yau awonso yandi bavingidinge.
41 Kulueke muntu, nkumbu andi Yairo; mbut’a sambilu kakala. Obwidi vana malu ma Yesu, undodokele vo kenda kuna nzo andi,
42 kadi o mwan’andi mosi kaka ankento, wa tezo kia mvu 12 se kefwa.
Una Yesu kekwendanga, e ndonga imfinangese.
43 Vakedi nkento wavaikwanga menga se mvu 12, ke vakala muntu ko walenda kunsasula.
44 Ofimamene kuna nima yo viakana nswiku a mvuatu andi, vana vau e mpaik’a menga ikakamene.
45 O Yesu ovovele vo: “Nani umpiakene?” Yau awonso bavakwidi wo nkalu, o Petelo ovovele vo: “E Nlongi, e ndonga izungidi ye kufinangesa.”
46 O Yesu ovovele vo: “Muntu umpiakene, kadi nzeye wo vo ngolo zimpaikidi.”
47 O nkento wau kamwene vo ke swekama ko, wizidi azakama, wizidi fukama vana kena, unzayisi vana ndose a wantu awonso e kuma kamviakanene, ye nsasulwa kasaswilu vana vau.
48 Ovovese nkento vo: “E mwan’ame, lukwikilu lwaku lusaswidi. Wendela kuna luvuvamu.”
49 Una kavovelenge, vezidi muntu otukidi kuna nzo a mbut’a sambilu, ovovele vo: “O mwan’aku ankento ofwidi; kutokanesa Nlongi ko.”
50 O Yesu wau kawidi wo, umvutwidi vo: “Kumoni wonga ko, kwikila kaka, ovuluka kwandi.”
51 Vava kalueke kuna nzo, kayambwidi muntu kakota yandi ko, nanga Petelo kaka, yo Yoane, yo Yakobo, yo se dia mwana, yo ngudi.
52 Wantu awonso bandididi, yo yayana ye ntantu. Kansi Yesu ovovele vo: “Nuyambula o dila, kadi kafwidi ko, leka kaka kalele.”
53 Vava bawidi wo, bayantikidi kunseva kuna luvezo lwawonso, kadi bazeye wo vo ofwidi.
54 Osimbidi koko kwandi, umbokele: “E mwana, telama!”
55 E fulumwinu* kiandi kivutukidi, vana vau otelamene, ubavovese vo bamvana ma kadia.
56 O se diandi yo ngudi andi basivikidi kikilu, kansi ubakanikini vo ke basamuna kwa muntu ko edi divangamene.
Mvovo vana yand'a lukaya
^ Yovo “kitunga.”
^ Muna mvengo mosi mulenda kala ye tezo kia 6.000 ma makesa.
^ Yovo “ngolo za moyo.”
