Ngalatia 1:1-24
1 Paulu, wa ntumwa, kasolwa kwa wantu ko ngatu solelwa muna muntu, kansi muna Yesu Kristu yo Nzambi wa Se, ona wamfula muna mafwa,
2 ye mpangi zawonso bena yame, kuna kwa nkutakani za Ngalatia:
3 Yambula nsambu ye luvuvamu lutukidi kwa Nzambi wa Se dieto yo Mfumu Yesu Kristu lwakala yeno.
4 Yandi kibeni wakivana mu kuma kia masumu meto kimana katuvuluza muna tandu kiaki kiambi muna luzolo lwa Nzambi eto yo Se dieto,
5 kuna kwa yandi nkembo yamu mvu ya mvu. Amen.
6 Nsivikidi wau nubembwele mu nzaki Ndiona wanubokela muna nsambu za Kristu yo wá e nsangu zankaka zambote.
7 Ke vena nsangu zankaka zambote ko; kansi vena y’awana bekunutokanesanga, bazolele bendomona e nsangu zambote mu kuma kia Kristu.
8 Avo mosi muna yeto yovo mbasi itukidi kuna zulu inusamunwini e nsangu zankaka zambote ke zina twanusamunwina ko, yambula kasibwa.
9 Wauna tutekele vova, owau mpovele wo diaka vo, konso ndiona okunusamunwina nsangu zankaka zambote, ke zina nwatambula ko, yambula kasibwa.
10 Nga dienga dia wantu ivavanga yovo dia Nzambi? Yovo, nga wantu ivavanga yangidika? Avo yakinu yangidika wantu, ki ntaudi a Kristu ko.
11 Ampangi, nzolele nwazaya wo vo e nsangu zambote zina yanusamunwina ke zatuka kwa wantu ko;
12 kadi kiatambula zo kwa muntu ko ngatu longwa zo, kansi mu lusengomono lwa Yesu Kristu zayizila.
13 Kieleka, nwawa owu wakala e kadilu kiame muna Kiyuda, kuna nsita zawonso yabangikanga e nkutakani a Nzambi yo fwantakesa yo;
14 yatoma nungunukanga muna Kiyuda lutila nkutu wantu ayingi a ntel’ame muna nsi ame, wau yakala ye tima diayingi muna tusansu twa mase mame.
15 Kansi, o Nzambi ona wampaikisa muna vumu kia ngudi ame yo kumbokela muna nsambu zandi, wamona vo diambote
16 kasengomona Mwan’andi omu mono kimana yasamuna nsangu zambote mu kuma kiandi kwa esi zula, vana vau kiayuvula kwa konso muntu ko;
17 ngatu tomboka kuna Yerusaleme kw’awana bampita muna kintumwa, kansi yayenda kuna Arabia, i bosi yavutuka kuna Damaseke.
18 I bosi, vava kiavioka mvu ntatu, yatomboka kuna Yerusaleme mu kingula Kefa, lumbu 15 yananga yandi.
19 Kansi, kiamonana ye ntumwa zankaka ko, Yakobo kaka wa nleke a Mfumu.
20 Vo i mambu mana inusonekene owau, mpovele vana ndose a Nzambi vo kinuvunini ko.
21 I bosi yayenda muna zunga kia Suria ye Kilikia.
22 Kansi, kiazayakana ndose ko muna nkutakani za Kristu muna Yuda.
23 Edi kaka bawanga: “O muntu ona wateka kutubangika, owau nsangu zambote za lukwikilu luna kateka fwasa kesamunanga.”
24 Bayantika kembela Nzambi mu kuma kiame.
