Ngalatia 2:1-21
2 Vava kiavioka mvu 14, yatomboka diaka kuna Yerusaleme yo Banaba, o Tito mpe wayenda yame.
2 Yatomboka ko mu diambu dia lusengomono, yabazayisa e nsangu zambote isamunanga vana vena esi zula. Kiavangila wo va ndonga ko, kansi vana vena awana batoma zitiswanga, muna kubasonga vo uselo wame ke wankatu ko.
3 Kansi, o Tito nkutu ona wakala yame, kakomekenwa ko vo kazengwa, kana una vo Mungerekia.
4 Kansi e diambu diadi diavaika mu kuma kia mpangi zaluvunu ana bakoteswa kuna sweki, ana bakota nze alangi mu vava fwasa luvevoko tuna lwau muna Kristu Yesu, kimana batubunduna emvimba;
5 ke twasakalela wantu awaya ko, kana nkutu mu fikolo, kimana e ludi kia nsangu zambote kiakala kaka omu yeno.
6 Kansi, mu kuma kia awana babadikilwanga vo mfunu bena—kiakala aki nani bakala, ke dina mfunu ko kwa mono, kadi Nzambi ketalanga ndose ko—wantu awaya batoma zitiswanga ke bandonga diambu diampa ko.
7 Kansi vava bamona vo yavewa kiyekwa kia samuna nsangu zambote kw’awana balembi zengwa, wauna o Petelo kasilwa kiyekwa kia awana bazengwa—
8 kadi ndiona wavana Petelo o nkuma wa kintumwa kia awana bazengwa, wampana mpe o nkuma wa kintumwa kuna kwa esi zula—
9 vava babakula e nsambu zina zavewa kwa mono, Yakobo, Kefa yo Yoane, ana babadikilwanga vo malunzi, omono yo Banaba batuvene o koko kwalunene kwa kintwadi, kimana oyeto twenda kwa esi zula, kansi oyau kuna kw’awana bazengwa.
10 Batuvovesa twasungamenanga asukami, e tima diayingi mpe yakala diau mu vanga wo.
11 Kansi vava Kefa kayiza oku Antiokia, yantumba vana ndose andi, kadi diatoma moneka vo vilwa kavanga.
12 Kadi una ke balueke ko wantu ana batuka kwa Yakobo, wadianga vamosi y’esi zula; kansi vava baluaka wayambula wo vanga yo kubavambuka, mu kuma kia wonga wa awana bazengwa.
13 Ayuda ankaka mpe banyikama muna umpuki wandi, kana nkutu Banaba wavukumunwa muna umpuki wau.
14 Kansi, vava yamona vo ke bakangalelanga mu ludi kia nsangu zambote ko, mpovese Kefa vana vakala yau awonso, oku vo: “Ongeye, kana una vo u Nyuda, kuzingilanga nze Ayuda ko kansi nze mwisi zula. Ozevo, ekuma okomekenanga esi zula bazingila mun’owu wa Kiyuda?”
15 Oyeto tuna vo Ayuda a kingutukila, ke tu asumuki a esi zula ko,
16 tuzeye wo vo muntu ke lungisilwa muna mavangu ma nsiku ko, kansi muna lukwikilu muna Yesu Kristu kaka. Oyeto tukwikidi muna Kristu Yesu, kimana twalungisilwa muna lukwikilu muna Kristu, kansi ke muna mavangu ma nsiku ko, e kuma kadi ke mosi ko olungisilwa muna mavangu ma nsiku.
17 Kansi oyeto, avo tusolokele vo tu asumuki wau tuvavanga lungisilwa muna Kristu, nga Kristu selo kia sumu e? Ke wau ko!
18 Avo ntungulwidi e lekwa ina yabangula, nsongele vo i nsumuki.
19 Kadi muna diambu dia nsiku, omono yafwila muna nsiku kimana yakal’o moyo kuna kwa Nzambi.
20 Owau nkomeno vana nti kumosi yo Kristu. Ke mono diaka ko ngin’o moyo, kansi i Kristu una o moyo omu mono. Ozevo, owau ngin’o moyo mun’owu wa lukwikilu lwame muna Mwan’a Nzambi, ona wanzola, wakiyekola mu kuma kiame.
21 Kibembwele nsambu za Nzambi ko, kadi avo muntu muna nsiku kelungisilwa, ozevo, lufwa lwa Kristu ke luna mfunu ko.
