Ngalatia 3:1-29
3 E mazowa ma Ngalatia! Nani unuvukumwini muna bi wau, oyeno nwasongwa Yesu Kristu wau kakomwa vana nti?
2 Diambu dimosi nzolele kunuyuvula: Nga mu mavangu ma nsiku nwatambulwila mwanda yovo muna lukwikilu lwa mana nwawa?
3 Nga nu mazowa kikilu e? Wau vo muna mwanda nwayantikila, nga nuzolele manisina muna kinitu e?
4 Nga mu nkatu kwandi nwamwena e mpasi zayingi e? Ngina ye ziku vo ke mu nkatu ko nwamwena zo.
5 Dianu vo, ndiona okunuvananga mwanda yo vanga mavangu mankuma vovo nwina, nga mu kuma kia mavangu meno ma nsiku kevangilanga wo yovo muna lukwikilu lweno muna mana nwawa?
6 Wauna Abarayama “kakwikidila muna Yave, i diambadikilwa vo nsongi.”
7 Nutomene dio zaya vo akwa lukwikilu i wan’a Abarayama.
8 E sono kiateka songa vo muna lukwikilu o Nzambi i kelungisila esi zula, e nsangu zambote zateka samunwa mpe kwa Abarayama, oku vo: “Omu ngeye i musambulwilwa e zula yawonso.”
9 I dianu vo, akwa lukwikilu besambulwanga kumosi yo Abarayama wa nkwa kwikizi.
10 Awonso ana besiang’e vuvu muna mavangu ma nsiku, basibwa, kadi diasonama vo: “Wasibwa konso ona olembi sikila muna mawonso masonama muna nkand’a Nsiku yo lembi mo vanga.”
11 Kansi, kuna kwa Nzambi ke mosi ko olungisilwa muna nsiku, kadi “o nsongi muna lukwikilu i kekadil’o moyo.”
12 O Nsiku ke watuka muna lukwikilu ko. Kansi, “konso ona ovanga mambu mama, i mûna kekadil’o moyo.”
13 Kristu wau kakituka se muntu asibwa vana fulu kieto, watusumba, watuvevola muna sibu kia Nsiku, e kuma kadi diasonama vo: “Wasibwa konso ona omanikinu vana nti.”
14 Ediadi diavangama kimana esi zula batambula e nsambu za Abarayama muna Kristu Yesu, oyeto twatambula o nsilu a mwanda muna lukwikilu lweto.
15 Ampangi, nsadidi nona ya oma ma wantu muna vovana yeno: Avo e kangu dikangilu, kana nkutu kwa muntu mosi kaka, ke vena muntu ko obembola dio yovo kudikila mo diambu.
16 Kuna kwa Abarayama kwasilwa e nsilu ye mbongo andi. Ke wavova ko vo, “kuna kwa mbongo,” vika sia vo yayingi. Kansi wavova vo, “kuna kwa mbongo aku,” ina vo muntu mosi, i Kristu.
17 Edi mpovele: Entete, Nzambi wakanga e kangu, i bosi, vava kiavioka mvu 439, wasikidisa o Nsiku, kansi o Nsiku ke wafwasa e kangu diadi ko ye nsilu.
18 Kadi avo e vua muna nsiku diasikidisilwa, o nsilu ke una diaka mfunu ko; kansi o Nzambi muna nsilu i kavanina dio kwa Abarayama.
19 Ozevo, ekuma kiasilw’o Nsiku? Wakudikilwa muna senzeka makuzuka yavana kikwiz’e mbongo ina yasilw’o nsilu; ambasi batambula o nsiku yo zayisa wo kwa nkambami.
20 Ke vena nkambami ko muna diambu dia muntu mosi, kansi Nzambi mosi kaka.
21 Ozevo, nga Nsiku nsilu mia Nzambi utelamenang’e? Ke wau ko! Kadi avo nsiku wasiwa kimana wavan’o moyo, o wantu muna nsiku belungisilwanga.
22 Kansi e Sono kiayekola wantu awonso muna wisa kia sumu, kimana o nsilu wina muna lukwikilu muna Yesu Kristu wavewa kw’awana bekwikilanga.
23 Kansi, una lukwikilu ke lwayizidi ko, o nsiku watutanina, wau twakala muna wisa kiandi, twavingilanga lukwikilu luna lwadi sengomonwa.
24 Dianu vo, o Nsiku wakituka se nlongi eto ona watufila kwa Kristu, kimana twalungisilwa muna lukwikilu.
25 Kansi, wau lwizidi o lukwikilu, ke tuna diaka muna wisa kia nlongi ko.
26 Dianu vo, yeno awonso nu wan’a Nzambi muna diambu dia lukwikilu lweno muna Kristu Yesu.
27 Kadi yeno awonso nwavubilwa muna Kristu, nwavuata Kristu.
28 Ke vena Nyuda ko ngatu Mungerekia, ke vena ntaudi ko ngatu mvevoki, ke vena yakala ko ngatu nkento, kadi yeno awonso nu mosi muna Kristu Yesu.
29 Ozevo, avo kwa Kristu nuvuilu, nu mbongo a Abarayama kikilu, nutambula e vua mun’owu wa nsilu.
