Ngalatia 4:1-31
4 Edi mpovele vo, o mvingidi e vua ekolo kena kimwana-mwana, kaswaswane ye ntaudi ko, kana una vo yandi i mfumu a yawonso,
2 kadi una muna wisa kia ayingidi ye selo yavana kifwana ntangwa yasikidiswa kwa se diandi.
3 Diau adimosi, oyeto mpe vava twakala yingiana-ngiana, twabundunwa kwa mambu ma nza yayi makondwa o mfunu.
4 Kansi vava kiafwana e ntangwa, o Nzambi watuma Mwan’andi, ona wawutwa kwa nkento ye wakala muna wisa kia nsiku,
5 kafuta e ntalu muna kûla awana bena muna wisa kia nsiku, kimana o Nzambi katutambula nze wan’andi.
6 Wau vo nu wan’andi, Nzambi watuma mwanda a Mwan’andi muna ntima mieto, una ukazanga vo: “Aba, e Tata!”
7 Dianu vo, ke nu ntaudi diaka ko kansi nu wana; wau vo nu wana, nutambula mpe e vua muna Nzambi.
8 Kansi, una ke nwazayidi Nzambi ko, nwabundunwa kw’awana bena vo ke nzambi kwandi ko.
9 Kansi wau nuzeye Nzambi yovo nuzayakene kwa Nzambi, ekuma nuvutukidi diaka muna mambu mantete matovoka ye makondwa mfunu yo bundunwa diaka?
10 Nusianga e sungididi kia lunda e lumbu, ngonde, nsungi ye mvu.
11 Wonga inumwenene, i kwa kala vo nkatu-nkatu ifuntukanga mu kuma kieno.
12 Ampangi, inudodokele, nukala nze mono, kadi wowo nwina, omono mpe i wau yakala. Ke nwampanga diambu diambi ko.
13 Kansi, nuzeye wo vo mu kuma kia kimbevo kiame yavuila e lau diantete dia kunusamunwina e nsangu zambote.
14 Kana una vo kimbevo kiame kiakala se lutonto kwa yeno, ke nwamveza ko ngatu mona nkele; kansi nwantambula nze mbasi a Nzambi, nze Kristu Yesu.
15 Akweyi kwina e kiese kina nwakala kiau? Kadi inusididi umbangi vo, avo dilendakana, nwadi dunguna meso meno yo kumpana mo.
16 Ozevo, nkitukidi se mbeni eno wau inuvovese ludi e?
17 Bevanganga mawonso muna kunutunta, kansi e kani diau ke diambote ko; bazolele kunuvambula yo mono kimana nwakala ye tima dia kubalanda.
18 Avo muntu ovanganga mawonso muna kunutunta ye kani diambote, ke mu kolo ngina yeno kaka ko, kansi ntangwa zawonso, ediadi diambote kwa yeno.
19 E wan’ame anzolwa, muna kuma kieno i mbwenene diaka e mpasi nze nsongo mia nkento owuta, yavana nusonga kiwuntu kia Kristu.
20 Nzolele vo yakala yeno, yanuvovesela kuna lulembamu, kadi o ntim’ame uyangamene mu kuma kieno.
21 Nunzayisa, oyeno nuzolele kala mu wisa kia nsiku, nga ke nuwanga Nsiku ko e?
22 Muna bong’e nona, diasonama vo Abarayama wana wole amakala kakala yau, omosi muna ntaudi ankento, owaka muna mfumu ankento;
23 kansi ndiona wawutwa kwa ntaudi ankento wawutukila mun’owu wa kinitu, kansi wankaka, ona wawutwa kwa mfumu ankento, muna nsilu kawutukila.
24 Mambu mama mena nze kingana; kadi akento awaya makangu mole besunzulanga, dina dia Mongo a Sinai, diawutila wana muna ubundu i Anga.
25 Anga i mongo Sinai una kuna Arabia, yandi osunzulanga Yerusaleme o unu, kadi ntaudi kwandi kumosi yo wan’andi.
26 Kansi Yerusaleme ya zulu, yavevoka, yandi i ngudi eto.
27 Kadi diasonama vo: “Yangalala e sita, ngeye kwawuta ko; kemba ye kiese ngeye kwamwene nsongo mia wuta ko; kadi o lutangu lwa wan’a nkento ona wabembolwa lusundidi ke mu ndiona una ye yakala ko.”
28 Ampangi, oyeto tu wan’a nsilu nze Isaki.
29 Kansi wauna ndiona wawutukila mun’owu wa kinitu kayantika bangikila ndiona wawutukila mun’owu wa mwanda, i diau mpe divangamanga o unu.
30 Ozevo, e sono aweyi kivovele? “Yinga ntaudi ankento yo mwan’andi, kadi o mwan’a ntaudi kalendi tambula e vua kumosi yo mwan’a mfumu ankento ko.”
31 Dianu vo, ampangi oyeto ke tu wan’a ntaudi ankento ko, kansi tu wan’a mfumu ankento.
