Ngalatia 5:1-26
5 Kadi muna luvevoko lwalu o Kristu i katuvevolwela. Dianu vo, nusikila, ke nuyisie diaka muna vangu kia ubundu ko.
2 Tala! Mono Paulu inuvovese vo avo nuzengelo, Kristu kekala mfunu ko kwa yeno.
3 Nsidi diaka umbangi vo konso muntu ozengwa, una ye mbebe ya lungisa o Nsiku wawonso.
4 Nwavambuka muna Kristu, oyeno nuvavanga lungisilwa muna nsiku; nukatukidi muna nsambu zandi.
5 Vo i yeto, tuvingilanga ye tima diawonso vo twalungisilwa muna mwanda yo lukwikilu.
6 Kadi muna Kristu Yesu, o zengwa yovo lembi zengwa ke kuna mfunu ko, kansi o lukwikilu lusalanga kumosi yo zola i luna o mfunu.
7 Nwatoma lundumukanga. Nani wanusima nwalembi lemvokela e ludi?
8 Ndiona unubokele ke yandi ko unulebele nwayambula lemvokela e ludi.
9 E mfuna yandwelo ifunisa mbumba wawonso.
10 Ngina ye vuvu vo oyeno nuna muna Mfumu ke nuyindula mankaka ko; kansi ndiona okunutokanesa, kana nkutu nani, ovewa e tumbu kimfwanukini.
11 Vo i mono ampangi, avo yakinu longa o zengwa, ekuma yakinu bangikilwa? Ozevo, e sakuba dia nti ampasi dikatwilu.
12 Nzolele vo akala ana bevavanga kunuvukumuna bayikitula se nzimba.
13 Ampangi, muna luvevoko nwabokelelwa; kansi ke nusadila luvevoko lwalu muna lungisa e zolela ya nitu ko, kansi nusalaziana kaka muna zola.
14 Kadi o Nsiku wawonso ulungisilu muna nkanikinu mosi, oku vo: “Zola nkw’aku wauna okuyizolelanga.”
15 Kansi, avo nukwamanana tatikaziana yo diasaziana, nutoma tala nwalembi vondaziana.
16 Kansi edi mpovele, nukangalelanga muna mwanda, ozevo ke nulunganisa nkutu e zolela ya nitu ko.
17 Kadi e nitu mu kuma kia zolela yandi isidi o mwanda e kitantu, o mwanda mpe usidi nitu e kitantu; ke yiwizananga ko, kimana nwalembi vanga mawonso nuzolele.
18 Kansi, avo nufilwanga kwa mwanda, ke nuna muna wisa kia nsiku ko.
19 Mavangu ma nitu matomene senzama, i mau mama: zumba, usafu, mavangu mansoni,
20 sambila teke, mpandu, kitantu, unzonzi, kimpala, makasi, ntantani, mpambula, landa malongi ma wantu,
21 ketokela, nkolwa, nkemba ye mambu ma mpila yayi. Inulukisi diaka mu kuma kia mambu mama wauna yateka kunulukisila vo, awana bevanganga mambu mama e Kintinu kia Nzambi ke bevua kio ko.
22 Kansi, e mbongo a mwanda i zola, kiese, luvuvamu, luzindalalu, walakazi, wete, lukwikilu,
23 lulembamu, volo. Muna mambu mama ke muna nsiku ko.
24 Dianu vo, awana bavuilu kwa Kristu Yesu, bakomen’e nitu vana nti yo maketo ye zolela yandi.
25 Avo muna mwanda i tunina o moyo, yambula twakangala mpe nkangala unsongi muna mwanda.
26 Ke tuyitundidiki ko, yovo vava sunda akaka, ngatu mwesaziana kimpala.
