Ngalatia 6:1-18
6 Ampangi, avo muntu oyantikidi vengomoka muna nzila una kabakwidi wo ko, oyeno nwazikuka muna mwanda nuvava singika o muntu ndioyo kuna lulembamu. Kansi, nuyikenga kimana oyeno mpe nwalembi tontwa.
2 Nunataziana mazitu, i mpila yayi nulungisila nsiku a Kristu.
3 Kadi konso muntu oyindula vo osundidi o mfunu, kinga ke wau ko, vuna kayivunini.
4 Kansi, yambula konso muntu kafimpa mavangu mandi, ozevo okala ye kuma kia yangalela, ke mu kuyitezanesa ye ankaka ko.
5 Kadi konso muntu onata e diandi zitu.
6 Vana ntandu, ndiona olongwanga e diambu dia Nzambi, yambula kakayana lekwa yawonso yambote yo ndiona okunlonganga.
7 Ke nuyivuni ko: o Nzambi ke tianginikinwa nzunu ko. Kadi o muntu, konso kina kekuna i kiau mpe kekutika;
8 kadi ndiona okunina muna nitu, muna nitu i kekutikila uwolezia, kansi ndiona okunina muna mwanda, muna mwanda i kekutikila moyo a mvu ya mvu.
9 Dianu vo, ke tuyambula vanga edi diambote ko, kadi tukutika muna ntangw’andi, avo tulembi yoya.
10 Dianu vo, konso ntangwa tubakidi e lau, yambula twavanga edi diambote kwa wantu awonso, musungula kw’awana tuna yau entwadi muna lukwikilu.
11 Se nutadi sono yanene inusonekene muna koko kwame.
12 Awonso ana bazolele sivikisa akaka muna nitu, yau bevavanga kunukomekena nwazengwa, bevanganga wo kimana balembi bangikwa mu kuma kia nti ampasi a Kristu.
13 Kadi, kana nkutu awana bazengwa ke belundanga kwau Nsiku ko, kansi bazolele vo oyeno nwazengwa kimana bakala ye kuma kia kuyisanina muna nitu zeno.
14 Kansi, kizolele nkutu kuyisana ko, nanga muna nti ampasi kaka wa Yesu Kristu wa Mfumu eto, kuna kwa mono e nza muna yandi yavondelwa, kansi kuna kwa nza, mono yavondwa.
15 Kadi o zengwa yovo lembi zengwa ke kuna mfunu ko, kansi e vangwa kiampa i kin’o mfunu.
16 Awonso ana bekangalelanga muna nkanikinu wau, luvuvamu ye nkenda kuna kwa yau, elo, kuna kwa Isaele a Nzambi.
17 Tuka owau, ke vakadi muntu ko okuntokanesa, kadi omu nitu ame mwina ye dimbu ya ntaudi a Yesu.
18 E nsambu za Mfumu eto Yesu Kristu, yambula zakala ye mwanda una nusonganga, ampangi. Amen.
