Roma 16:1-27
16 Inusunzwidi* Foibe wa nsang’eto, ona wina vo selo kia nkutakani ina kuna Kenkerea,
2 kimana nwantambula muna Mfumu wauna ufwene kw’aveledi, nunsadisa muna konso dina kavuidi o mfunu, kadi yandi kibeni ayingi kasadisi kala ye mono mpe.
3 Nuzingula mavimpi kwa Pereseka yo Akila, akw’ame asadi muna Kristu Yesu,
4 ana basia mioyo miau mu vonza mu kuma kiame, ana batondelo ke kwa mono kaka ko, kansi kwa nkutakani zawonso za esi zula* mpe.
5 Nuzingula mpe mavimpi kwa nkutakani ina muna nzo au. Nuzingula mavimpi kwa Epaineto wa nzolw’ame, wina vo mosi muna alongoki antete a Kristu kuna Asia.
6 Nuzingwila Maria mavimpi, ona ofuntukanga mu kuma kieno.
7 Nuzingula mavimpi kwa Anderonika yo Yunia, ayitu ye akw’ame abakami, ana batomene zayakana kwa antumwa yo kumpita muna landa Kristu.
8 Nuzingula mavimpi kwa Ampeliato wa nzolw’ame muna Mfumu.
9 Nuzingula mavimpi kwa Umbano wa nsadi wa nkw’eto muna Kristu yo Setako wa nzolw’ame.
10 Nuzingwila Apele mavimpi, wa nkwa kwikizi muna Kristu. Nuzingwila esi nzo a Aresetobulo mavimpi.
11 Nuzingula Erodione wa yitu kiame mavimpi. Nuzingula mavimpi kw’esi nzo a Nakiso, ana bena muna Mfumu.
12 Nuzingwila Terufaina yo Terufosa mavimpi, akento ana befuntukanga muna Mfumu. Nuzingwila Peresi wa nzolw’eto mavimpi, kadi ofuntukanga muna Mfumu.
13 Nuzingula mavimpi kwa Rufu ona wasolwa muna Mfumu, ye ngudi andi wa ngudi ame mpe.
14 Nuzingula mavimpi kwa Asunkerito, Felengo, Ereme, Pateroba, Erema y’ampangi bena yau.
15 Nuzingula mavimpi kwa Filologo yo Yulia, Nereo ye nsang’andi, yo Olumpa ye aveledi awonso bena yau.
16 Nukayisa muntu yo nkw’andi ye mfiba avelela. Nkutakani zawonso muna Kristu zinutumini o mavimpi.
17 Inukasakese ampangi, nutoma tala awana besianga mpambula ye sakuba, ke mena ngwizani ko ye mana nwalongwa, nubavenga.
18 Kadi wantu a mpila yayi ke ntaudi za Mfumu eto Kristu ko, kansi ntaudi za zolela* ya yau kibeni, muna mvovo mia malengo ye mia lusanisinu bevunginikanga ntima mia minkondwa ngangu.
19 O nlemvo weno uzayakene kw’awonso, dianu vo ngiangalele mu kuma kieno. Kansi nzolele vo nwakala akwa ngangu mun’edi diambote, kansi minkondwa ngangu mun’edi diambi.
20 Kadi ke kolo ko, Nzambi ona ovananga luvuvamu okosomona Satana kunsi a tambi yeno. Yambula nsambu za Mfumu eto Yesu zakala yeno.
21 Timoteo wa nkw’ame a salu unutumini mavimpi yo Lukio, Yaso ye Sosipatero, yitu yame.
22 Mono Tentio nsonekene nkanda wau, inutumini mavimpi muna Mfumu.
23 Ngayo, ona wantambula ye nkutakani yawonso, banutumini mavimpi. Eraseto wa nlundi* a lusalu lwa mbanza ye Kwato wa mpangi andi, banutumini mavimpi.
24 ——
25 Kuna kwa Ndiona olenda kunukumika mun’owu wa nsangu zambote isamunanga yo umbangi mu kuma kia Yesu Kristu, mun’owu wa lusengomoko lwa mbumb’avauka ina yalundwa tuka muna tandu yankulu,
26 kansi owau yasengomonwa yo zayiswa muna Sono ya ungunza kimana zula yawonso mun’owu wa nkanikinu a Nzambi a mvu ya mvu yakwikila ye kunlemvokela;
27 kuna kwa Nzambi, yandi mosi kaka i nkwa ngangu, nkembo a mvu ya mvu muna Yesu Kristu. Amen.
Mvovo vana yand'a lukaya
^ Yovo “Inusongele.”
^ Awana bena vo ke Ayuda ko.
^ Yovo “vumu.”
^ Yovo “selo.”
