Roma 7:1-25
7 Ampangi, nga ke nuzeye wo ko vo (kw’awana bazeye nsiku mpovele) o Nsiku una ye wisa muna muntu ekolo kena o moyo e?
2 Muna bong’e nona, o nkento wakazala wakangama yo nkaz’andi muna Nsiku ekolo kena moyo; kansi avo nkaz’andi ofwidi, o nkento ovevokele muna nsiku a nkaz’andi.
3 Kadi ekolo nkaz’andi kena o moyo, muntá zumba keyikilwa avo osompelo kwa yakala diankaka. Kansi avo nkaz’andi ofwidi, o nkento ovevokele muna nsiku a nkaz’andi, ke yikilwa muntá zumba ko avo osompelo kwa yakala diankaka.
4 Dianu vo, e mpangi zame, oyeno mpe nwafwa* muna Nsiku muna nitu a Kristu, kimana nwavuwa kwa muntu ankaka, ona wafulwa muna mafwa, kimana twayimina Nzambi e mbongo.
5 Kadi vava twazingilanga mun’owu wa nitu, e zolela ye sumu ina yasengomonwa kwa Nsiku yasalanga omu nitu* zeto kimana twayima mbongo a lufwa.
6 Kansi owau tuvevuelo muna Nsiku, kadi twafwa muna Nsiku watusimba, kimana twakala se ntaudi mun’owu wa mwanda, ke mun’owu wa nsiku ankulu ko una wasonama.
7 Ozevo, adieyi tuvova? Nga Nsiku i sumu e? Ke wau ko! Kieleka, kiadi zaya sumu ko kele vo ke vakadi Nsiku ko. Muna bong’e nona, kiadi zaya loko ko kele vo Nsiku ke uvovi ko vo: “Kulokokela ko.”
8 Kansi e sumu, wau dibakidi e nzila muna diambu dia nkanikinu, diyimini loko dia mpila zawonso omu mono, kadi kondwa kwa nsiku, e sumu diafwa diakala.
9 Una nsiku ke wayizidi ko moyo yakala. Kansi vava kiayiza o nkanikinu, e sumu mpe diayiza, vo i mono, mfwidi.
10 O nkanikinu una ufilanga kuna moyo, mono i una yamona vo ku lufwa ufilanga.
11 Kadi, e sumu wau dibakidi e nzila muna diambu dia nkanikinu, dimpunginikini yo kumponda.
12 O Nsiku wavelela, o nkanikinu mpe wavelela, wansongi ye wambote.
13 Ozevo, nga edi diambote dikuntwasila lufwa e? Ke wau ko! Kansi e sumu kaka, kadi e sumu dintwasidi lufwa mun’edi diambote kimana diamoneka owu dina. O nkanikinu wasonga vo e sumu diambi kikilu.
14 Kadi tuzeye wo vo o Nsiku wa kimwanda, kansi omono i muntu a kinitu, yatekwa muna sumu.
15 Kadi kizeye dio ko dina ivanganga. Kadi dina nzolele, ke diau ko ivanganga, dina kizolele ko i diau ivanganga.
16 Kansi, avo dina kizolele ko i diau ivanganga, nkwikidi vo Nsiku wambote.
17 Kansi owau, ke mono ko ivanganga wo, kansi i sumu dina dikalanga omu mono.
18 Kadi nzeye wo vo omu mono, i sia vo, omu nitu ame, ke muna edi diambote ko; kadi ngina ye tima dia vanga edi diambote, kansi kina ye ngolo za vanga dio ko.
19 Kadi edi diambote nzolele, kivanganga dio ko, kansi edi diambi kizolele ko, i diau ivanganga.
20 Ozevo, avo mvangidi dina kizolele ko, ke mono kwame ko mvangidi dio, kansi i sumu dina dikalanga omu mono.
21 Dianu vo, nsolwele nsiku owu omu mono: Avo nzolele vanga edi diambote, edi diambi dina yame.
22 Ngiangalele kikilu o nsiku a Nzambi muna kiwuntu kiame kiakati,
23 kansi mbwene nsiku wankaka muna nitu* ame, unwanisanga nsiku una muna nyindu ame yo kumfila muna ubundu wa nsiku a sumu una omu nitu* ame.
24 Ekwe mono fwafwala kia muntu! Nani okumpuluza muna nitu yayi ikumfilanga muna lufwa?
25 Ntondele Nzambi muna Yesu Kristu wa Mfumu eto! Kadi muna nyindu ame i ntaudi a nsiku a Nzambi, kansi muna nitu, i ntaudi a nsiku a sumu.
