Tito 3:1-15
3 Ubasusumunanga vo basakalela yo lemvokela ayadi ye akwa wisa, bakubama muna salu yawonso yambote,
2 ke batianguni muntu ko, ngatu tantana, kansi bakala yo ntim’anleka, basonga lulembamu kwa wantu awonso.
3 Kadi oyeto mpe mazowa twateka kala, akolami, twavukumunwa yo bundunwa kwa maketo ye nkembo mia mpila mu mpila, twavanganga o bi, akwa kimpala twakala, angemi* yo mengaziana.
4 Kansi, vava kiasengomoka o walakazi wa Nzambi wa Mvuluzi eto yo zola kwandi muna wantu
5 (ke mu kuma kia mavangu ma ndungidi twavanga ko, kansi mu kuma kia nkenda zandi), watuvuluzila muna nsukula ina yatutwasila o moyo yo kutukitula se wantu ampa muna mwand’avelela.
6 Watuyitidila mwanda wau kuna mvevo muna Yesu Kristu wa Mvuluzi eto,
7 kimana vava tulungisilwa muna nsambu zandi, twakala se avingidi a vua mun’owu wa vuvu kia moyo a mvu ya mvu.
8 O mambu mama maziku, nzolele vo wasiamanana mo longa, kimana awana bekwikila muna Nzambi bakala ye tima dia vanga oma mambote. Mambu mama mambote ye mfunu mena kwa wantu.
9 Kansi, uyikenga muna mpaka za uzowa ye satulula tuvila, yo tantanena e Nsiku, kadi ke metwasanga nluta ko ye makondwa o mfunu.
10 Venga konso muntu otwasanga e mpambani, musungula avo olukisu mu nkumbu antete ye yanzole,
11 kadi muntu ndioyo ovengomokene muna nzil’a nsongi, osumukanga, e fu yandi ikuntumbanga.
12 Vava ikutumina Atema yovo Tukiko, vanga wawonso wiza wanana yame kuna Nikopole, kadi i kûna nzolele viokesela e nsungi a sivu.*
13 Vana lusadisu lwafwana kwa Sena, ona otomene zaya o Nsiku yo Apolo kimana balembi kondwa má muna nkangalu au.
14 Mpangi zeto mpe, yambula balongoka ovanga mavangu mambote kimana basadisanga ankaka muna ntangw’ampasi, balembi kala miolo.*
15 Awonso bena yame banutumini mavimpi. Zingula mavimpi kwa awana bekutuzolanga muna lukwikilu.
Yambula e nsambu zakala kwa yeno awonso.
Mvovo vana yand'a lukaya
^ I sia vo, wantu bevanganga oma masundidi o bi.
^ Yovo “mbangala.”
^ Yovo “lembi yima mbongo.”
