Yakobo 1:1-27
1 Yakobo, wa ntaudi a Nzambi yo Mfumu Yesu Kristu, kuna kwa makanda 12 mana mamwangana:
Mavimpi meno!
2 Ampangi zame, vava nuwanananga ye ntonta za mpila mu mpila, nubadikila dio se diakiese kikilu,
3 wau nuzeye wo vo, e ntonta zazi za lukwikilu lweno zitwasanga luzindalalu.
4 Vo i luzindalalu, yambula lwalunganesa e salu kiandi, kimana nwafwana yo zikuka muna mawonso, yo lembi kondwa má.
5 Dianu vo, avo mosi muna yeno okondelo ngangu, yambula kakwamanana lomba kwa Nzambi, ona ovaninanga kuna mvevo kw’awonso yo lembi semba, zivewa kwa yandi.
6 Kansi, yambula kalombelanga muna lukwikilu, ke mu lukatikisu ko, kadi ndiona okatikisanga una nze vuku dia kalunga ditumpaniswanga yo vevomonwa kwa tembwa.
7 O muntu a mpila yayi kabanzi ko vo má ketambula kwa Yave;
8 nkwa nyindu miole, yo lembi sikila muna ngienda zandi zawonso.
9 Kansi o mpangi una vo nsukami, yambula kayangalala* wau katundidikilu,
10 vo i mvuama yambula kayangalala wau kakulwilu, kadi ovempoka nze luvuma lwa mfuta.
11 Kadi wauna e titi ilengelelanga avo mbangazi a ntangwa ivaikidi yo sotola mvuma zandi, o vienga kwau mpe kwayifwila, i una mpe o mvuama kefwila muna salu yandi.
12 Nkwa nsambu ndiona ozindalalanga muna ntonta, kadi wau kesunda muna ntonta, otambula kolow’a moyo, ina Yave kasia o nsilu kw’awana bekunzolanga.
13 Ke vakadi muntu ko otontwa kavova vo: “Nzambi untontele.” Kadi Nzambi kalendi tontwa mu mambu mambi ko, ngatu yandi kibeni katonta muntu.
14 Kansi konso muntu otontwanga wau ketuntwanga yo vukumunwa* kwa zolela ya yandi kibeni.
15 E zolela avo iwokele, iwutidi e sumu; e sumu avo divangamene, diwutidi o lufwa.
16 Ke nuvunginikwa ko, e mpangi zame azolwa.
17 Konso lukau lwambote ye konso lukau lwalunga kuna ntandu lutukanga, kadi kwa Se dia ntemo a zulu lukulumukanga, ona kena ye soba-soba ko nze nzietomok’a kîni.*
18 Muna luzolo lwandi katuwutila muna diambu dia ludi, kimana twakala se ntomoni* muna vangwa yandi.
19 Nuzaya ediadi, mpangi zame azolwa: Konso muntu yambula kakala ye nzaki za wá, kansi kakadi ye nzaki za vova ko, kafungi mpe makasi mu nzaki ko,
20 kadi o makasi ma muntu ke metwasanga ndungidi a Nzambi ko.
21 Dianu vo, nuyambula usafu yo bi wawonso, nutambulwila kuna lulembamu e diambu dina dikuninu omo yeno edi dilenda kunuvuluza.*
22 Nukala avangi a diambu ke awe kaka ko, yo kuyivunginika muna ngindu zaluvunu.
23 Kadi avo muntu nwe a diambu kaka, kansi ke mvangi a diambu ko, una nze muntu otalanga e ndose andi muna pelo.*
24 Vava kayitadidi yo katuka, vana vau ovilakene owu kena.
25 Vo i ndiona okengelelanga muna nsiku a lunga utwasanga luvevoko yo kwamanana mo, ke nwe ona ovilakananga ko, kansi mvangi a diambu; okala ye kiese muna mana kevanganga.
26 Konso muntu obenze vo Nzambi kesambilanga,* kansi ke bindikanga lubini lwandi ko, ntim’andi kevunanga, e nsambil’andi mpe yampavala.
27 E nsambila ina yavelela yo kondwa usafu vana ndose a Nzambi wa Se dieto i yayi: lunga-lunga wan’ansona ye akento bafwila mayakala muna mpasi zau, yo kondwa e tona muna mambu ma nza.
Mvovo vana yand'a lukaya
^ Sina, “kayisana.”
^ Yovo “bakilwa muna nekwa.”
^ Yovo “ninga.”
^ Yovo “wantu antete.”
^ Yovo “vuluza mioyo mieno.”
^ Yovo “lumweno.”
^ Yovo “munkwikizi.”
