Yakobo 2:1-26
2 E mpangi zame, nga lukwikilu muna Mfumu Yesu Kristu wa nkembo eto nusimbininanga wau nusianga mpambula e?
2 Kadi avo muna lukutakanu lweno mukotele muntu ovuete mpeto za wolo muna nlembo ye mvuatu mikezimanga, i bosi mukotele mpe nsukami ovuete mvuatu mia mvindu,
3 nga ndiona ovuete mvuatu miankezimi nuluta zitisa yo kumvovesa vo, “Ongeye vuanda ova fulu kiambote,” yo vovesa mpe nsukami vo, “Telama ova” yovo “Vuanda ova nsikinw’a tambi yame”?
4 Avo i wau nuvanganga, nga ke mpambula ko nusianga vovo nwina e? Nga ke nukitukidi afundisi ko ana bebakanga nzengo zambi e?
5 Nuwa, e mpangi zame azolwa. Nga o Nzambi ke asukami ko kasola mun’owu wa nza kimana bavwamina muna lukwikilu yo vua Kintinu kina kasia o nsilu kw’awana bekunzolanga e?
6 Vo i yeno, nuvezele nsukami. Nga ke amvuama ko bekunubangikanga yo kununata kuna mbazi za nkanu e?
7 Nga ke yau ko betiangunanga e nkumbu ambote ina nwabokelelw’e?
8 Avo nulunda e nsiku a kintinu mun’owu wa sono: “Zola nkw’aku wauna okuyizolelanga,” diambote nuvanga.
9 Kansi avo nukwamanene sia mpambula, nusumukini, o nsiku usonga e ziku vo nu akuzuki.
10 Kadi ndiona olemvokelanga Nsiku wawonso, avo otele sakuba muna diambu dimosi, okulwidi Nsiku wawonso.
11 Kadi ndiona wavova vo, “Kute zumba ko,” wavova mpe vo, “Kuvondi ko.” Avo kutele zumba ko, kansi ovondele, nsiku okulwidi.
12 Nukwamanana vova yo vangila mambu mu mpila yayi nze awana befundisilwa muna nsiku a nkangu avevoka.*
13 Kadi ndiona olembi fwilanga ankaka e nkenda, ke fwilwa nkenda ko muna mfundisw’andi. E nkenda zilungisilwa muna mfundisa.
14 E mpangi zame, avo muntu ovovele vo una yo lukwikilu kansi wakondwa mavangu, nkia mfunu dina? Nga lukwikilu lwalu lulenda kumvuluza e?
15 Avo mpangi ayakala yovo ankento okondelo mvuatu* yo dia kwafwana muna lumbu,
16 mosi muna yeno umvovese vo, “Wendela kuna luvuvamu; yangalala yo yukuta,” kansi kamvene ko kina kavuidi o mfunu muna diambu dia nitu andi, ozevo nkia mfunu dina?
17 Diau adimosi mpe, o lukwikilu lwakondwa mavangu, lwafwa.
18 Kansi, wankaka ovova vo: “Ongeye una yo lukwikilu, omono ngina ye mavangu. Unsonga lukwikilu lwaku kondwa mavangu, omono ikusonga lukwikilu lwame muna mavangu mame.”
19 Nga okwikilanga vo vena ye Nzambi mosi e? Diambote ovanganga. Kadi e nkuya mpe bekwikilanga yo zakama.
20 Ongeye mpasi muntu, nga ozolele wo zaya vo lukwikilu lwakondwa mavangu ke luna mfunu ko e?
21 Abarayama wa se dieto, nga ke mu mavangu ko kalungisilwa vava kazola tambika Isaki wa mwan’andi vana ziku e?
22 Omwene wo vo lukwikilu lwandi lwasala kumosi ye mavangu mandi, o lukwikilu lwandi mpe muna mavangu lwazikukila,
23 kialungana e sono eki kivovanga vo: “Abarayama wakwikila muna Yave, diambadikilwa vo nsongi,” yo yikilwa vo nkundi a Yave.
24 Numwene wo vo muntu olungisilwa muna mavangu, ke mu lukwikilu kaka ko.
25 Diau dimosi mpe yo Rakabi wa nkembi*, nga ke mu mavangu ko kalungisilwa vava katoma tambula alangi yo kubasindikila muna nzila yankaka e?
26 Ozevo, wauna e nitu yakondwa mwanda* yafwa, o lukwikilu mpe lwakondwa mavangu, lwafwa.
Mvovo vana yand'a lukaya
^ Sina, “nsiku a luvevoko.”
^ Sina, “una nkonga.”
^ Yovo “munta-zumba.”
^ Yovo “fulumwinu.”
