Yakobo 3:1-18
3 Ke yeno awonso ko nufwete kala alongi,* e mpangi zame, wau tuzeye wo vo mfundisa isundidi onene tutambula.
2 Kadi yeto awonso nkumbu miayingi tutanga sakuba.* Avo muntu ke tanga sakuba ko muna mvovo, i muntu alunga, olenda bindika* nitu andi yawonso.
3 Avo tusidi bindikilwa muna nua mia mvalu kimana batulemvokela, tufila mpe nitu zau zawonso.
4 Tala mpe nzaza: Kanele vo zanene kikilu yo filakeswa kwa tembwa yangolo, zifilwanga kwa bindikilwa yandwelo kikilu konso kuna kazolele o mbindiki.
5 O lubini mpe kîkwa kiandwelo, kansi lukuyisananga muna mambu manene. Tala, fi tiya filenda yoka e futa kiampwena!
6 O lubini mpe i tiya. O lubini i nza ya vilwa vana vena e yîkwa yeto, kadi lusafulanga nitu yawonso. Lukwikanga tiya muna zingu kia muntu, o tiya twandi tutwasanga lufwasu nze Ngeena.*
7 E mpila zawonso za bulu ya futa, ye nuni, ye má yiyatatanga, ye mbizi za kalunga, zilemvolwa ye zilemvolwanga kwa wantu.
8 Kansi o lubini ke vena muntu ko olenda lo lemvola. Ke lulendi singikwa ko, lwambi kikilu, luzele ye nlongo mia mpondi.
9 Lwau tusanisina Yave, wa Se, lwau mpe tusibila wantu ana bavangilwa muna “fwaniswa kia Nzambi.”
10 Muna nua wau mosi i muvaikang’e nsambu ye sibu.
E mpangi zame, ke diansongi ko vo mambu mama mavangamena mu mpila yayi.
11 Nga muna nto imosi, mulenda vaika maza mambote* ye mandudi e?
12 E mpangi zame, nga nsanda ulenda yima olive yovo nsing’a vinyu wayima bundu ya nsand’e? Muna maza ma mungwa ka mulendi tuka maza mambote ko.
13 Nani i nkwa ngangu ye umbakuzi vovo nwina e? Muna nkadilu andi yambote, mbula kasonga mavangu mandi kuna lulembamu lutukanga muna ngangu.
14 Kansi avo lwina ye kimpala kia ndudi ye mpaka* muna ntima mieno, ke nuyisani ko yo vunina e ludi.
15 Ezazi ke ngangu zakulumuka kuna ntandu ko; za nza kaka, za wantu ye za nkuya.
16 Kadi, konso vana vena kimpala ye mpaka,* i vena mpe mvuanga ye mambu mawonso mambi.
17 Kansi e ngangu za ntandu, entete za velela, za luvuvamu, za ntim’anleka, nzaki muna lemvoka, zizele ye nkenda ye mbongo ambote, ke zisianga mpambula ko, ke za disu kunsi a lukaya ko.
18 Vo i mbongo a unsongi ikuninu muna luvuvamu, kw’awana bevanganga luvuvamu.
Mvovo vana yand'a lukaya
^ I sia vo, muna nkutakani.
^ Yovo “tuvanganga vilwa.”
^ Yovo “yala.”
^ Tala Nsas’a Mvovo.
^ Sina, “manzenzo.”
^ Dilenda kala mpe vo, “loko.”
^ Dilenda kala mpe vo, “loko.”
