Yakobo 4:1-17
4 Akweyi kutukanga e vita ye nzonzi vovo lwina? Nga ke mu zolela yeno ya nitu ko mutukanga nzonzi ye vita zinwananga omu yîkwa yeno e?
2 Luna ye tima, kansi yeno ke nuvue má. Nuvondanga yo lokokela, kansi yeno ke nuvue má. Nunwananga e vita yo zonza. Wau nulembele lomba, ke nutambula ko.
3 Vava nulombele, ke nutambwidi ko, kadi muna kani diambi nulombele, kimana nwasadila kina nulombele muna zolela yeno ya nitu.
4 E minta-zumba,* nga ke nuzeye wo ko vo, e kikundi ye nza i kitantu yo Nzambi e? I dianu vo, konso ndiona ozolele kala nkundi a nza uyikitwidi se mbeni a Nzambi.
5 Ovo, nubenze vo e sono mpavala kivovele vo: “O nyindu a kimpala owu wina omo yeto ukututelamesang’o moyo muna mambu mankaka e”?
6 Kansi e nsambu zina kevananga zisundidi. I dianu e sono kivovele vo: “Nzambi osidi akwa lulendo kitantu, vo i alembami ubavene nsambu.”
7 I dianu vo, nusakalela Nzambi; vo i Nkadi ampemba, nunsia kitantu, okunutina.
8 Nufinama Nzambi, oyandi mpe okunufinama. Nuvelelesa moko meno yeno asumuki, nuvelelesa ntima mieno yeno akwa lukatikisu.
9 Numona kikilu nkenda, ntantu yo dila. O tusevo tweno yambula twakituka se ntantu, e kiese kieno se dimbula e vuvu.
10 Nuyisakidika vana ndose a Yave, oyandi okunutundidika.
11 Ampangi, nuyambula kumbaziana. Konso ona okumba mpangi yovo fundisa mpangi andi, okumbidi o nsiku yo fundisa nsiku. Avo ofundisi nsiku, ku nlundi a nsiku ko, kansi u mfundisi.
12 Mosi kaka i Munsia-nsiku ye Mfundisi, ndiona olenda vuluza yo fwasa. Kansi ongeye u nani wafundisa nkw’aku?
13 Nuwá, oyeno nuvovele vo: “O unu yovo mbazi kwenda tukwenda kuna vata kingandi ye tukala kûna mvu amvimba, tukita yo baka nluta,”
14 ke nuzeye wo ko una ukala e zingu kieno o mbazi. Kadi nu mbungezi ina imonekene mu kolo kiandwelo, i bosi ivempokele kwandi.
15 Kansi nuvova vo: “Avo Yave ozolele wo, zinga tuzinga yo vanga oma yovo mana.”
16 Kansi owau, nuyisanini muna mambu ma yeno kibeni. O lusanu lwalu lwawonso lwambi.
17 Dianu vo, avo muntu ozeye vanga edi diambote, kansi kavangidi dio ko, sumu kwa yandi.
Mvovo vana yand'a lukaya
^ Yovo “yeno minkondwa-kwikizi.”
