Yakobo 5:1-20
5 Nuwá, yeno amvuama, nudila yo yayana muna mambu ma mpasi mekunulwakila.
2 E kimvuama kieno kikuyifwila, e mvuatu mieno midiwa kwa nselele.
3 O wolo weno ye palata ikituka se mbumbu, e mbumbu au ikala se kimbangi kwa yeno yo dia e nitu zeno. Ina nulundanga ikala se tiya muna lumbu yambaninu.
4 Tala, o mfutu una nwasimbinina wa asadi ana basadila muna mpatu zeno, ukazanga, e kazu kia asadi bevavanga lusadisu kilueke muna matu ma Yave a vu.
5 Nuzingilanga muna umvuama ye nkembo ova nza. Nuvongese ntima mieno muna lumbu kia mponda.
6 Nuyelese; nuvondele muntu ansongi. Nga ke kunusia kitantu ko e?
7 Ampangi, nuzindalala yamuna ngiz’a Mfumu. O mvati a nsengo ovingilanga mbongo yambote ya ntoto, ozindalalanga yavana kinoka e mvula zantete ye mvula zansuka.
8 Oyeno mpe nuzindalala; nusikidisa ntima mieno, kadi e ngiz’a Mfumu ifinamene.
9 Ampangi, ke nuyidimina muntu yo nkw’andi ko, kimana nwalembi fundiswa. O Mfundisi otelamene ova mwelo.
10 Ampangi, yambula e mpasi ye luzindalalu lwa angunza ana bavovela muna nkumbu a Yave, lwakala se mbandu kwa yeno.
11 Tubadikilanga ana bazindalala vo akwa nsambu.* Nwawá o luzindalalu lwa Yobi ye nsendo una Yave kamvana, numwene vo Yave nkwa walakazi wayingi ye nkenda.
12 Vana ntandu a mambu mawonso, ampangi zame, ke nudie nkutu ndofi ko, kana ya zulu yovo ya ntoto, ngatu ndofi yankaka. Kansi “Elo” eno yambula yakala elo, e “Ve” eno, ve, kimana nwalembi fundiswa.
13 Nga vena yo muntu omonanga mpasi vovo nwina? Yambula kasambanga. Nga vena yo muntu una ye kiese? Yambula kayimbila e nkunga.
14 Vena yo muntu oyelele vovo nwin’e? Yambula kabokela akuluntu a nkutakani, bansambidila yo kunkusa mazi muna nkumbu a Yave.
15 E sambu kia nkwa lukwikilu kisasula ndiona oyelele, o Yave okuntelamesa. Avo sumuka kasumukini, ololokwa.
16 Dianu vo, nufunguziana masumu yo sambidila muntu yo nkw’andi, kimana nwasasulwa. E ndodokela za muntu ansongi zivuidi nkuma.
17 Eliya muntu nze yeto kakala, kansi vava kadodokela vo valembi noka mvula, ke va noka mvula ko ova nsi mu mvu tatu ye ngonde sambanu.
18 I bosi wasamba diaka, e zulu dianoka e mvula, o ntoto wayima mbongo.
19 E mpangi zame, avo muntu ovengomokene muna ludi ye wankaka umvutulwisi,
20 nuzaya wo vo konso ona ovilula nsumuki muna bi wandi, okumvuluza* muna lufwa yo fuka ulolo wa masumu.
