Yoane 1:1-51
1 Muna lubantiku mwakala e Diambu, e Diambu diakala yo Nzambi, e Diambu diakala nzambi.
2 I yandi ndioyo wakala yo Nzambi muna lubantiku.
3 E lekwa yawonso muna yandi yavangilwa, ke vena eki kiavangwa ko kina kialembi vangilwa muna yandi.
Ina yavangilwa
4 muna yandi i mwakal’o moyo, o moyo wakala se ntemo a wantu.
5 O ntemo utemenanga muna tombe, e tombe ke kifukanga wo ko.
6 Vayiza muntu watumwa kwa Nzambi; nkumbu andi Yoane.
7 Wayiza se mbangi, kimana kasila ntemo umbangi, o wantu a mpila zawonso bakwikila muna yandi.
8 Ke yandi ko i ntemo, kansi ntemo kayiza sila umbangi.
9 O ntemo aludi una utemenanga wantu a mpila zawonso ufinamene kwiza ova nza.
10 Okedi ova nza, e nza yavangilwa muna yandi, kansi e nza ke yanzaya ko.
11 Muna nsi andi kayiza, kansi esi nsi andi ke bantambula ko.
12 Awonso ana bantambula, wabavana elau dia kala se wan’a Nzambi, kadi bakwikila muna nkumbu andi.
13 Bawutuka, ke mu menga ko yovo mu luzolo lwa nitu, ngatu mu luzolo lua muntu, kansi lwa Nzambi kaka.
14 E Diambu diakituka se nitu, wakala yeto, twamona nkembo andi, o nkembo nze una wa mwan’amosi kuna kwa se; wazala ye nsambu za Nzambi ye ludi.
15 (Yoane wansila umbangi, waboka oku vo: “I yandi yuna ngikidinge vo, ‘Ndiona okwiz’andandinge, umvitidi oku ntwala, kadi wateka zinga.’”)
16 Wau vo wazala ye nsambu, yeto awonso i dianu tutambulwilang’e nsambu ye nsambu.
17 Kadi o Nsiku muna Mose wavaninwa, e nsambu ye ludi muna Yesu Kristu kizìdi.
18 Ke vena nkutu muntu ko wamona Nzambi; nzambi mosi kaka, ona wina vana ndambu a Se,* i yandi wansengomona.
19 I wau wuwu o umbangi kasia Yoane vava Ayuda batuma anganga ye Alevi kuna Yerusaleme, benda kunyuvula vo: “Ongeye u nani?”
20 Kavakwidi wo nkalu ko, otambulwidi wo, oku vo: “Ke mono ko i Kristu.”
21 Banyuvuidi vo: “Ozevo, ngeye u Eliya e?” Ovutwidi vo: “Ke mono ko.” “Ngeye u Ngunz’e?” Ovutwidi vo: “Ve!”
22 Bamvovese vo: “Ongeye u nani? Utuzayisa kimana twavana mvutu kw’awana batutumini. Adieyi ovovele mu kuma kia ngeye kibeni?”
23 Ovovele vo: “Omono i nding’a muntu obokanga muna makanga, oku vo, ‘Nusingika nzila za Yave,’ wauna kavova Yesaya wa ngunza.”
24 Wantu awana batumwa, Afarisi bakala.
25 Banyuvuidi vo: “Ozevo, ekuma ovubilanga, avo ke ngeye ko i Kristu yovo Eliya, ngatu Ngunza?”
26 Yoane ubavutwidi vo: “Omono muna maza ivubilanga. Vovo nwina vatelamene ona nulembele zaya,
27 ndiona okwiza ndandila, ona kiafwana kutulula nsinga mia nsampatu zandi ko.”
28 Mambu mama mavangama kuna Betania, kuna simu dia Yodani, kuna kwavubilanga Yoane.
29 Muna lumbu kialanda, omwene Yesu okwizanga oku kena, ovovele vo: “Tala Mwana meme a Nzambi, on’okatula e sumu dia nza!
30 I yandi yuna ngikidinge vo: ‘O muntu okwiza ndandila, umvitidi oku ntwala, kadi wateka zinga.’
31 Wau vo kinzeye kwame ko, i diau ngizidi avubila muna maza kimana kasengomoka kwa Isaele.”
32 Yoane osidi mpe umbangi, oku vo: “Yamwene mwanda ukulumukini kuna zulu nze yembe, wizidi kala vana yandi.
33 Wau vo kinzeye kwame ko, Ndiona wantuma yavubila muna maza, yandi wampovesa vo: ‘Konso ona omona okulumukina mwanda yo kala vana yandi, i yandi ndiona ovubila muna mwand’avelela.’
34 Yamona wo, yasia umbangi vo yandi i Mwan’a Nzambi.”
35 Muna lumbu kialanda, Yoane otelamene y’alongoki andi wole,
36 wau katadidi Yesu okangalanga, ovovele vo: “Tala Mwana meme a Nzambi!”
37 Alongoki yau awole vava bawidi mana kavovele, balende Yesu.
38 I bosi, Yesu ovilukidi, ubamwene vo yandi belandanga, ubavovese vo: “Adieyi nuzolele?” Bamvovese vo: “E Rabi (i sia vo, “Nlongi”), akweyi okalanga?”
39 Ubavovese vo: “Nwiza, nwatala.” Bele, bamwene kuna kekalanga, bakedi yandi muna lumbu kiakina; mu tezo kia ola ya kumi* diavangama.
40 Andere wa nleke a Simone Petelo, mosi muna nwole ana bawa owu wavova Yoane yo landa Yesu.
41 Entete osolwele Simone wa mpangi andi, umvovese vo: “Tusolwele Masia” (i sia vo, “Kristu”),
42 untwese kwa Yesu. O Yesu vava kantadidi, ovovele vo: “Nge i Simone wa mwan’a Yoane; oyikilwa vo, Kefa” (yasekolwa vo, “Petelo”).
43 Muna lumbu kialanda, Yesu ozolele kwenda kuna Ngalili. Osolwele Filipo, umvovese vo: “Undanda.”
44 Filipo mwisi Betesaida kakala, kuna vata dia Andere yo Petelo.
45 Filipo omwene Natanaele, umvovese vo: “Tusolwele ona wayikwa kwa Mose muna Nsiku ye kuna kwa Angunza: Yesu wa Nazarete, wa mwan’a Yosefe.”
46 Kansi, Natanaele umvovese vo: “Nga muna Nazarete mulenda tuka má kiambote e?” Filipo umvovese vo: “Wiza tala.”
47 Yesu omwene Natanaele okwizang’oku kena, ovovele mu kuma kiandi vo: “Tala Nyisaele akieleka, muna yandi ke muna umpûki ko.”
48 Natanaele umvovese vo: “Aweyi unzayidi?” Yesu umvutwidi vo: “Vava kwabokelo kwa Filipo ko, ekolo okedi kuna nsi a nsanda, yakumona.”
49 Natanaele umvutwidi vo: “E Rabi, ngeye u Mwan’a Nzambi, ngeye u Ntinu a Isaele.”
50 Yesu umvutwidi vo: “Nga okwikidi wau ivovese vo yakumona kuna nsi a nsand’e? Osinga mona mambu maviokele omama.”
51 Umvovese diaka vo: “Kieleka, kieleka, inusamunwini vo, numona zulu diziuka ye mbasi za Nzambi zitomboka yo kulumuka kwa Mwan’a muntu.”
Mvovo vana yand'a lukaya
^ Yovo “vana tulu kia Se.” Ediadi disongele vo fulu kiamfunu kikilu.
^ I sia vo, tezo kia ola ya 16.
