Yoane 10:1-42
10 “Kieleka, kieleka, inusamunwini vo, ona olembi kotela muna mwelo a mpak’a mameme, kakotela kwankaka, yandi i mwivi ye nsanzi.
2 Kansi, ndiona okotela muna mwelo, yandi i mvungudi a mameme.
3 Nemwelo okunziulwila, o mameme mewa nding’andi. Obokela mameme mandi muna nkumbu yo fila mo kuna mbazi.
4 Avo ovaikisi mawonso, okubavita kuna ntwala, o mameme mekunlanda, e kuma kadi mazeye nding’andi.
5 Ke malendi landa nzenza ko, tina kaka mekuntina, e kuma kadi ke mazeye nding’a nzenza ko.”
6 Yesu ubatelele kingana kiaki, kansi oyau, ke babakwidi ko dina kabavovese.
7 Muna kuma kiaki, Yesu ubavovese diaka vo: “Kieleka, kieleka, inusamunwini vo, mono i mwelo a mameme.
8 Awonsono ana bayizila muna nkumbu ame, mivi ye asanzi; muna diadi o mameme ke mabawila ko.
9 Mono i mwelo; konso ona okotela omu mono, ovuluzwa, okota yo vaika, osolola madilu.
10 O mwivi ke kwizilanga mu kuma kiakaka ko, kansi kayiya, kavonda yo fwasa. Omono yayiza kimana nwavua o moyo, nwavua wo emvimba.
11 Mono i mvungudi ambote; o mvungudi ambote oyekola moyo andi muna wete dia mameme.
12 O nsadi ona ofutwanga, wina vo ke mvungudi ko, o mameme mpe ke mandi ko, avo omwene dievua dikwiza, osisidi o mameme, otinini—dievua dibakidi mo, dibamwanganese—
13 wau vo futwa kefutwanga, ke sianga ntim’andi muna mameme ko.
14 Mono i mvungudi ambote. Nzeye mameme mame, mameme mame mpe manzeye,
15 wauna kanzayidi o Se, omono mpe i una nzayidi o Se; ngiekwele moyo ame muna wete dia mameme.
16 “Mameme mankaka mpe ngina mau, mana ke ma mpaka yayi ko; itwasa mo mpe omwamu, mewa nding’ame, mekala e kambi dimosi, mvungudi mosi.
17 I kuma o Se kanzolèle, kadi iyekola moyo ame, kimana yabonga wo diaka.
18 Ke vena muntu ko okunkatula wo, kansi mono kibeni iyekola wo. Wisa ngina kiau kia yekola wo, wisa mpe ngina kiau kia bonga wo diaka. O nkanikinu wau kwa Se diame ntambwidi wo.”
19 Ayuda bavambanene diaka muna mambu mama.
20 Ayingi vana bena bavovele vo: “Nkuya kena wau, olaukidi. Ekuma nukunwilanga?”
21 Ankaka bavovele vo: “E mvovo miami ke mia nkwa nkuya ko. O nkuya, nga lenda temona meso ma mpofo e?”
22 Muna kolo kiakina, mwakala e Lambu dia Nsunzul’a Tempelo muna Yerusaleme. Nsungi a kiozi yakala,
23 o Yesu wakangalanga muna tempelo, vana veta kia Solomo.
24 Ayuda bezidi kunzunga, bamvovese vo: “Nkia kolo okututelames’o ntima? Avo ngeye i Kristu, toma wo kutusamunwina.”
25 Yesu ubavutwidi vo: “Yakunusamunwina wo, yeno ke nukwikila. O mavangu mana ivangilanga muna nkumbu a Se diame, i mau mekunsilanga umbangi.
26 Kansi yeno ke nukwikila, e kuma kadi, ke nu mameme mame ko.
27 O mameme mame mewanga nding’ame, omono nzeye mo, mekundandanga.
28 Omono ikubavana moyo a mvu ya mvu, ke mekuyifwila ko yakwele mvu, ke vena ona okutumuna mo ko omu moko mame.
29 O Se diame kina kampene kisundidi yawonso, ke vena ona olenda mo kutumuna ko muna moko ma Se.
30 Omono yo Se diame tu mosi.”*
31 Ayuda babongele diaka matadi bantuba mo.
32 Yesu ubavutwidi vo: “Mavangu mayingi mambote ma Se diame yanusonga. Mu nkia vangu nukuntubila matadi?”
33 Ayuda bamvutwidi vo: “Ke tukutubila matadi mu kuma kia vangu diambote ko, kansi muna ntianguna otiangwini Nzambi; kadi ongeye, u muntu, kansi uyikitwidi se nzambi.”
34 Yesu ubavutwidi vo: “Ke wau ko wasonama muna Nsiku eno, ‘Mpovele vo: “Nu zinzambi”’?*
35 Avo yandi wabayikila vo “nzambi” ana batumbwa kwa diambu dia Nzambi—e sono ke kilendi vunzunwa ko—
36 Omono yavaulwa kwa Se yo tumwa ova nza, adieyi numpovesele vo, ‘Otiangwini Nzambi,’ wau mpovele vo, ‘i Mwan’a Nzambi e’?
37 Avo ndembele vanga mavangu ma Se diame, ke nukunkwikila ko.
38 Kansi avo mvangidi mo, kanele vo nulembi kunkwikila, nukwikila o mavangu mama, kimana nwazaya yo toma visa vo o Se wina yame ntwadi, omono mpe ntwadi ngina yo Se.”
39 Bavavidi diaka kumbaka, kansi okutumukini muna moko mau.
40 Okatukidi, wele diaka kuna simu dia Yodani, kuna Yoane kateka vubila wantu, i kuna kanangina.
41 Wantu ayingi bezidi kwa yandi, bavovele vo: “O Yoane kavanga nkutu sinsu ko, kansi mawonso kavova mu kuma kia muntu ndioyo, maludi.”
42 Ndonga bakwikila muna yandi kwakuna.
