Yoane 11:1-57
11 Kwakala muntu wayela nkumbu andi Lazaro; mwisi Betania, kuna vata dia Maria yo mpangi andi Mareta.
2 Maria yandi wakusa o Mfumu mazi mansunga yo kunguna malu mandi muna nsuki zandi; o Lazaro wa mpangi andi i wayela.
3 Dianu nsanga zandi bantwikidi nsangu, oku vo: “E Mfumu, ndiona ozolanga oyelele.”
4 Kansi o Yesu vava kawidi wo, ovovele vo: “O yela kwaku ke kwafwila ko, kansi nkembo a Nzambi kutwasa, kimana o Mwan’a Nzambi kakembelèlwa mo.”
5 Yesu wazolanga Mareta, Maria yo Lazaro.
6 Kansi, vava kawa vo Lazaro oyelele, onangini diaka lumbu yole kuna kakala.
7 I bosi, ovovese alongoki vo: “Tuvutuka kuna Yuda.”
8 Alongoki bamvovese vo: “E Rabi, ke kolo ko Ayuda bavavidi kutuba matadi, i kuna diaka ozolele vutuk’e?”
9 Yesu ovutwidi vo: “Nga ke mwina ola 12 ko muna mwini e? O muntu, avo mu mwini kekangala, keta sakuba ko, e kuma kadi ntemo a nza yayi kemonanga.
10 Kansi, o muntu avo mu fuku kekangala, sakuba keta, e kuma kadi o ntemo ke wina mu yandi ko.”
11 Vava kavovele mambu mama, ovovele diaka vo: “O nkundi eto Lazaro olele, kansi kûna ikwenda yansikamesa.”
12 Ozevo, alongoki bamvovese vo: “E Mfumu, wau vo leka kalele, sasuka kesasuka.”
13 O Yesu lufwa lwandi kayikidi. Kansi oyau, edi babenze vo leka tulu kayikidi.
14 I bosi, Yesu otomene kubakiesesa vo: “Lazaro wafwidi,
15 ngiangalele muna diambu dieno wau vo kiakele ko kwame ko, kimana nwakwikila. Kansi yambula twenda kwa yandi.”
16 O Toma ona wayikilwanga vo, Dipasa, ovovese akw’andi alongoki vo: “Twenda mpe, kimana twafwa yandi.”
17 O Yesu vava kaluaka, Lazaro se lumbu yá kakala muna ziami.
18 E Betania lukufi yakala ye Yerusaleme, tezo kia kilometa tatu.*
19 Ayuda ayingi bezidi kwa Mareta yo Maria mu kubafiaulwisa muna diambu dia mpangi au.
20 O Mareta vava kawidi wo vo Yesu se keluaka, wele kunkika; kansi Maria ovuende kwandi muna nzo.
21 O Mareta ovovese Yesu vo: “E Mfumu, kele vo wakala vava, o mpangi ame nga kafwidi ko.
22 Kana nkutu owau nzeye wo vo, konso dina olomba kwa Nzambi, o Nzambi okuvana dio.”
23 Yesu umvovese vo: “O mpangi aku fuluka kefuluka.”
24 Mareta umvovese vo: “Nzeye wo vo ofuluka muna lufuluku muna lumbu kia mbaninu.”
25 Yesu umvovese vo: “Mono i lufuluku yo moyo. Ndiona okwikilanga omu mono, kana nkutu ofwidi, moyo diaka kekala;
26 konso ona mpe win’o moyo, okwikilanga omu mono, kefwa nkutu ko yakwele mvu. Nga okwikidi wo e?”
27 Umvovese vo: “Ingeta, e Mfumu, ikwikilanga wo vo nge i Kristu wa Mwan’a Nzambi, ona okwiza ova nza.”
28 Vava kavovele wau, wele kwandi, obokele nleke andi Maria kuna sweki, oku vo: “O Nlongi olueke, ngeye kabokele.”
29 Vava kawidi wo, otelamene mu nzaki, wele kwa yandi.
30 O Yesu kayiluakidi muna vata ko, kansi okedi kaka vana kawananina yo Mareta.
31 Ayuda ana bena yo Maria muna nzo, bekumfiaulwisanga, vava bamwene vo otelamene mu nzaki, ovaikidi, banlende, edi babenze vo wele didila kuna ziami.
32 O Maria omwene Yesu, wele vana kena, obwidi vana malu mandi, umvovese vo: “E Mfumu, kele vo wakala vava, o mpangi ame nga kafwidi ko.”
33 O Yesu vava kamwene Maria odilanga, Ayuda mpe ana bezidi yandi bedilanga, ovumukini muna ntima,* o moyo andi utelamene.
34 Ovovele vo: “Akweyi nunsidi?” Bamvovese vo: “E Mfumu, wiza tala.”
35 Yesu obetomwene kinsanga.
36 Ayuda bavovele vo: “Tala, zola kikilu kanzolelenge!”
37 Kansi ankaka vana bena bavovele vo: “Ondioyu i watemona meso ma mpofo, ekuma kantanini ko kalembi fwa?”
38 I bosi, Yesu ovumukini diaka, wizidi kuna ziami. Nduka* wakala, tadi diayekekwa mo.
39 Yesu ovovele vo: “Nukatul’e tadi.” O Mareta wa nsang’a ndiona wafwa, umvovese vo: “E Mfumu, owau se nsudi ketá, kadi lumbu yà iviokele kala.”
40 Yesu umvovese vo: “Nga kivovese wo ko vo, avo okwikila omona nkembo a Nzambi e?”
41 Dianu vo, bakatwidi e tadi. Yesu osengwele meso oku zulu, ovovele vo: “E Tata, ntondele wau ungwidi.
42 Nzeye wo vo e lumbu yawonso okungwanga; kansi muna diambu dia ndonga eyi inzietele i mpovèle wo, bakwikila vo ngeye wantuma.”
43 Vava kavovele mambu mama, obokele muna nding’angolo, oku vo: “E Lazaro, vaika!”
44 O muntu ona wafwa ovaikidi, o malu yo moko mandi mazingwa nlele, o luse luandi mpe luakangwa nlele. Yesu ubavovese vo: “Nunkutulula, nunyambula kenda.”
45 Ayuda ayingi, ana bayiza kwa Maria yo mona dina kavangidi, bakwikidi muna yandi,
46 kansi ankaka vana bena, bele kuna kwa Afarisi, babasamunwini dina kavangidi o Yesu.
47 Nganga zambuta ye Afarisi balungalakese Mbazi a Nkanu* yawonso, bavovele vo: “Aweyi tuvanga, kadi muntu ndioyo sinsu yayingi kevanganga?
48 Avo tunyambwidi, ozevo wantu awonso bekwikila muna yandi, esi Roma mpe bekwiza baka fulu* kieto ye nsi eto.”
49 Kansi mosi vana bena, Kayafa ona wakala ngang’ambuta muna mvu wauna, ubavovese vo: “Oyeno ke nuzeye diambu ko,
50 ngatu zaya vo muntu mosi ofwa muna wete dia nkangu, ke mu zula kiawonso ko kiafwaswa.”
51 Kansi, ediadi ke mu ngindu za yandi kibeni ko kavovèle dio, kansi wau kakala ngang’ambuta muna mvu wauna, osakwidi vo Yesu ofwa mu kuma kia zula,
52 ke mu kuma kia zula kaka ko, kansi kakutakesa mpe vamosi wan’a Nzambi, ana bamwangana.
53 Dianu vo, tuka muna lumbu kiakina bawizanene kimana bamvonda.
54 Yesu kakangalanga diaka va ndonga ko vana vena Ayuda, okatukidi ko, wele kuna zunga kifinamene makanga, kuna vata dina ye nkumbu a Eferaime, i kuna kanangina ye alongoki andi.
55 E Nduta ya Ayuda ifinamene, ayingi muna esi nsi batombokele kuna Yerusaleme, una ke kiakedi Nduta ko, kimana bayivelelesa mun’owu wa nsiku.
56 Bavavidi Yesu, wau batelamene muna tempelo bavovazianene vo: “Adieyi nubenze? Ke kwiza ku lambu ko e?”
57 Kansi, nganga zambuta ye Afarisi basidi nkanikinu vo konso muntu ozeye kuna kena Yesu, kazayisa wo, kimana bambaka.
Mvovo vana yand'a lukaya
^ Sina, “tezo kia stadia 15.”
^ Sina, “muna mwanda.”
^ Yovo “Nduzu.”
^ Sina, “Sanedina.” Tala Nsas’a Mvovo.
^ I sia vo, tempelo.
