Yoane 13:1-38
13 Vava ke kiakedi e lambu dia Nduta ko, Yesu ozeye wo vo e ntangw’andi ifwene kakatuka ova nza yayi, kenda kwa Se, wau kazolele alandi andi ana bakedi ova nza, ubazolele yakuna nsuka.
2 Ekolo bedianga nlekelo, o Nkadi ampemba wateka sia muna ntim’a Yuda mwisi Kereote wa mwan’a Simone, e ngindu za kunyekola.
3 O Yesu wau kazeye wo vo o Se oyekekele lekwa yawonso vana moko mandi, kwa Nzambi katuka, kwa Nzambi mpe kekwenda,
4 otelamene vana nlekelo, okatwidi yunga kiandi. Obongele twaya, ozingidi dio muna luketo.
5 I bosi, osidi maza muna longa, oyantikidi sukula malu m’alongoki yo kunguna mo muna twaya dina kayizingidi.
6 I bosi, olueke kwa Simone Petelo. Umvovese vo: “E Mfumu, ngeye osukula malu mame?”
7 Yesu umvutwidi vo: “Edi ivanganga, owau kubakula dio ko, kansi obakula dio vava kivioka e mambu mama.”
8 Petelo umvovese vo: “Kulendi sukula malu mame ko.” Yesu umvutwidi vo: “Avo kisukwidi malu maku ko, kuna yame ntwadi ko.”
9 Simone Petelo umvovese vo: “E Mfumu, kusukula kaka malu mame ko, kansi yo moko mpe yo ntu ame.”
10 Yesu umvovese vo: “Konso ona oyowele, kavuidi mfunu akuyisukula ko, nanga malu mandi kaka, kadi watoma velela kwandi. Oyeno nwavelela, kansi ke yeno awonso ko.”
11 Kadi wazaya ona okunyekola. Kiaki i kuma kavovèle vo: “Ke yeno awonso ko nwavelela.”
12 Vava kamene sukula malu mau yo vuata yunga kiandi, ovuende diaka kuna meza, ubavovese vo: “Nga nubakwidi dina inuvangidi e?
13 Oyeno nukungikilanga vo, ‘Nlongi’ ye ‘Mfumu,’ nulungidi kweno, kadi i ngina wowo.
14 Dianu vo, omono avo i Mfumu ye Nlongi, nsukwidi malu meno, oyeno mpe nufwete* sukuziana malu.
15 Kadi inuvene e mbandu, wauna inuvangidi, i nufwete vanganga mpe.
16 Kieleka, kieleka, inusamunwini vo, o ntaudi kaviokele mfumu andi o nene ko, ngatu o ntumwa kavioka ona wantuma.
17 Avo nuzeye mambu mama, nu akwa nsambu avo nuvanga mo.
18 Kiyikidi yeno awonso ko; ibazeye ana yasola. Kansi ngikidi wo kimana e sono eki kialungana: ‘Ona wadianga mbolo ame unzangwidi bombo kia kulu.’*
19 Tuka owau, inusamunwini wo, una ke wavangamene ko, kimana vava uvangama nwakwikila vo i mono yuyu.
20 Kieleka, kieleka, inusamunwini vo, konso ona otambula ona ntumini, mono mpe ketambula. Konso ona okuntambula, otambula mpe Ndiona wantuma.”
21 Yesu vava kavovele mambu mama, otelameno o moyo, osidi umbangi, oku vo: “Kieleka, kieleka, inuvovese vo, mosi vovo nwina okungiekola.”
22 Alongoki bayantikidi talaziana, kadi ke bazeye ko kana nani kayikidi.
23 Mosi muna alongoki andi, ona o Yesu kazolanga, vana ndambu* a Yesu kavuandila.
24 Simone Petelo unlaulwidi, umvovese vo: “Utusamunwina nani kayikidi.”
25 Yandi oyekamene vana tulu kia Yesu, umvovese vo: “E Mfumu, nani ndioyo?”
26 Yesu ovutwidi vo: “I yandi yuna ivana tini kia mbolo kina ivungila muna longa.” Una kavungidi e mbolo, ovene yo kwa Yuda wa mwan’a Simone wa mwisi Kereote.
27 Vava Yuda katambwidi e mbolo, Satana okotele muna yandi. Yesu umvovese vo: “Dina ovanga, vanga dio mu nzaki.”
28 Kansi, ke vakedi mosi ko kuna meza ozeye e kuma kamvovesele wo.
29 Kadi ankaka babenze vo, wau vo Yuda wakala ye nkel’a nzimbu, Yesu wamvovesa vo: “Sumba kina tuvuidi o mfunu mu lambu,” yovo kavana má kwa asukami.
30 Vava katambwidi e mbolo, vana vau ovaikidi kuna mbazi. Ozevo, se fuku.
31 Vava kavaikidi, Yesu ovovele vo: “Owau Mwan’a muntu okembeswa, o Nzambi mpe okembeswa muna yandi.
32 Nzambi yandi kibeni okunkembesa, okunkembesa vana vau.
33 E wan’ame anzolwa, kolo kiakete ikala yeno. Nukumpava; wauna yavovesa Ayuda vo, ‘Kuna nkuenda, oyeno ke nulendi ko kwiza ko,’ owau kwa yeno mpe mpovele wo.
34 Nkanikinu ampa inuvene, nuzolaziana; wauna inuzolele, i una mpe nuzolazianina.
35 Muna wau i bezayila o wantu awonso vo nu alongoki ame—avo nzolani nuna yau.”
36 Simone Petelo umvovese vo: “E Mfumu, akweyi okwenda?” Yesu ovutwidi vo: “Kuna nkwenda, kulendi kwiza ndandi owau ko, kansi se wiza ndandi kuna sentu.”
37 Petelo umvovese vo: “E Mfumu, ekuma kilendi kulandila owau ko? Moyo ame iyekola wo muna wete diaku.”
38 Yesu umvutwidi vo: “Moyo aku oyekola muna wete diame? Kieleka, kieleka, ivovese vo, e nsusu ke ikuyikokolwela ko yavana okumpanina nkalu nkumbu tatu.”
Mvovo vana yand'a lukaya
^ Yovo “oyeno mpe luna ye mbebe ya.”
^ Yovo “okitukidi se ntantu ame.”
^ Sina, “vana tulu kia.”
