Yoane 14:1-31
14 “Ke nutelamwa mioyo ko. Nukwikila muna Nzambi; nukwikila mpe omu mono.
2 Muna nzo a Se diame fulu yayingi ina mo. Avo ke wau ko, nga inusamunwini wo, muna kuma kiaki kwenda ikwenda yanukubikil’e fulu.
3 Avo ngiele kunukubikil’e fulu, se yavutuka yanutambula, kimana konso kuna ikala, oyeno mpe nwakala ko.
4 Kuna ikwenda, e nzila nuzeye yo.”
5 O Toma umvovese vo: “E Mfumu, kuna okwenda ke tuzeye ko ko. Aweyi tulenda zayila e nzila?”
6 Yesu umvovese vo: “Mono i nzila ye ludi yo moyo. Ke vena ona okwiza kwa Se ko avo ke mu mono ko.
7 Kele vo nunzaya, nwadi zaya mpe o Se diame; tuka owau, nunzeye yo kumona.”
8 Filipo umvovese vo: “E Mfumu, utusonga o Se, i diau kaka tuzolele.”
9 Yesu umvovese vo: “E Filipo, kolo kiayingi se ngina yeno, kunzeye kaka ko e? Konso ona umbwene, omwene mpe o Se. Adieyi ovovele vo, ‘Utusonga o Se’?
10 Nga kukwikidi wo ko vo ntwadi ngina yo Se, o Se mpe una yame ntwadi? Mana inuvovese, kivovele mo mu ngindu za mono kibeni ko, kansi o Se ona okalanga yame ntwadi, ovanganga mavangu mandi.
11 Nunkwikila vo ntwadi ngina yo Se, o Se mpe una yame ntwadi; avo ke wau ko, nukwikila mu kuma kia mavangu mame.
12 Kieleka, kieleka inusamunwini vo, konso ona okwikilanga omu mono, ovanga mpe mana ivanganga; ovanga nkutu mana masundidi o mama, kadi se nkwenda kwa Se.
13 Konso dina nulomba muna nkumbu ame, ivanga dio, kimana o Se kakembeselwa muna Mwana.
14 Avo nulombele má muna nkumbu ame, ikunuvana kio.
15 “Avo nunzolele, nulunda nkanikinu miame.
16 Se yalomba kwa Se kanuvana nsadisi* ankaka kakala yeno yakwele mvu,
17 o mwand’a ludi, e nza ka ilendi wo tambula ko, kadi ke imonanga wo ko ngatu zaya wo. Oyeno nuzeye wo, kadi una yeno, omu yeno ukalanga.
18 Kilendi kunusisa kinsona ko. Ikwiza kwa yeno.
19 Ke kolo ko e nza ke ikumbona diaka ko, kansi oyeno nukumbona, kadi ngina o moyo, oyeno mpe nukal’o moyo.
20 Muna lumbu kiakina nuzaya wo vo ntwadi ngina yo Se diame, oyeno mpe nuna yame ntwadi, omono mpe ngina yeno e ntwadi.
21 Konso ona una ye nkanikinu miame yo lunda mio, i yandi unzolele. Konso ona unzolele, o Se diame mpe okunzola, omono ikunzola, ikuyisengomona kwa yandi.”
22 O Yuda, ke ndiona wa mwisi Kereote ko, umvovese vo: “E Mfumu, adieyi dibwidi ozolele kuyisengomona kwa yeto kansi ke kwa nza ko e?”
23 Yesu umvutwidi vo: “Avo muntu unzolele, e diambu diame olunda dio, o Se diame okunzola, tukwiza kwa yandi, twakala yandi.
24 Konso ona olembi kunzola, ke lunda mambu mame ko. E diambu dina nuwidi ke diame ko, kansi dia Se diame ona wantuma.
25 “Yanuvovesa mambu mama ekolo yakedi yeno.
26 Kansi o nsadisi, o mwand’avelela, una o Se ketuma muna nkumbu ame, ukunulonga mambu mawonso yo kunusungamesa mawonso inuvovese.
27 Luvuvamu inusisìdi; inuvene luvuvamu lwame. Kinuvanini lo wauna e nza ivaninanga lo ko. Ke nutelamwa moyo ko ngatu mona wonga.
28 Nuwidi una inuvovese vo, ‘kwenda nkwenda, i bosi ivutuka kwa yeno.’ Avo nunzolele, nuyangalala wau vo kwa Se ikwenda, kadi o Se unsundidi.
29 Inuvovese wo una ke wavangamene ko, kimana vava uvangama, nwakwikila.
30 Kikunuvovesa diaka mayingi ko, kadi o nyadi a nza mu kwiza kena, kena ye wisa ko omu mono.
31 Kansi, e nza yazaya wo vo nzolele o Se, wauna o Se kankanikina i wau mvanga. Nutelama, twenda kweto.
Mvovo vana yand'a lukaya
^ Yovo “mfiaulwisi.”
