Yoane 15:1-27
15 “Mono i nsing’a vinyu aludi, o Se diame i mvati.
2 Konso tayi kina omu mono kilembi yima bundu zenga kezenga kio, konso kina kiyima bundu vangila kevangila* kio kimana kiatoma yima.
3 Oyeno nuvelele kala mu kuma kia diambu dina inuvovese.
4 Nukala yame ntwadi, omono ikala yeno e ntwadi. Nze una tayi ke ilendi yima bundu ko avo ke ina mu nsing’a vinyu ko, oyeno mpe ke nulendi yima bundu ko avo ke nuna yame ntwadi ko.
5 Mono i nsing’a vinyu; oyeno nu tayi. Konso ona okala yame ntwadi, omono mpe ikala yandi e ntwadi, oyima bundu yayingi; kadi avo ke nuna omu mono ko ke nulendi vanga diambu ko.
6 Konso ona olembi kala yame e ntwadi, vetwa kevetwa nze tayi, kayuma. O wantu bekutakesa tayi yayina batuba yo vana tiya, yavia.
7 Avo nukala yame e ntwadi ye diambu diame mpe diakala omo yeno, konso dina nulomba divangama kwa yeno.
8 O Se diame okembeselwa muna diadi, kimana nwakwamanana yima bundu yayingi yo songa vo nu alongoki ame.
9 Wauna o Se diame kanzolele, omono mpe i una inuzolele; nusikila muna zola kwame.
10 Avo nulunda nkanikinu miame, nusikila muna zola kwame, wauna omono ilundilanga nkanikinu mia Se diame yo sikila muna zola kwandi.
11 “Inuvovese mambu mama, kimana e kiese kiame kiakala omo yeno, e kiese kieno kialunga.
12 I nkanikinu ame wau, nuzolaziananga wauna inuzolele.
13 Ke vena muntu ko wina ye nzola isundidi yayi, i sia vo muntu kayekola moyo andi muna wete dia akundi andi.
14 Oyeno nu akundi ame avo nuvangidi oma inukanikini.
15 Kikunuyikila diaka ntaudi ko, kadi ntaudi kazeye ko mana kevanganga mfumu andi. Kansi inuyikidi se akundi, kadi inuvovese mawonso yawa kwa Se diame.
16 Ke yeno ko nunsolele, kansi mono inusolele kimana nwakwamanana yima bundu, e bundu eno yakala yakwele mvu, kimana konso mana nulomba kwa Se muna nkumbu ame, kanuvana mo.
17 “Inukanikini mambu mama kimana nwazolaziana.
18 Avo nza ikunumenga, nuzaya wo vo mono yateka menga.
19 Kele vo nukala nwa nza, e nza yadi zola eyandi. Wau vo ke nwa nza ko, kansi mono inusolele ova nza, muna diadi e nza ikunumenga.
20 Nusungamena edi inuvovese vo: O ntaudi kasundidi mfumu andi ko. Avo bambangika, oyeno mpe bekunubangika; avo balunda e diambu diame, e diambu dieno mpe belunda dio.
21 Bekunuvanga mambu mama mawonso muna diambu dia nkumbu ame, kadi Ndiona wantuma ke banzeye ko.
22 Kala vo kiayiza ko yabavovesa, ke badi sumuka ko. Kansi owau ke balendi vakula nkalu ko muna sumu diau.
23 Konso ona umbengene, omengene mpe o Se diame.
24 Kala vo kiavanga ko vana bena o mavangu mana ke masidi vanga muntu ko, ke badi nata sumu ko; kansi owau bambwene, bambengene kumosi yo Se diame.
25 Kansi, ediadi divangamene kimana dialungana dina diasonama muna Nsiku au vo: ‘Bambengene kondwa kuma.’
26 Vava keluaka o nsadisi ona ikunutwikila, tuka kuna kwa Se, o mwand’aludi, una utuka kwa Se, yandi okunsila umbangi;
27 oyeno mpe nukunsila umbangi, kadi nukalanga yame tuka kuna lubantiku.
Mvovo vana yand'a lukaya
^ Sina, “velelesa kevelelesa.”
