Yoane 16:1-33
16 “Inuvovese mambu mama kimana nwalembi tá sakuba.
2 Wantu bekunuyinga muna masambilu. E ntangwa ikwiza, konso ona okunuvonda oyindula vo Nzambi kasadidi e salu kiavauka.
3 Kansi bevanga mambu mama kadi ke bazeye Se ko ngatu mono.
4 I dianu inuvovesèle mambu mama, kadi vava kiluaka e ntangwa mevangama, nwasungamena wo vo yakunuvovesa mo.
“Kiateka kunuvovesa mambu mama ko, kadi yakedi yeno.
5 Kansi owau se nkwenda kwa Ndiona wantuma; ke mosi ko muna yeno ungiuvuidi vo, ‘Akweyi okwenda?’
6 Kansi, wau inuvovese mambu mama, e ntima mieno mizele ye ntantu.
7 Inusamunwini e ludi vo, muna wete dieno ikwendela. Kadi avo kiele ko, o nsadisi kekwiza kwa yeno ko; kansi avo ngiele, ikuntwika kwa yeno.
8 Ondiona vava kekwiza, osonga e ziku kwa nza muna diambu dia sumu, unsongi ye mfundisa:
9 entete, muna diambu dia sumu, e kuma kadi ke bekwikilanga mu mono ko;
10 muna diambu dia unsongi, e kuma kadi kwa Se ikwenda, ke nukumbona diaka ko;
11 i bosi, muna diambu dia mfundisa, e kuma kadi o nyadi a nza yayi ofundisu.
12 “Mambu mayingi ngina mau muna kunuvovesa, kansi owau ke nwafwana mo bakula ko.
13 Kansi, oyandi* vava keluaka, o mwand’aludi, okunufila muna ludi kiawonso, kadi kevovela mu ngindu za yandi kibeni ko, kansi mana kawidi i mau kevova, okunusamunwina mana mekwiza.
14 Yandi okunkembesa, kadi mambu mame ketambula i mau kekunusamunwina.
15 Lekwa yawonso ya S’ame i yame. I kuma inuvovesèle vo mambu mame ketambula i mau kekunusamunwina.
16 Kolo kiandwelo kaka kisidi, ke nukumbona diaka ko, kolo kiandwelo diaka, nukumbona.”
17 Ankaka muna alongoki andi bavovazianene vo: “Adieyi kazolele vova wau katuvovese vo, ‘Kolo kiandwelo, ke nukumbona diaka ko, kolo kiandwelo diaka, nukumbona,’ ‘kadi kwa Se nkwenda’?”
18 Dianu bavovele vo: “Adieyi kazolele vova wau kavovele vo, ‘kolo kiandwelo’? Edi kavovele ke tuzeye dio ko.”
19 O Yesu wau kazeye wo vo bazolele kunyuvula, ubavovese vo: “Nuyuvuziananga ediadi wau mpovele vo: ‘Kolo kiandwelo, ke nukumbona ko, kolo kiandwelo diaka, nukumbon’e?’
20 Kieleka, kieleka, inusamunwini vo, nudila yo yayana, kansi e nza iyangalala; ntantu numona, kansi e ntantu zeno zikituka se kiese.
21 O nkento avo se kewuta, ntantu kemonanga, kadi e ntangw’andi ifwene, kansi avo owutidi mwana, ke sungamenanga diaka e nsongo ko mu kuma kia kiese kia muntu owutukidi ova nza.
22 Owau, yeno mpe ntantu nuna zau; kansi tumonana diaka, e ntima mieno miyangalala, ke vena muntu ko okunukatula e kiese kieno.
23 Muna lumbu kiakina ke nukungiuvula diambu ko. Kieleka, kieleka inusamunwini vo, konso dina nulomba kwa Se, okunuvana dio muna nkumbu ame.
24 Yamu wau ke nwalombele diambu ko muna nkumbu ame. Nulomba, se nwatambula, kimana e kiese kieno kialunga.
25 “Mambu mama inuvovesèle mo muna yingana. Muna ntangwa ikwiza kikunuvovesela diaka muna yingana ko, kansi ikunukiesesela oma ma Se.
26 Muna lumbu kiakina, nulomba kwa Se muna nkumbu ame; ediadi ke disongele ko vo mono ikunulombela.
27 Kadi yandi kibeni o Se unuzolele, kadi oyeno nunzolele yo kwikila vo Nzambi yayiza sunzula.
28 Se yayiza sunzula ova nza. Owau, ikatuka ova nza ngienda kwa Se.”
29 Alongoki andi bavovele vo: “Owau otomene vova, kutele yingana ko.
30 Owau tuzeye wo vo ozeye mawonso, ke dina mfunu ko vo muntu kayuvula. Muna diadi tukwikidi vo kwa Nzambi watuka.”
31 O Yesu ubavutwidi vo: “Owau nukwikidi e?
32 E ntangwa ikwiza, kieleka izidi kala, numwangana konso muntu muna nzo andi, nukunsisa mono mosi. Kansi kina mono mosi ko, kadi o Se wina yame.
33 Inuvovese mambu mama kimana nwakala yo luvuvamu omu mono. Ova nza mpasi numona, kansi nukala yo unkabu! Omono nsundidi e nza.”
Mvovo vana yand'a lukaya
^ “Oyandi” ye “yandi” muna tini kia 13 ye 14 i “nsadisi” oyikilu muna tini kia 7. O Yesu vava kayikila mwand’avelela vo “nsadisi,” ngolo za Nzambi kayikila nze muntu.
