Yoane 17:1-26
17 Yesu vava kavovele mambu mama, osengwele meso kuna zulu, ovovele vo: “E Tata, e ntangwa ifwene. Kembesa o mwan’aku, kimana o mwan’aku mpe kakembesa,
2 wauna wamvanina e wisa muna wantu awonso, kimana kavana o moyo a mvu ya mvu kw’awonso ana wamvana.
3 Muna vua moyo a mvu ya mvu, divavanga vo batoma kuzaya,* ngeye Nzambi mosi kaka aludi yo Yesu Kristu ona watuma.
4 Omono ikembese ova nza, wau mbanisi e salu kina wampana yasala.
5 Dianu vo, e Tata, yambula yakala vana ndambu aku, umpana o nkembo una yakala wau vana ndambu aku una e nza ke yakedi ko.
6 “Nsengomwene* nkumbu aku kwa wantu ana wampana ova nza. Wantu aku bakala, wabavana kwa mono, e diambu diaku balundidi* dio.
7 Owau bazeye wo vo yawonso wampana kwa ngeye yatuka;
8 kadi ibavene mambu mana wampana, batambwidi mo ye bazeye wo kieleka vo ngeye yayiza sunzula, bakwikidi mpe vo ngeye wantuma.
9 Idodokele mu kuma kiau; kidodokele mu kuma kia nza ko, kansi mu kuma kia awana wampana, kadi i baku;
10 yawonso ngina yau i yaku, e yaku mpe i yame, ikembeswanga vana bena.
11 “Kina diaka mu nza ko, kansi oyau mu nza bena, omono kwa ngeye ikwiza. E Tata Avelela, ubatanina mu kuma kia nkumbu aku ina wampana, kimana bakala mosi* wauna oyeto twinina mosi.*
12 Vava yakala yau, yabatanina mu kuma kia nkumbu aku ina wampana; yakubatanina, ke mosi ko muna yau ovididi, nanga mwan’a lufwasu kaka, kimana e sono kialungana.
13 Kansi owau kwa ngeye ikwiza, mpovele mambu mama ova nza kimana kiese kiame kialunga muna yau.
14 E diambu diaku ibavene dio, kansi e nza ibamengene, e kuma kadi ke ba nza ko, wauna omono kinina wa nza ko.
15 “Kidodokele ko vo wabakatula ova nza, kansi wabatanina mu kuma kia ndiona wambi.
16 Ke ba nza ko, wauna omono kinina wa nza ko.
17 Ubavaula* muna ludi; e diambu diaku i ludi.
18 Wauna wantumina ova nza, omono mpe ibatumini omu nza.
19 Omono ikivaudi muna wete diau, kimana oyau mpe bavaulwa muna ludi.
20 “Idodokele, ke mu kuma kia awaya kaka ko, kansi mu kuma ki’awana mpe bekwikilanga omu mono muna diambu diau,
21 kimana yau awonso bakala mosi, wauna ngeye, e Tata, una yame ntwadi, omono mpe ngina yaku e ntwadi, oyau mpe bakala yeto e ntwadi, kimana e nza yakwikila vo ngeye wantuma.
22 Ibavene o nkembo una wampana, kimana oyau mpe bakala mosi wauna oyeto tunina mosi.
23 Omono ngina yau e ntwadi, ongeye mpe una yame ntwadi, kimana bakala mosi,* e nza yazaya wo vo ngeye wantuma, ye ubazolele wauna unzolele.
24 E Tata, nzolele mpe vo awana wampana bakala yame konso kuna ikala, kimana bamona o nkembo una wampana, e kuma kadi wanzola vava e nza ke yasemeno ko.
25 E Tata Ansongi, e nza ke yazaya ko; kansi omono yazaya, awaya mpe bazeye wo vo ngeye wantuma.
26 Yabazayisa e nkumbu aku, izayisa yo mpe, kimana e nzola ina unzolele yakala muna yau, omono mpe yakala yau e ntwadi.”
Mvovo vana yand'a lukaya
^ Yovo “bakwamanana vua o zayi mu kuma kiaku.”
^ Yovo “nzayisi.”
^ Yovo “balemvokele.”
^ Yovo “ntwadi.”
^ Yovo “ntwadi.”
^ Yovo “Ubavambula; Ubavelelesa.”
^ Yovo “bakala ntwadi muna mawonso.”
