Yoane 18:1-40
18 Vava kavovele mambu mama, Yesu ovaikidi ye alongoki andi, wele kuna simu dia Nkukwil’a Kiderone, kuna kwakala mpatu ina kakotele ye alongoki andi.
2 Yuda ona wanyekola wazaya mpe fulu kiaki, e kuma kadi Yesu nkumbu miayingi kayendanga ko y’alongoki andi.
3 Dianu vo, Yuda obongele buka kia makesa ye ayingidi a nganga zambuta ye ayingidi a Afarisi, wizidi ko ye mini ye nwaninwa.
4 I bosi o Yesu wau kazeye mawonso mekumbwila, otelamene kuna ntwala, ubayuvuidi vo: “Nani nuvavanga?”
5 Bamvutwidi vo: “Yesu wa mwisi Nazarete.” Ubavovese vo: “I mono oyu.” O Yuda ona wanyekola otelamene yau mpe.
6 Kansi, o Yesu vava kabavutwidi vo, “I mono oyu,” bavutukidi lunima-nima yo bwa vana ntoto.
7 Ubayuvuidi diaka vo: “Nani nuvavanga?” Bavutwidi vo: “Yesu wa mwisi Nazarete.”
8 Yesu ubavutwidi vo: “Inuvovese kala vo i mono oyu. Avo mono nuvavanga, nuyambula awaya benda kwau.”
9 Ediadi divangamene kimana dialungana dina kavova vo: “Kividisi kana mosi ko muna awana wampana.”
10 I bosi, Simone Petelo ona wakala ye nsosolo, ovolele wo, ozengele kutu kwalunene kwa ntaudi a ngang’ambuta. Nkumbu a ntaudi, Maleko.
11 Yesu ovovese Petelo vo: “Vutula nsosolo muna kùtu kiandi. Nga kilendi nua ko e kopo kampene o Se diame?”
12 I bosi, makesa ye mfumu za makesa ye ayingidi a Ayuda babakidi Yesu, bankangidi.
13 Entete, bele yandi kwa Anasi, kadi kô wa Kayafa, ona wakala ngang’ambuta muna mvu wauna.
14 Kayafa yandi walukisa Ayuda vo disundidi o mfunu kwa yau vo muntu mosi kafwila muna wete dia nkangu.
15 Simone Petelo ye nlongoki ankaka, balende Yesu. O nlongoki ndioyo wazayakana kwa ngang’ambuta, okotele kumosi yo Yesu vana yanzala kia ngang’ambuta,
16 kansi, o Petelo otelamene kuna mbazi, vana mwelo. Muna kuma kiaki, o nlongoki ona wazayakana kwa ngang’ambuta, wele mokena ye ndiona walangidilanga o mwelo, okotese Petelo.
17 Ntaudi ankento ona walangidilanga o mwelo, ovovese Petelo vo: “Ongeye mpe nga kumosi ko muna alongoki a muntu ndioyu?” Ovutwidi vo: “Ke mono ko.”
18 Antaudi yo makesa matelamene vana ndambu a tiya twa makala tuna balungidi, bayotèle kadi kiozi kwakala. Petelo mpe otelamene vana, oyotèlanga.
19 Muna ntangwa yayina, ngang’ambuta oyuvuidi Yesu oma ma alongoki andi ye malongi mandi.
20 Yesu umvutwidi vo: “Vana meso ma wantu yavovelenge. Ntangwa zawonso yalongelenge muna masambilu ye muna tempelo, muna mukutakananga Ayuda awonso, kisidi vovela diambu ku sweki ko.
21 Ekuma ungiuvulwidi? Yuvula awana bawidi mana yabavovesenge. Oyau bazeye mo.”
22 Vava kavovele mambu mama, e kesa dimosi diatelama vavana, owende Yesu e mbata vana luse, ovovele vo: “Nga i wau ofwete vutulwila ngang’ambuta e?”
23 Yesu umvutwidi vo: “Avo diambu diambi mpovele, sila dio umbangi; kansi, avo diambote mpovele, ekuma ungwandidi?”
24 I bosi, Anasi untwikidi wakangwa kwa Kayafa wa ngang’ambuta.
25 Muna ntangwa yayina, Simone Petelo watelama vana ndambu a ziku yo yotela. I bosi, bamvovese vo: “Ongeye nga kumosi ko muna alongoki andi e?” Ovakwidi o nkalu, oku vo: “Ke mono ko.”
26 Mosi muna antaudi a ngang’ambuta, una vo yitu kia ndiona wazengwa o kutu kwa Petelo, ovovele vo: “Ke ngeye ko mbwene okedi yandi muna mpatu e?”
27 Kansi, Petelo ovakwidi wo diaka o nkalu, vana vau e nsusu ikokwele.
28 I bosi, omu mene-mene, bakatwidi Yesu kwa Kayafa banète kuna lûmbu lwa nguvulu. Kansi yau kibeni ke bazolele kota kuna lûmbu lwa nguvulu ko, balembi funzuka kimana badia e Nduta.
29 Dianu vo, Pilato ovaikidi kwa yau, vana mbazi, ovovele vo: “Nkia mfundu nwizidi fundila muntu ndioyu?”
30 Bamvutwidi vo: “O muntu ndioyo kele vo ke kimpumbulu ko, ke twadi kunyekola kwa ngeye ko.”
31 Pilato ubavovese vo: “Numbonga yeno kibeni, nwamfundisila muna nsiku eno.” Ayuda bamvutwidi vo: “Ke diansongi ko kwa yeto twavonda o muntu.”
32 Ediadi dilunganisi dina kavova Yesu mu songa e mfwa ina kefwa.
33 Pilato okotele diaka muna lûmbu lwa nguvulu, obokele Yesu, unyuvuidi vo: “Ongeye i Ntinu a Ayuda e?”
34 Yesu ovutwidi vo: “Nga mu ngindu za ngeye kibeni oyuvulwidi mu kuma kiame yovo akaka bavovese dio?”
35 Pilato ovutwidi vo: “Nga mono i Nyuda e? Esi zula kiaku ye nganga zambuta bayekwele kwa mono. Adieyi ovangidi?”
36 Yesu ovutwidi vo: “E Kintinu kiame ke kia nza yayi ko. Kele vo Kintinu kiame kiakala kia nza yayi, asadi ame badi nwana kimana yalembi yekolwa kwa Ayuda. Kansi, e Kintinu kiame ke kitukidi mu nza yayi ko.”
37 Dianu Pilato umvovese vo: “Ongeye u ntinu e?” Yesu ovutwidi vo: “Ngeye kibeni ovovele wo vo mono i ntinu. Kadi i diau yawutukila, i diau yayizila ova nza, yasila e ludi umbangi. Konso ona wina kuna sambu dia ludi owanga nding’ame.”
38 Pilato umvovese vo: “Nki i ludi?”
Vava kavovele diadi, wele diaka kwa Ayuda, ubavovese vo: “Kimwene kwame kuma ko muna yandi.
39 Kansi, wau kina vo i fu kieno yanuyambulwila muntu muna Nduta, nga nuzolele yanuyambulwil’o Ntinu a Ayuda e?”
40 Bavovele diaka muna nding’a ngolo, oku vo: “Ke muntu ndioyo ko, Baraba kaka!” O Baraba mwivi kakala.
