Yoane 19:1-42
19 I bosi, Pilato obongele Yesu, unzwabwidi.
2 Makesa bavangidi mpu* a nsende, bamvuikidi yo vana ntu, bamvuikidi mpe nlele a nduwa;*
3 bezidinge vana kena, oku vo: “Kiambote kiaku, e Ntinu a Ayuda!” Bakwamanene kuwanda mpe e mbata vana lose.
4 Pilato ovaikidi diaka kuna mbazi, ubavovese vo: “Tala, imvaikisi kwa yeno, kimana nwazaya wo vo kimwene kwame kuma ko muna yandi.”
5 Dianu vo, Yesu ovaikidi kuna mbazi, ovuete mpu a nsende ye nlele a nduwa. Pilato ubavovese vo: “Tala, o muntu!”
6 Kansi, nganga zambuta yo makesa vava bamwene, bavovele muna nding’angolo, oku vo: “Kamanikwa vana nti! Kamanikwa vana nti!”* Pilato ubavutwidi vo: “Numbonga yeno kibeni, nwamvonda,* kadi kimwene kwame kuma ko muna yandi.”
7 Ayuda bamvutwidi vo: “Tuna yo nsiku, muna nsiku wau, i kafwete fwila, e kuma kadi uyikitwidi se mwan’a Nzambi.”
8 O Pilato vava kawidi dina bavovele, omwene kikilu o wonga,
9 okotele diaka muna lûmbu lwa nguvulu, ovovese Yesu vo: “Akweyi watuka e?” Kansi Yesu kamvene mvutu ko.
10 Dianu, Pilato umvovese vo: “Kuzolele kumpovesa ko e? Kuzeye wo ko vo ngina ye wisa kiakuyambula, ngina mpe ye wisa kia kuvonda?”*
11 Yesu umvutwidi vo: “Kwadi kala nkutu ye wisa omu mono ko, kele vo kwavewa kio ko kuna ntandu. Muna kuma kiaki ndiona ungiekwele oku kwa ngeye, sumu diampwena kanete.”
12 Muna diadi, Pilato ovavidi una kalenda kunyambulwila, kansi Ayuda bavovele muna nding’angolo, oku vo: “Avo oyambwidi muntu ndioyo, ku nkundi a Kaisa ko. Konso ona uyikitwidi se ntinu, Kaisa katelamene.”*
13 Pilato vava kawidi e mvovo miami, otwese Yesu kuna mbazi, ovuende vana kunda kia lufundisu, vana fulu kiyikilwanga vo Matadi Malelama, muna Kiyibere, Ngabata.
14 Nkubameno a Nduta yakala; muna tezo kia ola yasambanu.* Ovovese Ayuda vo: “Tala, ntinu eno!”
15 Kansi, bavovele muna nding’angolo, oku vo: “Unkatula! Unkatula! Umanika vana nti!”* Pilato ubavovese vo: “O ntinu eno yamvond’e?” Nganga zambuta bavutwidi vo: “Ke tuna ye ntinu ankaka ko, Kaisa kaka.”
16 I bosi, unyekwele kwa yau bamvondela vana nti.
Dianu vo, babongele Yesu.
17 Yandi kibeni onete nti andi ampasi,* wele vana fulu kiyikilwanga vo Ku-valanganza kia ntu, muna Kiyibere vo Ngolongota.
18 Kûna bankomene muna nti, kumosi yo wantu wole, mosi kuna sambu dimosi, wankaka kuna sambu diankaka, o Yesu vana kati.
19 Pilato osonekene mpe e sono yo sia kio vana ntandu a nti ampasi.* Kiasonama vo: “Yesu wa mwisi Nazarete wa Ntinu a Ayuda.”
20 Ayingi muna Ayuda batangidi e sono kiaki, e kuma kadi e fulu bakomena Yesu muna nti lukufi kiakala ye mbanza, e sono muna nding’a Kiyibere, Kilatini ye Kingerekia kiasonamena.
21 Kansi, nganga zambuta za Ayuda bavovese Pilato vo: “Kusoneki ko vo ‘Ntinu a Ayuda,’ kansi soneka edi kavova vo, ‘Mono i Ntinu a Ayuda.’”
22 Pilato ovutwidi vo: “Dina nsonekene, nsonekene.”
23 Vava makesa bavuidi koma Yesu muna nti, babongele mvuatu andi, bakayanese wo muna tini yá, konso kesa ye tini kiandi, babongele mpe kinkutu kiandi. Kansi e kinkutu kiakondwa nswiku tuka kuna ntandu yamuna yanda, baya kimosi kaka.
24 Bavovazianene vo: “Ke tutiazuni kio ko, tutelela kio nkas’a mienze twazaya nani obonga kio.” Ediadi dialunganesa e sono kiavova vo: “Bakayanene mvuatu ame, batelele kinkutu kiame nkas’a mienze.” Makesa i mau kikilu bavangidi.
25 Vana ndambu a nti ampasi* a Yesu, vatelamene ngudi andi ye ngudi andi a nleke; Maria wa nkaz’a Kelopa yo Maria Mandala.
26 Vava Yesu kamwene ngudi andi ye nlongoki ona kezolanga otelamene vana ndambu, ovovese ngudi andi vo: “E nkento, tala mwan’aku!”
27 I bosi, ovovese nlongoki vo: “Tala ngudi aku!” Tuka muna ntangwa yayina o nlongoki unète kuna nzo andi.
28 I bosi, o Yesu wau kazeye wo vo mawonso mavangamene, muna lunganesa e sono, ovovele vo: “Vuina ngina diau.”
29 Vakedi mvungu wazala ye vinyu yangani. Basomekene e vusu diazala ye vinyu yangani muna nti a isopo,* batutikidi yo muna nu’andi.
30 Una katambwidi e vinyu yangani, Yesu ovovele vo: “Dilunganene!” ovetekele ntu, ozengele moyo.
31 Wau vo lumbu kia Nkubama kiakala, o mavimbu mekwa kala muna nti ampasi yamuna lumbu kia Vundu, (kadi e lumbu kiakina kia Vundu kianene), Ayuda balombele kwa Pilato vo batolola e malu mau, o mavimbu makatulwa muna nti.
32 Dianu vo, makesa bezidi, batolwele e malu ma wantu wole ana bakomeno vana ndambu andi.
33 Kansi wau balueke kwa Yesu, bamwene vo ofwidi kala, dianu vo ke batolwele malu mandi ko.
34 Kansi, e kesa dimosi otobwele luvati lwandi muna dionga, vana vau vavaikidi menga yo maza.
35 Ndiona omwene wo osidi umbangi, o umbangi wandi waludi, ozeye wo vo mana kavovele maludi, kimana oyeno mpe nwakwikila.
36 Kieleka, o mama mavangamene kimana e sono eki kialungana: “Kana visi kiandi kimosi ke kitoloka ko.”
37 E sono kiakaka mpe kivovanga vo: “Betala ndiona batobwele.”
38 I bosi, Yosefe wa mwisi Arimataya, ona wakala nlongoki a Yesu kuna sweki mu kuma kia wonga wa Ayuda, olombele kwa Pilato kakatula e vimbu dia Yesu, Pilato umvene nswa. Wizidi katula e vimbu diandi.
39 Nikodemo, ona wateka kwiza kwa Yesu o fuku, otwese mô yasangwa ye ba dia nseke,* tezo kia makumatatu ma kilo.
40 Babongele e vimbu dia Yesu, bazingidi dio muna nlele mia lino ye má yansunga, mun’owu wa fu kia Ayuda kia zika mvumbi.
41 Mpatu yakala vana fulu kina kavondelwa,* muna mpatu yayi mwakala ziami kiampa, kina ke kiasiwa nkutu muntu ko.
42 Wau vo lumbu kia Nkubameno a Ayuda kiakala, basidi e vimbu dia Yesu muna ziami kiakala lukufi.
Mvovo vana yand'a lukaya
^ Sina, “kolowa.”
^ Yovo “mbwaki.”
^ Yovo “Kavondelwa vana nti! Kavondelwa vana nti!”
^ Yovo “nwamvondela vana nti.”
^ Yovo “kuvondela vana nti?”
^ Yovo “kasidi kitantu.”
^ I sia vo, tezo kia ola 12.
^ Yovo “umvondela vana nti!”
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Tala Nsas’a Mvovo.
^ Mô ye ba dia nseke i má yansunga.
^ Yovo “kavondelwa vana nti.”
