Yoane 2:1-25
2 E lumbu kina kiatatu muna Kana a Ngalili mwakala nkinzi a longo, o ngudi a Yesu i mûna kakala.
2 O Yesu mpe y’alongoki andi babokelwa kuna nkinzi a longo.
3 E vinyu una se ifokoka, o ngudi a Yesu umvovese vo: “Ke bena ye vinyu ko.”
4 Kansi Yesu umvovese vo: “E nkento, omono yo ngeye nkia diambu tuna diau?* E ntangw’ame ke yafwene ko.”
5 O ngudi andi ovovese awana basadidinge vo: “Konso una kekunuvovesa, nuvanga wo.”
6 Mvungu sambanu mia matadi miakala ko, mun’owu wa fu kia Ayuda kia luveleleso, konso mvungu, nzongo* miole yovo mintatu miakotanga mo.
7 Yesu ubavovese vo: “Nuzadis’e mvungu yo maza.” Bazadisi mio yavana ntu.
8 I bosi, ubavovese vo: “Owau nubonga mio, nwenda mio vana kuna kwa ntu a nkinzi.” Banete mio.
9 O ntu a nkinzi vava kayelekele o maza makitukidi se vinyu, kazaya kuna yatuka ko (kansi e selo ana babong’o maza bazaya kuna yatuka), o ntu a nkinzi obokele toko diansompi,
10 umvovese vo: “Wantu awonso vinyu ambote beteka tambikanga, avo wantu batomene nua, i bosi betambika ina yambi. Kansi ongeye, oswekele e vinyu ambote yamu wau.”
11 Edi kavangidi o Yesu muna Kana a Ngalili, i lubantiku lwa sinsu yandi, osengomwene nkembo andi, alongoki andi bakwikidi muna yandi.
12 I bosi okulumukini kuna Kafanau yo ngudi andi, ye aleke andi, y’alongoki andi, kansi ke bakala ko lumbu yayingi ko.
13 E Ndut’a Ayuda vava yafinama, Yesu otombokele kuna Yerusaleme.
14 Muna tempelo owene ana betekanga ngombe, yo mameme, yo mayembe, ye mimbudi a nzimbu* mpe bavuende.
15 Ovangidi luzuadi lwa nsinga, ovaikisi muna tempelo awonso ana bakala yo mameme ye ngombe, omwangidi nzimbu za mimbudi a nzimbu,* okindwidi meza mau.
16 Ovovese ana batekelenge mayembe vo: “Nukatula lekwa yayi mwamu! Nuyambula kitula nzo a Se diame se nzo ya kinkita!”*
17 Alongoki andi basungamene dina diasonama vo: “Izala yo vema mu kuma kia nzo aku.”
18 I bosi, Ayuda bamvutwidi vo: “Nkia sinsu okutusonga wau ovanganga mambu mama?”
19 O Yesu ubavutwidi vo: “Nubwisa e tempelo yayi, yatelamesa yo muna lumbu tatu.”
20 Ayuda bavovele vo: “E tempelo yayi mu mvu 46 yatungwa, ongeye mu lumbu tatu otelamesa yo e?”
21 Kansi oyandi, tempelo a nitu andi kavovèlenge.
22 Dianu vo, vava kafuluka muna mafwa, alongoki andi basungamena vo, i wau kavovanga, bakwikila mpe e sono ye diambu dina diavova Yesu.
23 Una kakedi kuna Yerusaleme, kuna lambu dia Nduta, wantu ayingi bakwikidi muna nkumbu andi, wau bamwene e sinsu ina kavangidi.
24 Kansi, o Yesu kababundanga vuvu ko, kadi wazaya yau awonso,
25 i kuma kavuilanga mfunu a muntu ko kasia kimbangi kia wantu, kadi wazayanga mana mena muna ntim’a muntu.
Mvovo vana yand'a lukaya
^ Sina, “nki kwa mono yo ngeye, e nkento?” E yayi i mpila ya vakulwila nkalu. O sadila e mvovo “nkento” ke kondwa luzitu ko.
^ E lekwa ya maza mu bata yazongelwanga. Muna bata, litro 22 zakotanga mo.
^ Yovo “awana besobanga e nzimbu.”
^ Yovo “awana besobanga e nzimbu.”
^ Yovo “zandu.”
