Yoane 20:1-31
20 Muna lumbu kiantete kia lumingu, Maria Mandala olueke vana ziami muna mene-mene, una e tombe kiakinu, omwene e tadi diakatuka vana ziami.
2 Wele ntinu kwa Simone Petelo ye kwa nlongoki akaka, ona Yesu kazolanga, ubavovese vo: “Bakatwidi o Mfumu muna ziami, ke tuzeye ko kuna bansidi.”
3 O Petelo yo nlongoki akaka bele kuna ziami.
4 Yau wole bayantikidi zaula kumosi, kansi o nlongoki akaka osundidi Petelo e ntinu, otekele lwaka kuna ziami.
5 Oyinzamene, okengelele, omwene mo nlele mia lino, kansi kakotele mo ko.
6 Simone Petelo mpe wizidi anlandi, okotele muna ziami. Omwene mo nlele mia lino.
7 O nlele una kazingwa muna ntu ke wakala vamosi ko ye nlele miankaka, kansi wazingama vana fulu kiankaka.
8 I bosi, o nlongoki akaka ona wateka lwaka kuna ziami, okotele mo mpe, omwene, okwikidi.
9 Kansi ke bateka bakula e sono ko, ovo kafwete fuluka muna mafwa.
10 Dianu vo, alongoki bavutukidi kwau muna nzo zau.
11 Kansi, Maria otelamene kaka kuna mbazi, vana mbel’a ziami, odilanga. Ekolo kedilanga, oyinzamene, okengelele muna ziami,
12 omwene mbasi zole bavuete nlele miampembe, bavuende vana vasiwa e vimbu dia Yesu, omosi kuna ntu, wankaka kuna malu.
13 Bamvovese vo: “E nkento, ekuma odidilanga?” Ubavutwidi vo: “Bakatwidi Mfumu ame, kizeye ko ko kuna bansidi.”
14 Vava kavovele wo, ovilukidi, omwene Yesu watelama, kansi kabakwidi ko vo i Yesu ndioyo.
15 Yesu umvovese vo: “E nkento, ekuma odidilanga? Nani ovavanga?” Wau kabenze vo i mvati, umvutwidi vo: “E Mfumu, avo ngeye umbongele, unsamunwina kuna unsidi, ngienda kunkatula.”
16 Yesu umvovese vo: “E Maria!” Una kavilukidi, umvovese muna Kiyibere vo: “Raboni!” (i sia vo, “Nlongi!”)
17 Yesu umvovese vo: “Kundaminina ko, kadi kiatombokele ko kwa Se. Kansi wenda kwa mpangi zame, ubavovesa vo, ‘Kwa Se diame itomboka, i Se dieno mpe, Nzambi ame ye Nzambi eno mpe.’”
18 Maria Mandala wele samuna nsangu kw’alongoki vo: “Mbwen’e Mfumu!” Ubasamunwini mpe mana kamvovese.
19 Muna lumbu kiakina, e lumbu kiantete kia lumingu, alongoki bakutakana kuna masika, bazikidi e yelo mu kuma kia wonga wa Ayuda, Yesu wizidi, otelamene vana kati kwau, ubavovese vo: “Luvuvamu kwa yeno.”
20 Vava kavovele wo, ubasongele moko yo luvati lwandi. Alongoki bamwene kiese wau bamwene Mfumu.
21 Yesu ubavovese diaka vo: “Luvuvamu kwa yeno. Wauna o Se kantumina, omono mpe inutumini.”
22 Vava kavovele ediadi, ubavumunwini, ubavovese vo: “Nutambul’o mwand’avelela.
23 Konso ona nuyambulwila masumu, Nzambi okunyambulwila; konso ona nulembi yambulwila masumu, Nzambi ke kunyambulwila ko.”
24 Kansi, o Toma, mosi muna alongoki Kumi ye Zole, ona wayikilwanga vo Dipasa,* kakala yau ko vava Yesu kayiza.
25 Alongoki ankaka bamvovese vo: “Tumwen’e Mfumu!” Kansi ubavovese vo: “Avo kimwene dimbu ya nsonso ko muna moko mandi yo kotesa nlembo ame muna dimbu ya nsonso yo kotesa koko kwame muna luvati lwandi, kikwikila nkutu ko.”
26 Vava kiavioka lumbu nana, alongoki andi bakutakene diaka muna nzo yo zika e yelo, o Toma wakala yau. Kana una vo e yelo yazikama, Yesu wizidi, otelamene vana kati kwau, ovovele vo: “Luvuvamu kwa yeno.”
27 I bosi, ovovese Toma vo: “Sia nlembo aku ova, tala moko mame, lambula koko kwaku wasimba luvati lwame, yambula katikisa, kwikila kaka.”
28 O Toma umvutwidi vo: “E Mfumu ame, wa Nzambi ame!”
29 Yesu umvovese vo: “Okwikidi wau umbwene. Akwa nsambu ana balembele mona, kansi bakwikidi.”
30 Kieleka, Yesu sinsu yayingi mpe kavanga vana vena alongoki, yina ke yisonamene muna nkanda wau ko.
31 Kansi, eyayi yisonamene kimana nwakwikila vo Yesu i Kristu wa Mwan’a Nzambi, wau nukwikilanga, nwavua moyo muna nkumbu andi.
Mvovo vana yand'a lukaya
^ Yovo “Didimo.”
