Yoane 21:1-25
21 I bosi, Yesu omonekene diaka kwa alongoki andi kuna Mbu a Tiberia. Mu mpila eyi kamonekene:
2 Simone Petelo kumosi kakala yo Toma, (ona wayikilwanga vo Dipasa), ye Natanaele wa mwisi Kana a Ngalili, ye wan’a Zebedayo ye alongoki andi wole akaka.
3 Simone Petelo ubavovese vo: “Ngiele baka mbizi zame za maza.” Bamvovese vo: “Tuzolele kwenda yaku.” Bavaikidi, bakotele muna nzaza, kansi muna fuku wauna yau ke babaki má.
4 Ekolo kuma kwakianga, Yesu otelamene kuna simu, kansi alongoki ke babakwidi wo ko vo i Yesu.
5 I bosi, Yesu ubavovese vo: “Aleke, nga má* kia dia luna kiau e?” Bamvutwidi vo: “Ve!”
6 Ubavovese vo: “Nutuba e konde kuna lunene lwa nzaza, nwabaka e mbizi.” Batubidi e konde, kansi ke balendele dio vola ko mu kuma kia mbizi zayingi.
7 I bosi, o nlongoki ona Yesu kazolanga ovovese Petelo vo: “I Mfumu ndioyo!” O Simone Petelo vava kawidi vo i Mfumu, ovuete* kinkutu kiandi, kadi nkonga* kakala, uyitubidi muna mbu.
8 Alongoki akaka bezidi muna nzaza yakete, bavolele e konde diazala ye mbizi, kadi lukufi bakala ye kumu, tezo kia 300 za tambi.*
9 Kansi, vava batombokele vana seke, bamwene tiya twa makala ye mbizi zitensamene vo ye mbolo.
10 Yesu ubavovese vo: “Nutwasa ezaka mbizi zina nubakidi owau.”
11 Simone Petelo wele muna nzaza, ovolele e konde vana seke, diazala ye mbizi zanene, 153. Kana una vo zayingi zakala, e konde ke diabakuka ko.
12 Yesu ubavovese vo: “Nwiza dia.” Kansi, ke mosi ko vana vena alongoki wakala yo unkabu wakunyuvula vo: “Ongeye u nani e?” kadi bazaya wo vo i Mfumu.
13 Yesu wizidi, obongele mbolo, ubavene zo, diau adimosi ye mbizi.
14 Eyayi i mboneka yatatu kamonekene o Yesu kwa alongoki andi vava kafuluka muna mafwa.
15 Vava bamene dia, Yesu ovovese Simone Petelo vo: “E Simone wa mwan’a Yoane, nga olutidi kunzola ke mu yayi ko e?” Umvutwidi vo: “Ingeta, e Mfumu, ozeye wo vo zola ikuzolanga.” Umvovese vo: “Dikila wan’ame a mameme.”
16 Umvovese diaka e mpovesa ina yazole vo: “E Simone wa mwan’a Yoane, nga zola okunzolanga e?” Umvutwidi vo: “Ingeta, e Mfumu, ozeye wo vo zola ikuzolanga.” Umvovese vo: “Vungula mameme mame.”
17 Umvovese e mpovesa ina yatatu vo: “E Simone wa mwan’a Yoane, nga zola okunzolanga e?” Petelo omwene ntantu wau kanyuvuidi nkumbu ina yatatu vo: “Nga zola okunzolanga e?” Dianu, umvutwidi vo: “E Mfumu, ongeye ozeye mawonso; ozeye wo vo zola ikuzolanga.” Yesu umvovese vo: “Dikila mameme mame.
18 Kieleka, kieleka isamunwini vo, vava wakala toko, ngeye kibeni wavuatanga yo kwenda konso kuna ozolele. Kansi, vava onuna, olambula moko maku, muntu akaka okuvuika yo kunata kuna kuzolele ko.”
19 Ovovele ediadi muna songa vo e mfw’a Petelo Nzambi ikembelela. Vava kavovele wo, umvovese vo: “Kwamanana kundanda.”
20 Petelo ovilukidi, omwene nlongoki ona Yesu kazolanga okwiza balandinge, ndiona wavuanda vana ndambu andi muna nlekelo, ndiona wayuvula vo: “E Mfumu, nani okuyekola?”
21 O Petelo vava kamwene, ovovese Yesu vo: “E Mfumu, ondioyu aweyi?”
22 Yesu umvovese vo: “Avo nzolele wo vo kazinga yavana nkwiza, ekuma otokanenanga? Kwamanana kundanda.”
23 Dianu vo, e diambu diadi dimwanganene vana vena ampangi vo, o nlongoki ndioyo ke fwa ko. Kansi o Yesu kamvovesa ko vo ke fwa ko, edi kavova vo: “Avo nzolele wo vo kazinga yavana nkwiza, ekuma otokanenanga?”
24 I yandi ndioyu o nlongoki ona osianga umbangi wa mambu mama yo soneka mo, tuzeye wo vo umbangi wandi waludi.
25 Kieleka, vena mpe ye mambu mayingi mankaka mana Yesu kavanga, kele vo mawonso masonekwa, edi mbenze vo e nza kibeni ke yadi fwana nkanda miasonama ko.
Mvovo vana yand'a lukaya
^ Yovo “mbizi.”
^ Yovo “ukizingidi.”
^ Yovo “mu kupe kiansi.”
^ Tezo kia meta 90. Sina, “tezo kia yinkoso 200.”
