Yoane 3:1-36
3 Vakala Mfarisi mosi, nkumbu andi Nikodemo, wa nkuluntu a Ayuda.
2 Muntu ndioyo wayiza kwa Yesu mu fuku, umvovese vo: “E Rabi, tuzeye wo vo nge i nlongi watuka kwa Nzambi, kadi ke vena ona olenda vanga sinsu ina ovanganga ko, nanga vo Nzambi kakala yandi.”
3 O Yesu umvutwidi vo: “Kieleka, kieleka, isamunwini vo, o muntu avo kalembi wutuluka, kalendi mona Kintinu kia Nzambi ko.”
4 O Nikodemo umvovese vo: “O muntu una vo mbuta aweyi kalenda wutulukila? Nga lenda kwandi kota muna vumu kia ngudi andi, kawutuluka diak’e?”
5 Yesu ovutwidi vo: “Kieleka, kieleka, isamunwini vo, muntu avo kalembi wutwa kwa maza yo mwanda, kalendi kota muna Kintinu kia Nzambi ko.
6 Eki kiwutwa kwa nitu i nitu, eki kiwutwa kwa mwanda i mwanda.
7 Kusiviki ko wau ivovese vo: Nufwete wutuluka.
8 E tembwa kivevomoka konso oku kizolèle, o mazu mandi owidi mo, kansi kuna kitukidi kuzeye ko ko, ngatu kuna kikwenda. I wau una konso ona wawutwa kwa mwanda.”
9 Nikodemo umvutwidi vo: “Mambu mama aweyi malenda vangamena?”
10 Yesu umvutwidi vo: “Ngeye i nlongi a Isaele, kuzeye mambu mama ko e?
11 Kieleka, kieleka, isamunwini vo, dina tuzeye i diau tuvova, dina tumwene i diau tusila umbangi, kansi o umbangi weto ke nutambwidi wo ko.
12 Wau inuvovese oma mansi, ke nukwikidi ko, ozevo, aweyi nukwikidila avo inuvovese oma mezulu?
13 Ke vena muntu ko watomboka kuna zulu, ndiona kaka wakulumuka kuna zulu, wa Mwan’a muntu.
14 Wauna Mose kamanikin’e nioka vana makanga, i una kafwete manikinwa o Mwan’a muntu,
15 kimana konso on’okwikilanga muna yandi, kavua moyo a mvu ya mvu.
16 “Kadi muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.
17 Kadi o Nzambi watuma Mwan’andi ova nza, ke mu fundisa nza ko, kansi e nza yavuluzilwa kaka muna yandi.
18 Konso ona okwikila muna yandi ke fundiswa ko. Konso ona olembi kwikila, ofundisu kala, wau kalembi kwikidila muna nkumbu a Mwana amosi a Nzambi.
19 Kiaki i kuma kia lufundisu, o ntemo wizidi omu nza, kansi wantu balutidi zola tombe ke mu ntemo ko, kadi mavangu mau mambi.
20 Kadi konso on’ovanganga mambi omengene o ntemo, kekwiza ku ntemo ko, kimana mavangu mandi malembi tumbwa.*
21 Kansi konso on’ovanganga oma maludi okwiz’oku ntemo, kimana mavangu mandi masengomoka, wau vo muna luzolo lwa Nzambi mavangamena.”
22 I bosi, Yesu ye alongoki andi bele muna mavata ma Yuda, kûna kanangini yau yo vuba wantu.
23 O Yoane mpe wavubilanga kuna Ainone, kuna ndambu a Salemi, e kuma kadi, i kûna kwakala maza mayingi, o wantu bayizanga yo vubwa;
24 kadi Yoane kasilu ntete muna pelezo ko.
25 Alongoki a Yoane bafilanene mpaka yo Nyuda mosi mu kuma kia fu kia luveleleso.
26 Bezidi kwa Yoane, bamvovese vo: “E Rabi, muntu ndiona wakala yaku kuna simu dia Yodani, ndiona wasila umbangi, yandi ovubanga, wantu awonso kwa yandi bekwendanga.”
27 Yoane ovutwidi vo: “O muntu kalendi tambula má ko, avo kaveno kio ko kuna zulu.
28 Yeno kibeni nukunsilanga umbangi mu dina yavova vo, ‘Ke mono ko i Kristu, kansi tumwa yatumwa yamvita oku ntwala.’
29 Konso ndiona una ye ndumb’ansompi i toko diansompi. Kansi o nkundi a toko diansompi wau katelamene yo kunwá, omwene kiese kiayingi mu kuma kia nding’a toko diansompi. Dianu vo e kiese kiame kilunganene.
30 E salu kiandi wokela kaka kiwokela, vo i kiame, kuluka kaka kikuluka.”
31 Ndiona otukidi kuna ntandu, vana ntandu a wantu awonso i kena. Ndiona wa nza, mwisi nza kwandi, oma ma nza i kevova. Ndiona otukidi kuna zulu, vana ntandu a wantu awonso i kena.
32 Mana kamwene yo wá, i mau kesila umbangi, kansi ke vena muntu ko otambwidi umbangi wandi.
33 Konso ona otambwidi umbangi wandi, osidi wo e dimbu kiandi* vo Nzambi waludi.
34 Kadi ndiona katuma o Nzambi, mambu ma Nzambi kevova, oyandi ke vanina mwanda mu tezo* ko.
35 O Se ozolele o Mwana, oyekekele lekwa yawonso vana koko kwandi.
36 Ndiona okwikila muna Mwana, una yo moyo a mvu ya mvu; ndiona okolamena Mwana, kemona moyo ko, kansi o makasi ma Nzambi muna yandi kaka mekala.
