Yoane 4:1-54
4 O Mfumu vava kazeye wo vo Afarisi bawidi vo Yesu oviokele Yoane muna kitula wantu s’alongoki yo kubavuba—
2 kana una vo Yesu yandi kibeni kavubidinge ko, kansi alongoki andi kaka—
3 okatukidi kuna Yuda, wele avutuka kuna Ngalili.
4 Kansi diavavanga vo kaviokela muna Samaria.
5 Olueke kuna Sika, e vata dia Samaria, dina lukufi yo ntoto una Yakobo kavana kwa mwan’andi Yosefe.
6 I vana vakala e sima kia Yakobo. O Yesu wau kamwene mabibi ma diata, ovuende vana sima. Se tezo kia ola yasambanu.*
7 O nkento wa Nsamaria wizidi teka maza. Yesu umvovese vo: “Umpana maza yanua kwame.”
8 (Kadi alongoki andi bavuidi kwenda kuna vata mu sumba madia.)
9 O nkento a Nsamaria umvovese vo: “Ongeye u Nyuda, aweyi olombele maza kwa mono nkento a Nsamaria?” (Kadi Ayuda y’esi Samaria ke bawizananga ko.)
10 O Yesu umvutwidi vo: “Kele vo wazaya o lukau lwangovo lwa Nzambi ye ndioyo uvovese vo, ‘Umpana maza yanua kwame,’ nga unlombele, oyandi wadi kuvana maza mamoyo.”
11 O nkento umvovese vo: “E Mfumu, kuna ye lekwa kiatekela maza ko, e sima kiakobama. Ozevo, akweyi metuka maza mama mamoyo?
12 Nga osundidi se dieto Yakobo, ona watuvana e sima, oyandi wanuina kio yo wan’andi ye twelezi yandi e?”
13 O Yesu umvutwidi vo: “Konso ona onua maza mama vuina diaka kemona .
14 Kansi ndiona onua maza mana ikumvana, kemona diaka vuina ko yakwele mvu, o maza mana ikumvana, mekituka se sima kia maza mefusukilanga muna yandi yo kumvana moyo a mvu ya mvu.”
15 O nkento umvovese vo: “E Mfumu, umpana maza momo, kimana yalembi mona diaka vuina, ngatu ngizanga kaka okwaku yateka maza.”
16 Yesu umvovese vo: “Wenda bokela nkaz’aku, nwiza.”
17 O nkento umvutwidi vo: “Kina ye yakala ko.” O Yesu umvovese vo: “Olungidi kwaku wau ovovele vo, ‘Kina ye yakala ko.’
18 Kadi akazi tanu wakala yau, ndiona una yandi owau, ke nkaz’aku ko. Ediadi diakieleka ovovele.”
19 O nkento umvovese vo: “E Mfumu, mbwene wo vo u ngunza.
20 O mase meto vana mongo wau basambilanga, kansi oyeno nuvovele vo o wantu kuna Yerusaleme bafwete sambidilanga.”
21 O Yesu umvovese vo: “E nkento, unkwikila, e ntangwa ikwiza, ke nusambila Se vana mongo wau ko ngatu kuna Yerusaleme.
22 Oyeno nusambilanga ona nulembi zaya; oyeto tusambilanga ona tuzeye, kadi o luvuluzu kwa Ayuda luyantikidi.
23 Kansi e ntangwa ikwiza, i yau yiyi, ina vo asambidi aludi besambila o Se muna mwanda ye ludi, kadi o Se, wantu a mpila yayi kevavanga bansambila.
24 Nzambi i Mwanda, awana bekunsambilanga bafwete kunsambila muna mwanda ye ludi.”
25 O nkento umvovese vo: “Nzeye wo vo Masia okwiza, ona oyikilwa vo Kristu. Avo wizidi, okutusamunwina mawonso.”
26 Yesu umvovese vo: “I mono yuyu ivovananga yaku.”
27 Vana vau alongoki andi balueke, basivikidi wau kemokenanga yo nkento. Kansi ke vakedi muntu ko wavova vo: “Nki ovavanga?” yovo “Ekuma omokenenanga yandi?”
28 O nkento osisidi mvungu andi, wele kuna vata, wele vovesa wantu vo:
29 “Nwiza tala muntu unsamunwini mawonso yavanga. Nga ke yandi ko i Kristu e?”
30 Bakatukidi kuna vata, bezidi kwa yandi.
31 Muna ntangwa yayina, alongoki bandodokele vo: “E Rabi, dia kwaku.”
32 Kansi ubavovese vo: “Ngina ye madia i dia, mana nulembele zaya.”
33 Alongoki bayuvuzianene vo: “Nga muntu untwasidi madia e?”
34 Yesu ubavovese vo: “O madia mame i vanga luzolo lwa ndiona wantuma, yamanisa mpe salu kiandi.
35 Ke wau ko nuvovele vo ngonde yá zisidi, i bosi kikwiza e nkutika e? Inusamunwini vo: Nusengola o meso nwatala e mpatu, zibweke, e nsungi a nkutika ifwene.
36 O nsâdi otambwidi kala mfutu, okutikilanga e mbongo muna moyo a mvu ya mvu, kimana o nkuni yo nsâdi bakembela kumosi.
37 Muna diadi, e diambu edi dialudi: Omosi i nkuni, wankaka nsâdi.
38 Inutumini nwenda kutika ina nulembele sala. Ankaka basadidi, oyeno numwene o wete muna salu kiau.”
39 Esi Samaria ayingi muna vata diadina, bakwikidi muna yandi mu diambu dia nkento ona osidi umbangi vo: “Unsamunwini mawonso yavanga.”
40 Dianu vo, esi Samaria bezidi kwa yandi, banlombele kananga yau, onangini ko lumbu yole.
41 Muna kuma kiaki, wantu ayingi diaka bakwikidi mu kuma kia dina kavovele,
42 bavovese o nkento vo: “Ke tukwikidila kaka mu kuma kia dina ovovele ko; kadi yeto kibeni tukiwididi, tuzeye wo mpe vo muntu ndioyu i mvuluzi a nza kikilu.”
43 Vava kiavioka lumbu yole, okatukidi ko, wele kuna Ngalili.
44 Yesu yandi kibeni osidi umbangi vo, o ngunza ke zitiswanga ko muna yandi nsi.
45 Dianu vo, vava kaluaka kuna Ngalili, Amingalili bantambwidi, wau bamona mawonso kavanga kuna Yerusaleme, kuna lambu, kadi oyau mpe bayenda kuna lambu.
46 I bosi wizidi diaka kuna Kana a Ngalili, kuna kakitulwila maza se vinyu. Kwakala selo kia ntinu, ona wakala yo mwana wayelanga kuna Kafanau.
47 O muntu ndioyo vava kawá vo Yesu wakatuka kuna Yuda, wizidi kuna Ngalili, wele kwa yandi, unlombele kakulumuka, kenda wuka mwan’andi, kadi se kefwa.
48 Kansi, Yesu umvovese vo: “Avo ke numwene sinsu yo masivi ko, ke nukwikila nkutu ko.”
49 Selo kia ntinu umvovese vo: “E Mfumu, nza kulumuka ekolo mwan’ame kafwidi ko.”
50 Yesu umvovese vo: “Wenda kwaku; o mwan’aku una moyo.” Selo okwikidi e diambu kamvovesa Yesu, wele kwandi.
51 Wau kakulumukanga, e ntaudi zandi zizidi kunkika, bavovele vo o mwan’andi una moyo.*
52 Ubayuvuidi kana nkia ola kasasukidi. Bamvovese vo: “E ngianduka zono yankatukidi muna ola ina yansambwadi.”*
53 O se obakwidi wo vo i ola ina Yesu kamvovesa vo: “O mwan’aku una moyo.” Oyandi y’esi nzo andi yawonso bakwikidi.
54 E kiaki i sinsu kiazole kavanga o Yesu, vava kakatuka kuna Yuda yo kwiza ku Ngalili.
Mvovo vana yand'a lukaya
^ I sia vo, tezo kia ola 12.
^ Yovo “osasukidi.”
^ I sia vo, tezo kia ola ya 13.
