Yoane 5:1-47
5 I bosi, kwakala nkinzi a Ayuda; o Yesu otombokele kuna Yerusaleme.
2 Muna Yerusaleme, vana ndambu a Mwelo a Mameme, vena ye zinga kia maza kiyikilwanga muna Kiyibere vo, Beteseda, kiazietwa kwa nlonga tanu mia malunzi.
3 Mûna mwalavalelenge mbevo zayingi, mpofo, mbevo za malu y’akwa mavola.*
4 ——
5 Kansi vakala muntu mosi wayelanga mu mvu 38.
6 Yesu umwene wau kalavalele yo bakula wo vo kolo kiayingi se keyelanga, umvovese vo: “Nga ozolele sasuka e?”
7 O mbevo umvutwidi vo: “E Mfumu, kina ye muntu ko okunkobola muna zinga una maza se mefusuka, avo se nkwenda kaka, owakaka umpitidi kuna ntwala, okulumukini.”
8 O Yesu umvovese vo: “Telama! Bonga lwandu lwaku, wenda kwaku.”
9 Vana vau o muntu osasukidi, obongele lwandu lwandi, oyantikidi kangala.
E lumbu kiakina kia Vundu kiakala.
10 Dianu vo Ayuda bavovese ndiona wawukwa vo: “O unu lumbu kia Vundu, ke diansongi ko mu nata lwandu lwaku.”
11 Ubavutwidi vo: “Ndiona unsaswidi, yandi umpovese vo, ‘Bonga lwandu lwaku, wenda kwaku.’”
12 Banyuvuidi vo: “Nani uvovese vo, ‘Bonga lwandu wenda kwaku’?”
13 Kansi ona wawukwa, kanzeye ko kana nani, kadi o Yesu okotele vana kati kwa ndonga.
14 I bosi, o Yesu unsolwele muna tempelo, umvovese vo: “Tala, osasukidi. Kusumuki diaka ko, kimana walembi luakilwa edi disundidi e mpasi.”
15 O muntu okatukidi kwandi, wele zayisa Ayuda vo i Yesu yuna unsaswidi.
16 Muna diadi, Ayuda batelamene Yesu, wau kavangidi mambu mama muna lumbu kia Vundu.
17 Kansi, o Yesu ubavutwidi vo: “O Se diame osalanga yamu wau, omono mpe yakinu sala.”
18 Ekiaki i kuma Ayuda bayantikidi vanga mawonso kimana bamvonda, e kuma kadi, kakulwidi kaka lumbu kia Vundu ko, kansi oyikidi mpe Nzambi vo Se diandi, uyisidi e betela yo Nzambi.
19 Muna kuma kiaki, o Yesu ubavutwidi vo: “Kieleka, kieleka, inusamunwini vo, ‘o Mwana kalendi kuyivangila diambu ko, kansi dina kemonanga kaka kwa Se. Kadi konso dina kevang’o Se, i dina mpe kevang’o Mwana.
20 Kadi o Se ozolele o Mwana, okunsonga mpe konso dina kevanga, songa kekunsong’e salu iviokele yayi, kimana nwasivika.
21 Konso una o Se kefudila mafwa yo kubavan’o moyo, i una mpe o Mwana kevanina moyo kwa konso ona kazolele.
22 Kadi o Se kefundisa nkutu muntu ko, kansi mfundu awonso ovene wo kwa Mwana,
23 kimana awonso bazitis’o Mwana, e nzitisa bezitisanga o Se. Konso ona olembi zitis’o Mwana, kezitisanga Se ko ona wantuma.
24 Kieleka, kieleka, inusamunwini vo, konso ona owanga diambu diame yo kwikila mpe Ndiona wantuma, una yo moyo a mvu ya mvu, ke fundiswa ko, okatukidi muna fwa wizidi muna moyo.
25 “Kieleka, kieleka, inusamunwini vo, e ntangwa ikwiza, i yau yiyi, ina ikala vo, o mafwa mewa nding’a Mwan’a Nzambi, ana besia sungididi bekal’o moyo.
26 Kadi wauna o Se kekadilang’o moyo muna yandi kibeni,* i una mpe kavene kwa Mwana kakadil’o moyo muna yandi kibeni.
27 Umvene mpe wisa kia fundisa, kadi yandi i Mwan’a muntu.
28 Ke nusiviki dio ko ediadi, kadi e ntangwa ikwiza, ina ikala vo awonso bena muna ziami* bewa nding’andi
29 yo vaika, amimpanga mawete, muna lufuluku lwa moyo, amimpanga mambi, muna lufuluku lwa mfundu.
30 Omono kilendi kuyivangila diambu ko. Konso una ngwidi, i mfundisila, e mfundis’ame yansongi, kadi kivanga luzolo lwame ko, lwa ndiona wantuma kaka.
31 “Avo mono kibeni ikuyisila umbangi, o umbangi wame ke waludi ko.
32 Vena yo wankaka okunsila umbangi, nzeye wo vo umbangi wandi waludi.
33 Oyeno nwatuma wantu kwa Yoane, oyandi osidi e ludi umbangi.
34 Vo i mono kitambula umbangi wa muntu ko, kansi nsamwini mambu mama kimana nwavuluzwa.
35 Oyandi wakala se mini kianlemi yo kezima, oyeno mu fikolo kaka nwazola yangalela muna ntemo andi.
36 Vo i mono, o umbangi ngina wau uviokele una wa Yoane, kadi e salu yavewa kwa Se yalunganesa yo, i yau nsalanga, isiang’o umbangi vo Se wantuma.
37 O Se mpe ona wantuma, yandi kibeni unsididi umbangi. E nding’andi ke nwawidi yo nkutu ko, ngatu mona mpw’andi,
38 e diambu diandi ke dikalanga omo yeno ko, e kuma kadi, ke nukwikidi ko ndiona katuma.
39 “Nuvavululanga e Sono, e kuma kadi, edi nuyindulanga vo i mûna nuvuil’o moyo a mvu ya mvu; i yau isianga umbangi mu kuma kiame.
40 Oyeno ke nuzolele kwiza oku ngina ko nwavua moyo.
41 Kitambula nkembo a wantu ko,
42 kadi ntomene wo zaya vo, o zola kwa Nzambi ke kuna mu yeno ko.
43 Ngizidi muna nkumbu a Se diame, kansi ke nuntambwidi ko. Avo wankaka okwizila muna yandi nkumbu, yandi nutambula.
44 Nkia nkwikila nulenda kwikila, oyeno nutambuziananga nkembo, vo i nkembo utuka kwa Nzambi mosi kaka, wau ke nuvavi?
45 Ke nuyindula ko vo funda ikunufunda kwa Se; vena ye mosi okunufunda, i Mose, ona nusidi e vuvu.
46 Kala vo nwakwikila muna Mose, nwadi kwikila mpe omu mono, kadi wasoneka mu kuma kiame.
47 Avo e sono yandi nkutu ke nukwikidi yo ko, aweyi nukwikidila mana mpovele?”
Mvovo vana yand'a lukaya
^ Yovo “avanguki.”
^ Yovo “una yo lukau lwa moyo muna yandi kibeni.”
^ Sina, “ziami ya luyindulu.”
