Yoane 7:1-52
7 I bosi, Yesu wele kangadila muna Ngalili, kadi kazolele kangadila muna Yuda ko, e kuma kadi, Ayuda bavavidi kumvonda.
2 Kansi o Nkinzi a Ayuda wa Saba* wafinamanga.
3 Dianu vo, aleke andi bamvovese vo: “Katuka vava, wenda kuna Yuda, kimana alongoki aku bamona mavangu mana ovanganga.
4 Kadi ke vena muntu ko ovangilanga mambu kuna sweki, kele vo ozolele zayakana kwa wantu. Avo mambu mama ovanganga, wiyisonga kwa nza.”
5 Kadi aleke andi, ke bakwikilanga muna yandi ko.
6 Dianu, o Yesu ubavovese vo: “E ntangw’ame ke yafwene ko, kansi e ntangw’eno yafwana kala.
7 E nza ke ina ye kuma kia kunumenga ko, mono imengene, kadi isilanga yo umbangi vo mavangu mandi mambi.
8 Oyeno nwenda tomboka kuna lambu; omono ke wau ko itomboka kuna lambu diadi, kadi e ntangw’ame ke yafwene ko.”
9 Vava kabavovese mambu mama, osidi kwandi kuna Ngalili.
10 Kansi, vava aleke andi bavuidi tomboka kuna lambu, i bosi oyandi mpe wele atomboki, kayisonga kwa ndonga ko, kansi ku sweki kaka.
11 Dianu vo, Ayuda bayantikidi kumvava kuna lambu, bavovele vo. “O muntu ndioyo andieyi?”
12 E ndonga iyantikidi yidima kwayingi mu kuma kiandi. Akaka bavovele vo: “Muntu ambote kwandi.” Ankaka vo: “Ve. Ndonga kevukumunanga.”
13 Kansi, muna kuma kia wonga wa Ayuda, ke vakedi muntu ko wamvovelanga vana meso ma ndonga.
14 E lambu vava dialuaka vana kati, o Yesu otombokele kuna tempelo, oyantikidi longa.
15 Ayuda basivikidi, oku vo: “Ondioyu, aweyi kazayidi e Sono, wau kalembele tanga sikola?”*
16 Yesu ubavutwidi vo: “Mana ilonganga ke mame ko, ma ndiona wantuma kaka.
17 Avo muntu ozolele vanga luzolo lwandi, ozaya kana vo e longi dia Nzambi yovo dia mono kibeni.
18 Konso ona ovovela muna ngindu za yandi kibeni, nkembo andi kevavanga; kansi konso ona ovava nkembo a ndiona wantuma, waludi kwandi, o luvunu ke luna muna yandi ko.
19 O Mose kanuvana Nsiku ko e? Kansi vava nwina ke mosi ko walemvokela Nsiku. Ekuma nuzolele kumpondela?”
20 E ndonga ivutwidi vo: “Nkuya una wau. Nani ozolele kuvonda?”
21 Yesu ubavutwidi vo: “Sinsu kimosi kaka mpangidi, yeno awonso nusivikidi.
22 Mose i kuma kanuvanin’o nsiku a zengwa—ke wa Mose ko, kansi wa mase meno—oyeno nuzenga muntu muna lumbu kia vundu.
23 O muntu, avo ozengwa muna lumbu kia vundu muna lembi kulula Nsiku a Mose, ekuma numfungidi makasi mandudi wau yasasula muntu muna lumbu kia vundu e?
24 Nuyambula fundisa mfundis’a ndose, kansi nufundisa kaka mfundis’a unsongi.”
25 I bosi akaka muna esi Yerusaleme, bavovele vo: “Ke yandi ko bevavanga o vond’e?
26 Kansi, tala! mu vova kena va meso ma ndonga, yau ke bamvovesa diambu. Ayadi, nga bazeye wo vo yandi kieleka i Kristu e?
27 Muntu ndioyo, tuzeye kuna katuka; kansi o Kristu vava kekwiza, ke muntu ko ozaya kuna ketuka.”
28 I bosi, una kelonganga muna tempelo, Yesu okazidi vo: “Nunzeye, nuzeye mpe kuna yatuka. Kiayizila mu kani dia mono kibeni ko, kansi Ndiona wantuma waludi, oyeno ke nunzeye ko.
29 Omono inzeye, kadi kwa yandi ntukidi, yandi mpe wantuma.”
30 Muna kuma kiaki, bavavidi kumbaka, kansi ke vakedi ona unsidi moko ko, kadi e ntangw’andi ke yafwene ko.
31 Kansi engi vana vena ndonga bakwikidi muna yandi, bavovele vo: “O Kristu vava kekwiza, nga sinsu yayingi kevanga ivioka ina kavangidi ondioyu e?”
32 Afarisi bawidi wo vo e ndonga bekunyidiminanga muna mambu mama, e nganga zambuta ye Afarisi batumini makesa bambaka.
33 I bosi Yesu ovovele vo: “Yakinu yeno mu fikolo, vitila ngienda kwa Ndiona wantuma.
34 Nukumpava, kansi ke nukunsolola ko, kuna nkala, oyeno ke nulendi ko kwiza ko.”
35 Ayuda bavovazianene vo: “O muntu ndioyu akweyi kekwenda, oyeto twalembi kunsolola? Kwenda kekwenda kwa Ayuda ana bamwangana muna Mingerekia, kalonga Mingerekia e?
36 Aweyi disongele edi kavovele vo, ‘Nukumpava, kansi ke nukunsolola ko, kuna nkala, oyeno ke nulendi ko kwiza ko’?”
37 Muna lumbu kianene, kia mbaninu a lambu, o Yesu otelamene, obokele, oku vo: “Avo muntu omona e vuina, yambula keza kwa mono, kanua.
38 Konso ona okwikilanga omu mono, wauna uvovele e sono: ‘Muna nsi andi a mbundu muvaikila nzadi za maza mamoyo.’”
39 Kansi, ovovele ediadi muna diambu dia mwanda, una betambula ana bekwikilanga muna yandi; kadi o mwanda ke wakivaninwa ko, e kuma kadi o Yesu kakembeso ntete ko.
40 Ankaka muna ndonga, ana bawidi mambu mama, bavovele vo: “Kieleka, ndioyu i Ngunza.”
41 Ankaka bavovele vo: “Ndioyu i Kristu.” Kansi ankaka bavovele vo: “Kristu, nga muna Ngalili ketuka e?
42 Nga e sono ke yivovanga ko vo o Kristu muna mbongo a Davidi ketuka, kuna Beteleme, e vata dina diakala Davidi e?”
43 Dianu vo, e ndonga ivambanene muna diambu diandi.
44 Ankaka vana bena bazolele kumbaka, kansi ke vakedi ona unsidi moko ko.
45 I bosi makesa bavutukidi kuna kwa nganga zambuta ye Afarisi, oyau babavovese vo: “Ekuma nulembele kuntwasila?”
46 O makesa bavutwidi vo: “Ke vena nkutu muntu ko wavova kala nze muntu ndioyo.”
47 Dianu, Afarisi babavutwidi vo: “Oyeno mpe nuvukumwinw’e?
48 Nga mosi muna akuluntu yovo muna Afarisi, okwikidi muna yandi e?
49 E ndonga yayi ilembele zaya o Nsiku, yasibwa.”
50 Nikodemo ona wateka kwiza kwa yandi, una vo mosi muna yau, ubavovese vo:
51 “Nga muna Nsiku eto tulenda fundisa muntu lembi teka kunwa yo zaya dina kavangidi e?”
52 Bamvutwidi vo: “Nki, ongeye mpe u Mungalili e? Nda sati, wazaya wo vo muna Ngalili ke mutuka ngunza ko.”*
Mvovo vana yand'a lukaya
^ Yovo “Sudi.”
^ I sia vo, sikola za kirabini.
^ Muna sono yankaka yankulu itoma bundwanga vuvu, e tini kia 53 yakuna kapu kia 8 tini kia 11, yakatulwa.
