Yoane 8:12-59
8 12 I bosi, Yesu ubasamunwini diaka vo: “Mono i ntemo a nza. Konso ona okundanda kekangadila nkutu mu tombe ko, ntemo a moyo kaka kekala wau.”
13 I dianu Afarisi bamvovese vo: “Ngeye kibeni okuyisila umbangi; umbangi waku ke waludi ko.”
14 Yesu ubavutwidi vo: “Kanele vo, ikuyisila umbangi, waludi o umbangi wame, e kuma kadi, nzeye ko kuna yatuka yo kuna nkwenda. Kansi oyeno ke nuzeye ko ko, kuna yatuka, ngatu kuna nkwenda.
15 Oyeno nufundisanga mfundis’a nitu;* omono kifundisa muntu ko.
16 Kana nkutu vo mfundisi, e mfundis’ame yaludi, e kuma kadi, kina mono mosi ko, kansi o Se ona wantuma una yame.
17 Muna Nsiku eno diasonama vo: ‘O umbangi wa wantu wole waludi.’
18 Omono ikuyisilanga umbangi, o Se mpe ona wantuma, okunsila umbangi.”
19 Bamvovese vo: “O Se diaku andieyi?” Yesu ovutwidi vo: “Omono ke nunzeye ko, ngatu zaya o Se diame. Kala vo nwanzaya, o Se diame mpe nwadi kunzaya.”
20 Muna lundilu dia nzimbu kavovele mambu mama, una kalongelenge muna tempelo. Kansi ke vakala ona wambaka ko, kadi e ntangw’andi ke yafwene ko.
21 Ubavovese diaka vo: “Kwenda nkwenda, oyeno nukumpava, muna masumu meno nufwila. Kuna nkwenda, oyeno ke nulendi ko kwiza ko.”
22 I bosi, Ayuda bavovele vo: “Nga vonda kekuyivonda? Kadi owu kavovele vo, ‘Kuna nkwenda, oyeno ke nulendi ko kwiza ko.’”
23 Ubavovese vo: “Oyeno muna nsi nutuka; omono kuna ntandu ntuka. Oyeno nwa nza yayi; omono kina wa nza ko.
24 I dianu inuvovesèle vo: Muna masumu meno nufwila. Kadi avo nulembi kwikila vo i mono kwame, muna masumu meno nufwila.”
25 Dianu banyuvuidi vo: “Ongeye u nani?” Yesu ubavovese vo: “Ntangw’ame ankatu ifwasanga muna mokena yeno.
26 Mambu mayingi ngina mau mu kunuvovesa yo kunufundisila. Kansi Ndiona wantuma waludi, mana yawa kwa yandi, i mana nsamunanga mu nza.”
27 Oyau ke babakwidi ko vo Se diandi kabasamunwini.
28 I bosi, Yesu ovovele vo: “Vava numanika Mwan’a muntu, i bosi nuzaya wo vo i mono yuyu, omono mpe kikuyivangilanga diambu ko; kansi mana yalongwa kwa Se, i mau kaka nsamuna.
29 Ndiona wantuma wina yame; kangiambwidi mono mosi ko, e kuma kadi, lumbu yawonso mvanganga oma mekunyangidikanga.”
30 Una kavovele mambu mama, ayingi bakwikidi muna yandi.
31 I bosi, Yesu ovovese Ayuda ana bankwikidi vo: “Avo nusikila muna diambu diame, nu alongoki ame kieleka,
32 nuzaya e ludi, e ludi kikunuvevola.”
33 Bamvutwidi vo: “Oyeto tu mbongo ya Abarayama, ke twabundunwa nkutu kwa muntu ko. Aweyi ovovele vo, ‘Nuvevolwa’?”
34 Yesu ubavutwidi vo: “Kieleka, kieleka, inusamunwini vo, konso ona ovola e sumu, i mbundu a sumu.
35 O mbundu ke kalanga mu nzo yakwele mvu ko; o mwana yakwele mvu kekalanga.
36 Dianu vo, o Mwana avo okunuvevola, nuvevoka kikilu.
37 Nzeye wo vo nu mbongo ya Abarayama. Kansi oyeno nuzolele kumponda, e kuma kadi, e diambu diame ke disikilanga omo yeno ko.
38 Mana yamona kwa Se diame, i nsamunanga, kansi oyeno mana nwawá kwa se dieno, i nuvanganga.”
39 Bamvutwidi vo: “O se dieto, Abarayama.” Yesu ubavovese vo: “Kele vo nu wan’a Abarayama, nwadi vanga mavangu ma Abarayama.
40 Kansi owau nuzolele kumponda, mono inusamunwini e ludi kina yawa kwa Nzambi. Abarayama kavanga wo ko.
41 Oyeno mavangu ma se dieno nuvanganga.” Bamvovese vo: “Ke tu wan’a zumba* ko; Se dimosi tuna diau, Nzambi.”
42 Yesu ubavovese vo: “O Nzambi kele vo kakala Se dieno, nga nunzolele, kadi kwa Nzambi yatuka, i dianu nginina ovava. Kiayizila mu kani diame ko, kansi yandi wantuma.
43 Ekuma nulembele bakulwila mana ivovanga? Kadi ke nuzolele wá diambu diame ko.
44 Nkadi ampemba i se dieno, zolela ya se dieno nuzolele vanga. Oyandi, mumponda-muntu tuka kuna lubantiku, kasikila muna ludi ko, e kuma kadi, muna yandi ke muna ludi ko. Vava kevovanga luvunu, muna yandi kibeni i kevovelanga, kadi nkwa luvunu kwandi, se dia luvunu mpe.
45 Omono, wau mpovele ludi, yeno ke nunkwikila.
46 Nani vovo nwina, okunsonga nlembo muna diambu dia sumu? Avo ludi mpovele ekuma nulembele kunkwikidila?
47 Ndiona wa Nzambi, mvovo mia Nzambi kewanga. Kiaki i kuma nulembele wila, e kuma kadi, oyeno ke nwa Nzambi ko.”
48 Ayuda bamvutwidi vo: “Ke kiau ko i kuma tuvovele vo, ‘Ngeye u Nsamaria, nkuya mpe wina wau e’?”
49 Yesu ovutwidi vo: “Kina ye nkuya ko, Se diame kaka izitisa, vo i yeno, ke nunzitisi ko.
50 Kansi omono, kivavanga nkembo a mono kibeni ko; vena ye Ndiona ovavanga wo yo fundisa mpe.
51 Kieleka, kieleka, inusamunwini vo, avo muntu olunda diambu diame, kemona lufwa ko yakwele mvu.”
52 Ayuda bamvovese vo: “Owau tuzeye wo vo nkuya una wau. Abarayama wafwa, ye angunza mpe, kansi edi ovovele vo, ‘Ovo muntu olunda diambu diame, keyeleka lufwa ko yakwele mvu.’
53 Nga osundidi o se dieto Abarayama, ona wafw’e? Ngunza mpe zafwa. Ongeye nani okuyikitulanga?”
54 Yesu ovutwidi vo: “Avo iyikembese, o nkembo ame wankatu. Se diame okunkembesanga, ona nuyikidi vo Nzambi eno.
55 Ke nunzeye mpe ko, kansi omono, inzeye. Avo mpovele vo, kinzeye ko, ozevo nkitukidi nkwa luvunu nze yeno. Kansi inzeye, ilundanga mpe diambu diandi.
56 O se dieno Abarayama wayangalela e vuvu kia mona e lumbu kiame, kamona kio yo yangalala.”
57 I bosi, Ayuda bamvovese vo: “Ongeye kuna ye mvu 50 ko, nga wamona Abarayama e?”
58 Yesu ubavovese vo: “Kieleka, kieleka, inusamunwini vo, vava ke kiawutukidi Abarayama ko, omono yakikadila.”
59 Babongele matadi bantuba, kansi Yesu oswekamene, okatukidi muna tempelo.
Mvovo vana yand'a lukaya
^ Yovo “muna nsiku mia wantu.”
^ Muna Kingerekia, por·neiʹa. Tala Nsas’a Mvovo.
