Yoane 9:1-41
9 Una keviokanga, omwene muntu una vo mpofo tuka kawutukila.
2 Alongoki andi banyuvuidi vo: “E Rabi, nani wasumuka wau kawutukila mpofo, yandi yovo se diandi yo ngudi andi?”
3 Yesu ovutwidi vo: “Ondioyu kasumuka ko, ngatu se diandi yo ngudi andi, kansi ediadi diavangama kimana e salu kia Nzambi kiamoneka omu yandi.
4 Tusala kaka salu ya Ndiona wantuma, wau kuna mwini; o fuku vava ukwiza, ke vekala muntu ko olenda sala.
5 Ekolo ngina ova nza, i ntemo a nza.”
6 Vava kavovele mambu mama, otawidi mete ova ntoto, ozowele nteke a mete, okusidi nteke muna meso mandi,
7 umvovese vo: “Wenda, wayisukula vana zinga kia Siloa (dina diasekolwa vo, “Tumwa”). Wele, wiyisukwidi, wizidi amoni.
8 I bosi, esi belo kiandi y’awana bateka kumona vava kalombanga, bavovele vo: “Ke yandi ko wafongelenge muna nzila yo lomb’e?”
9 Ankaka bavovele vo: “I yandi ndioyo.” Ankaka bavovele vo: “Ve, fwana kaka kamfwene.” Oyandi vo: “I mono kwame.”
10 Dianu banyuvuidi vo: “O meso maku aweyi matemokene?”
11 Ovutwidi vo: “O muntu, nkumbu andi Yesu, ozowele nteke, okusidi yo omu meso mame, umpovese vo, ‘Wenda kuna Siloa, wayisukula.’ Ngiele, ikisukwidi, mbwene.”
12 Bamvovese vo: “Andieyi?” Ovovele vo: “Kizeye kwame ko.”
13 Batwese ona wateka kala mpofo kwa Afarisi.
14 E lumbu kina o Yesu kazowa e nteke yo temona meso mandi, lumbu kia Vundu kiakala.
15 Dianu vo, Afarisi banyuvuidi diaka e mbona kamwene. Ubavovese vo: “Nteke kasidi omu meso mame, ikisukwidi, mbwene.”
16 Afarisi akaka bavovele vo: “O muntu ndioyo katùka kwa Nzambi ko, kadi ke lundanga lumbu kia Vundu ko.” Ankaka bavovele vo: “O muntu wina vo nsumuki, aweyi kalenda vangila sinsu ya mpila yayi?” Bavambanini.
17 Bavovese diaka o mpofo vo: “Adieyi ovova mu kuma kiandi, wau katemwene meso maku?” Ovovele vo: “Yandi i ngunza.”
18 Kansi, Ayuda ke bakwikidi dio ko vo mpofo kakala, owau omwene, yavana babokele se diandi yo ngudi andi.
19 Babayuvuidi vo: “Ndioyu i mwan’eno, ona nuyikanga vo mpofo kawutuk’e? Ozevo, aweyi kemwenanga owau?”
20 O se diandi yo ngudi andi bavutwidi vo: “Tuzeye wo vo ndioyu i mwan’eto, mpofo kawutuka.
21 Kansi, e mbona kemonanga owau, ke tuzeye yo kweto ko; ngatu zaya kana nani otemwene meso mandi. Nunyuvula. Se mbuta kwandi. Yandi kibeni okuyivovela.”
22 O se diandi yo ngudi andi bavovele mambu mama, e kuma kadi wonga wa Ayuda bamwene, Ayuda bawizana kala vo, avo muntu otambulwila vo yandi i Kristu, kafwete yingwa muna sambilu.
23 Kiaki i kuma o se diandi yo ngudi andi bavovèle vo: “Se mbuta kwandi. Nunyuvula.”
24 Muna kuma kiaki, babokele mu nkumbu ina yezole ndiona wakala mpofo, bamvovese vo: “Vana nkembo kwa Nzambi; tuzeye wo vo o muntu ndioyo nsumuki.”
25 Ovutwidi vo: “Avo nsumuki, kizeye wo kwame ko. Diambu dimosi kaka nzeye, mpofo yakala, kansi owau mbwene.”
26 I bosi, bamvovese vo: “Aweyi kàvangidi? Aweyi katemwenene meso maku?”
27 Ubavutwidi vo: “Inusamunwini kala, yeno ke nuwe. Ekuma nuzolele wo wila diaka? Oyeno mpe nuzolele kituka alongoki andi e?”
28 Bamvezele, oku vo: “Onge u nlongoki andi, kansi oyeto tu alongoki a Mose.
29 Tuzeye wo vo o Nzambi wavova kwa Mose, kansi muntu ndioyo, ke tuzeye kweto ko kuna katùka.”
30 Oyandi ubavutwidi vo: “Diasivi kikilu wau vo ke nuzeye ko kuna katùka, kansi yandi otemwene meso mame.
31 Tuzeye wo vo Nzambi kewilanga asumuki ko, kansi avo muntu Nzambi kevuminanga yo vanga mpe luzolo luandi, yandi kewila.
32 Tuka kuna nz’ankulu ke twawidi wo ko vo muntu otemwene meso ma muntu wawutuka mpofo.
33 O muntu ndioyo, kele vo katuki kwa Nzambi ko, kadi lenda vanga diambu diadi ko.”
34 Bamvutwidi vo: “Ongeye wawutukila muna masumu, se ngeye okutulong’e?” Bamvaikisi kuna mbazi!
35 Yesu owidi wo vo bamvaikisi kuna mbazi, vava kansolwele, umvovese vo: “Nga okwikidi muna Mwan’a muntu e?”
36 Oyandi ovutwidi vo: “Nani e Mfumu, kimana yakwikila muna yandi?”
37 Yesu umvovese vo: “Umwene, i yandi ndioyu okumokenesanga.”
38 Ovovele vo: “E Mfumu, nkwikidi.” I bosi, unkundidi.
39 Yesu ovovele vo: “Muna mfundu wau yayizila ova nza yayi, awana ke bemonanga ko, bamona, awana bemonanga bakituka se mpofo.”
40 Afarisi ana bakala yandi, bawidi mambu mama, bamvovese vo: “Oyeto mpe tu mpofo e?”
41 Yesu ubavovese vo: “Kele vo nu mpofo, nga ke nuna ye sumu ko. Kansi owau nuvovele vo, ‘Mona tumonanga.’ Nwakinu muna sumu dieno.”
