Yuda 1:1-25
1 Yuda, wa ntaudi a Yesu Kristu yo nleke a Yakobo, kuna kwa awana basolwa, ana bazolwa kwa Nzambi wa Se yo lundwa muna kuma kia Yesu Kristu:
2 Yambula nkenda, luvuvamu yo zola kwawokela omo yeno.
3 Azolwa, kanele vo ngina ye tima dia kunusonekena oma ma luvuluku tuna lwau e ntwadi, owau mbwene vo diambote yanusonekena muna kunuwondelela kimana lwanwana e vit’a ngolo mu kuma kia lukwikilu luna lwavewa emvimba kuna kw’aveledi.
4 E kuma kadi wau nulembele wo zaya, wantu ankaka bakotele vovo lwina, ana bazengelwa tumbu kiaki tuka kuna nz’ankulu mun’owu wa Sono; mindembi vumina Nzambi, bakitwidi e nsambu za Nzambi eto se nswa wavangila mavangu mansoni* yo kondwa kwikizi kwa Yesu Kristu wa Mfumu eto ona watusumba.
5 Kanele vo lutomene zaya mawonso mama, nzolele kunusungamesa vo Yave vava kavuluza nkangu muna nsi a Engipito, wafwasa awana balembi songa lukwikilu.
6 Ambasi mpe, ana balembi tatidila fulu kiau,* bayambula e kalu yau, wabalundila muna tuvambu twa mvu ya mvu, muna tombe kin’e bu, muna lumbu kianene kia mfundisa.
7 Diau adimosi mpe, esi Sodomo ye Ngomora ye esi mavata mazieta mo bayivana emvimba muna zumba* yo landa e zolela ya nitu; basiwa se mbandu a lulukisu kwa yeto wau batambula e tumbu kia tiya twa mvu ya mvu.*
8 Wantu awaya mpe muna ndozi zau, besafulanga e nitu yo veza e wisa yo tianguna akwa zitu.
9 Kansi, Mikaele wa mbasi ambuta vava katantana yo Nkadi ampemba yo filana mpaka muna diambu dia vimbu dia Mose, kakabuka ko muna kunzengela nzengo za lufwasu ngatu kuntianguna, kansi wavova vo: “Yambula Yave kasemba.”
10 Kansi, wantu awaya betiangunanga mawonso ke bebakulanga ko. Mana bazayidi muna kiwuntu kiau nze bulu ikondelo nyindu, i mau bekuyisafulwilanga.
11 Diavonza kikilu kwa yau, kadi balende muna nzil’a Kaini, balundumukini muna vilwa wa Bilami mu vava o nsendo, babukumukini muna moko kia ukolami wa Kora!
12 Awaya i matadi maswekama muna maza, wau bedianga yeno vamosi muna malambu meno ma nzolani, avungudi bekuyidikilanga kondwa wonga; matuti makondwa maza mefilakeswa kwa tembwa oku yo kuna; nti miakondwa bundu kuna mfoko a sivu,* miafwa mfwa zole* yo vuzwa;
13 bena nze mavuku ma kalunga mevetanga e mvindu kuna kumu eyi ikubafusulwisa e nsoni; ntetembwa ke zina ye nzil’a singama ko, zina zalundilwa e ndombe a tombe yakwele mvu.
14 Elo, o Kanoke wa nsambwadi muna luvila lwa Adami, wasakula mpe mu kuma kiau vava kavova vo: “Tala, o Yave wizidi ye yazi ya aveledi andi
15 kafundisa awonso, katumba mindembi vumina Nzambi awonso muna mavangu mau mawonso mambi, mana bavangila kuna bi wawonso, ye muna mambu mawonso mansoni mana asumuki awaya mindembi vumina Nzambi bavova mu kuma kiandi.”
16 Wantu awaya ayidimi, beyidimanga mu kuma kia mpila zingu kiau, belandanga e zolela yau, e nua miau mivovanga mambu mampwena-mpwena, ekolo besanisinanga* ankaka muna wete dia yau kibeni.
17 Vo i yeno, azolwa, nusungamena mana mateka vovua* kwa ntumwa za Mfumu eto Yesu Kristu,
18 una banuvovesa vo: “Muna lumbu yambaninu mukwiza akwa luvezo, belanda zolela yau yambi.”
19 I yau ana besianga mpambula, akwa kinitu, bakondwa kimwanda.*
20 Vo i yeno azolwa, nukumika lukwikilu lweno lwavauka yo samba muna mwand’avelela,
21 kimana nwasikila muna zola kwa Nzambi, ekolo nuvingilanga e nkenda za Mfumu eto Yesu Kristu ye vuvu kia moyo a mvu ya mvu.
22 Nukwamanana fwila ankaka e nkenda ana bena yo lukatikisu;
23 nubavuluza muna kubazavuna vana tiya. Nufwilanga akaka e nkenda, nuvanganga wo kuna wonga, wau numenganga nkutu mvuatu una wasafulwa kwa nitu.
24 Kuna kwa ndiona olenda kunulunga-lunga nwalembi tá sakuba yo kunutelamesa vana ndose a nkembo andi* kondwa twangu,* kuna kiese kiayingi,
25 kuna kwa Nzambi mosi kaka wa Mvuluzi eto muna Yesu Kristu wa Mfumu eto, nkembo, nene, nkuma ye wisa tuka muna tandu yavioka y’owau yamu mvu ya mvu. Amen.
Mvovo vana yand'a lukaya
^ Muna Kingerekia, a·selʹgei·a. Tala Nsas’a Mvovo.
^ I sia vo, kiyekwa kiau kuna zulu.
^ Tala Nsas’a Mvovo.
^ I sia vo, lufwasu lwa mvu ya mvu.
^ Yovo “mbangala.”
^ Yovo “fwa yakwele mvu.”
^ Yovo “besivikisanga.”
^ Yovo “mambu masakulwa.”
^ Sina, “o mwanda.”
^ Yovo “muna ngiz’a nkembo andi.”
^ Yovo “mvindu.”
