Wantete wa Paulu Kuna kwa Esi Korinto 12:1-31
12 Ampangi, muna diambu dia tukau twa mwanda,+ kizolele ko vo nualembi wo zaya.
2 Nuzeye wo vo vava nuakala wantu a zula,* nuavukumunuanga kwa teke+ ke ivovanga ko yo kwenda konso kuna nuafilwanga.
3 Owau nzolele nuazaya wo vo ke vena muntu ko ovovelanga muna mwand’a Nzambi, kavova vo: “Yesu wasibwa!” ke vena mpe muntu ko olenda vova vo: “Yesu i Mfumu!” nanga muna mwand’avelela kaka.+
4 Vena ye tukau twaswaswana, kansi mwanda wau umosi;+
5 vena ye uselo waswaswana,+ kansi Mfumu yandi mosi;
6 vena ye salu yaswaswana, kansi Nzambi yandi mosi ona ovanganga mawonso muna awonso.+
7 Kansi, o lusengomoko lwa mwanda, luvewanga kwa konso muntu muna wete dia akaka.+
8 Kadi mosi oveno diambu dia* ngangu muna mwanda, wankaka mpov’a zayi muna mwanda wau umosi,
9 wankaka lukwikilu+ muna mwanda wau umosi, wankaka tukau twa nguka+ muna mwanda wau umosi,
10 kansi wankaka mavangu ma nkuma,+ wankaka sakula, wankaka umbakuzi wa mambu mavumunuinua,+ wankaka ndinga zaswaswana+ ye wankaka nsekol’a ndinga.+
11 Kansi mawonso mama, mwanda wau umosi uvanganga mo, uvananga kwa konso muntu mun’owu wa luzolo lwandi.
12 Kadi wauna e nitu mosi inina ye yîkwa yayingi, e yîkwa yawonso ya nitu yayina, kana una vo yayingi, i nitu mosi kaka,+ i wau wina mpe Kristu.
13 Kadi yeto awonso muna mwanda wau umosi twavubilwa yo kituka se nitu mosi, kana tu Ayuda, kana tu Mingerekia, kana tu abundu yovo avevoki, yeto awonso mwanda wau umosi twatambula.
14 Dianu vo, e nitu ke kîkwa kimosi ko, kansi yîkwa yayingi.+
15 Avo kulu kuvovele vo: “Wau vo ki koko ko, ki kîkwa kia nitu ko,” muna diadi nga ke kîkwa kia nitu ko e?
16 Avo kutu kuvovele vo: “Wau vo ki disu ko, ki kîkwa kia nitu ko,” muna diadi nga ke kîkwa kia nitu ko e?
17 Kele vo e nitu yawonso yakala se disu, o kutu akweyi kwadi kala? Avo nitu yawonso yakala se kutu, o nzunu akweyi wadi kala?
18 Kansi owau, Nzambi osidi konso kîkwa kia nitu wauna kayangalele.
19 Kele vo yîkwa yawonso yakala se kîkwa kimosi, e nitu akweyi yadi kala?
20 Kana una vo e yîkwa yayingi, kansi e nitu imosi kaka.
21 Disu ka dilendi vova kwa koko ko vo: “Kivuidi mfunu ko,” yovo ntu wavova kwa malu vo: “Kinuvuidi mfunu ko.”
22 Kuna diak’e sambu, e yîkwa ya nitu ina ibadikilwanga vo yatovoka, mfunu ina,
23 e yîkwa ya nitu ina tubadikilanga vo yakondwa o zitu, i yau tutoma zitisanga,+ e yîkwa ina ke yatoma vienga ko, i yau tutoma viengesanga,
24 vo i yîkwa yeto yavienga ke ina ye mfunu waviengeswa ko. Kansi, o Nzambi wavanga e nitu, wavana o zitu kwa yîkwa ina yakondwa o zitu,
25 kimana e nitu yalembi kala mpambula, kansi konso kîkwa kiatokanenanga o wete wa nkwandi.+
26 Avo kîkwa kimosi kimwene mpasi, e yîkwa yawonso imwena mpasi kumosi;+ avo kîkwa kimosi kikembeso, yîkwa yawonso ikembela kumosi.+
27 Oyeno nu nitu a Kristu,+ konso muntu muna yeno i kîkwa kimosi.+
28 Nzambi watumbika ankaka muna nkutakani, kôsi, antumwa;+ kôle, angunza;+ tatu, alongi;+ i bosi mavangu mankuma;+ tukau twanguka;+ asadisi; ngangu za twadisa;+ ye ndinga zaswaswana.+
29 Nga awonso antumw’e? Nga awonso angunza e? Nga awonso alongi e? Nga awonso bevanganga mavangu mankuma e?
30 Nga awonso akwa tukau twanguk’e? Nga awonso ndinga zaswaswana bevovang’e?+ Nga awonso asekodi e?+
31 Dianu vo, nusiamanana vava* tukau twanene.+ Omono ikunusonga e nzila iviokele mawonso.+
Mvovo vana yand'a lukaya
^ I sia vo, mindembi-kwikila.
^ Yovo “nsangu za.”
^ Yovo “nuvavanga kuna vema.”
