Wantete wa Ntinu 10:1-29
10 O ntinu ankento a Seba vava kawá e nsangu mu kuma kia Solomo muna diambu dia nkumbu a Yave,+ wizidi kuntonta muna yuvu yampimpita.*+
2 Olweke muna Yerusaleme ye ndong’ayingi ya wantu,+ samo zanatanga mazi ma balasamu+ ye ulolo wa wolo ye matadi mantalu. Ukisunzwidi kwa Solomo, umvovese mawonso makala muna ntim’andi.
3 Solomo ovene mvutu za yuvu yandi yawonso. Ke vakala diambu diasunda e mpasi* ko kwa ntinu muna kunsasila.
4 Vava ntinu ankento a Seba kamona ngangu zawonso za Solomo+ ye nzo ina katunga,+
5 ye madia vana meza mandi,+ mpila ina bavuandilanga e ntaudi zandi, salu kia asadi ana basianga madia vana meza, mvuatu miau, atambiki a mbungwa ye yimenga ya ngioka katambikanga ntangwa zawonso muna nzo a Yave, kakala diaka y’edi diavova ko.*
6 Ovovele kwa ntinu vo: “E nsangu yawidi kuna nsi ame mu kuma kia mavangu maku* ye ngangu zaku, za ludi.
7 Kansi, kiakwikila zo ko yavana ngizidi kuyimwena omu meso mame. Dialudi vo kana nkutu ndambu ke bansamunuina yo ko. E ngangu zaku ye kimvuama kiaku kisundidi oma yawidi.
8 Kiese kwa wantu aku, kiese kwa selo yaku ana betelamanga ova ndose aku ntangwa zawonso yo wá e ngangu zaku!+
9 Yambula Yave wa Nzambi aku kakembelwa,+ ona uyangalele yo kuvuandisa vana kunda kia kimfumu kia Isaele. Wau vo zola kwa Yave muna Isaele kwa mvu ya mvu, utumbikidi se ntinu wasikidisa unsongi ye ziku.”
10 Ovene kwa ntinu 120 ma talanta* za wolo ye ulolo wa mazi ma balasamu+ ye matadi mantalu.+ Solomo wa Ntinu kasidi vewa ulolo wa mazi ma balasamu ko nze mana kavewa kwa ntinu ankento a Seba.
11 E nzaza za Kirami zina zatwasa wolo tuka kuna Ofire,+ zitwese mpe ulolo wa mabaya+ ma alengume tuka kuna Ofire ye matadi mantalu.+
12 Muna mabaya ma alengume, o ntinu ovangidi malunzi ma nzo a Yave y’oma ma nzo a ntinu,* nsambi ye masikilu ma ayimbidi.+ E mabaya mama ma alengume ke masidi twaswa diaka ko ngatu moneka yamu unu kiaki.
13 Vana ntandu a lekwa yawonso Solomo wa Ntinu kavana kwa ntinu ankento a Seba muna ntim’andi amvevo,* umvene mpe yawonso kazolele ye ina kalombele. I bosi, ovaikidi, ovutukidi kuna nsi andi ye ntaudi zandi.+
14 E zitu dia wolo katambulanga o Solomo muna mvu mosi, 666 za talanta za wolo,+
15 vana ntandu a wolo una akiti batwasanga ye nluta mia ateki y’emi mia ntinu miawonso mia Arabia ye nguvulu za nsi.
16 Solomo wa Ntinu ovangidi 200 za ngubu zanene za wolo+ wasangwa e mbodi (konso ngubu yakala ye 600 za sekele* za wolo)+
17 ye 300 za ngubu zakete* za wolo wasangwa e mbodi (mina* tatu mia wolo miakala muna konso ngubu yakete). Ntinu osidi zo muna Nzo ya Mfind’a Lebanone.+
18 Ntinu ovangidi mpe kunda kianene kia kimfumu kia meno ma nzamba,+ olengele kio wolo wakenzwa.+
19 Vakala ye sikada ya ntombokelo sambanu muna lwaka vana kunda, kuna nim’a kunda kia kimfumu kwakala ye fukwa kiavindumuka, kiakala ye moko mole muna ndambu, vana konso ndambu vatelameswa teke kimosi kia nkosi.+
20 Nkosi 12 zasiwa vana ntombokelo sambanu, nkosi mosi mosi kuna konso sambu dia ntombokelo. Ke mwakala kintinu ko kiavanga e kunda kia kimfumu nze kiakina.
21 E mbungwa zawonso za Solomo wa Ntinu za wolo, e salanganu yawonso ya Nzo a Mfind’a Lebanone+ ya wolo walembi sangwa lekwa. Ke mwakala salanganu kia palata ko, kadi muna lumbu ya Solomo+ e palata ke yakala mfunu ko.
22 Kadi o ntinu wakala ye nzaza zayingi za Tasisi+ muna kalunga zayendanga ntwadi ye nzaza za Kirami. Muna mvu tatu e nzaza za Tasisi nkumbu mosi zatwasanga wolo, palata, meno ma nzamba,+ nkewa ye nuni ziyikilwanga vo pavone.
23 Solomo wa Ntinu waluta ntinu miawonso mia nza muna kimvuama+ ye ngangu.+
24 Wantu a nza yawonso bavavanga kwenda mokena* yo Solomo mu wá ngangu zandi, zina Nzambi kasia muna ntim’andi.+
25 Bantwasilanga tukau—salanganu ya palata, ya wolo, mvuatu, nuaninua, mazi ma balasamu, mvalu ye mula—bavanganga wo mvu ke mvu.
26 Solomo okwamanene wokesa makalu ma vita ye mvalu;* okedi ye 1.400 za makalu ma vita, 12.000 ma mvalu,*+ osidi mio muna mbanza za makalu ma vita, lukufi yo ntinu muna Yerusaleme.+
27 Ntinu owokese palata muna Yerusaleme nga matadi, e mabaya ma nsedele nga nsanda muna Sefela.+
28 E mvalu mia Solomo ku Engipito miatukanga, akiti a ntinu basumbanga e buka ya mvalu* muna ntalu yasikidiswa.+
29 Konso kalu dia vita diasumbilwanga mu 600 za sekele za palata muna Engipito, konso mvalu wafwanga 150; i bosi oyau mpe batekanga mio kwa atinu awonso a Anekete+ ye atinu a Suria.
Mvovo vana yand'a lukaya
^ Yovo “muna ngwala.”
^ Mvovo wa sina: “ke vakal’edi diaswekama.”
^ Mvovo wa sina: “o moyo andi uzezele.”
^ Yovo “mvovo miaku.”
^ Yovo “lûmbu.”
^ Mvovo wa sina: “mun’owu wa koko kwa Solomo wa ntinu.”
^ E ngubu zakete zisadilwanga kwa akwa mfumba.
^ Mvovo wa sina: “vana ndose a.”
^ Yovo “akwa mvalu.”
^ Yovo “akwa mvalu.”
^ Nanga, “tuka kuna Engipito ye Koa. Akiti a ntinu basumbanga mio kuna Koa,” nanga kuna Kilikia.
