Wantete wa Ntinu 14:1-31
14 Muna ntangwa yayina, Abiya wa mwan’a Yerobame oyelele.
2 Yerobame ovovese nkaz’andi vo: “Dodokolo, telama, soba mpw’aku walembi zayakana vo u nkaz’a Yerobame, wenda kuna Silo. Akiya wa ngunza una kûna. Yandi wampovesa vo yakala se ntinu a nkangu wau.+
3 Nata mbolo kumi, yimbolo-mbolo yayokwa ye bungwa kia wiki, ukisunzula kwa yandi. Yandi okuvovesa dina dibwila mwana.”
4 Nkaz’a Yerobame ovangidi dina kavovele. Otelamene, wele kuna Silo+ yo lwaka kuna nzo ya Akiya. O Akiya kamonanga diaka ko, meso mandi mafwa mu kuma kia kinunu.
5 Kansi, Yave ovovese Akiya vo: “O nkaz’a Yerobame okwiza kwa ngeye kayuvula oma ma mwan’andi, kadi wayela kena. Ikuzayisa dina ofwete kumvovesa.* Vava kelwaka, vuna kevuna vo ke yandi ko.”
6 Akiya vava kawidi nsindu miandi vana mwelo, ovovele vo: “E nkaz’a Yerobame, kota kwaku. Ekuma ovunini vo ka ngeye ko e? Ntuminu kimana yazayisa e nsangu zambi.
7 Wenda, vovesa Yerobame vo, ‘I wau wuwu kavovele o Yave wa Nzambi a Isaele: “Mono yatelamesa vana vena nkangu aku yo kukitula se mfidi a nkangu ame Isaele.+
8 Yakatula kintinu muna nzo a Davidi, yavana kio kwa ngeye.+ Kansi, kwafwanana ko ye Davidi wa selo kiame ona walemvokela nkanikinu miame yo kundanda ye ntim’andi wawonso, owu wansongi kaka kavanga vana meso mame.+
9 Kansi, ongeye olutidi vanga e mbi ke mu awonso ko ana bàvita, ukivangidi nzambi ankaka ye teke ya sengwa* muna kunkendeleka+ yo kumfila nima.+
10 Muna kuma kiaki, mpasi itwasa muna nzo a Yerobame, fukisa ifukisa emvimba* wan’amakala* awonso a nzo a Yerobame muna Isaele, kumosi yo ntovoki ye ndiona okondelo nsadisi. Komba ikomba nzo a Yerobame+ wauna ukombelwelanga e mbole yavana imana!
11 Konso muntu muna nzo a Yerobame ofwila muna mbanza, mbwa zikundia; konso ona ofwila muna kiana, nuni za zulu zikundia, kadi Yave ovovele wo.”’
12 “Owau, telama, wenda kuna nzo aku. Vava e tambi yaku idiata muna mbanza, mwana fwa kefwa.
13 Aneyisaele awonso bekundila yo kunzika, kadi yandi kaka ozikwa mu ziami muna nzo a Yerobame, kadi muna nzo a Yerobame, yandi kaka osolokele y’edi diambote oku kwa Yave wa Nzambi a Isaele.
14 Tuka lumbu kiakina, Yave obundumuna ntinu andi muna Isaele ona ofwasa* nzo a Yerobame.+ Owau mu vangama se dina.
15 Yave owanda Isaele nze tutu divuembanga muna maza, ovuza Isaele mwamu nsi yayi yambote kavana kwa mase mau+ yo kubamwanganesa kuna mvivu a simu dia Nzadi,*+ kadi bavangidi mavindi mavauka*+ yo kendeleka Yave.
16 Obembola Isaele muna kuma kia masumu ma Yerobame ye masumu mana kasumukisa Isaele.”+
17 Muna diadi, nkaz’a Yerobame otelamene, wele kwandi, olweke kuna Tiresa. Vava kalweke vana mwelo a nzo, mwana ofwidi.
18 Banzikidi, Isaele yawonso bandididi mun’owu wa diambu dia Yave dina kavovele muna selo kiandi Akiya wa ngunza.
19 Mambu mankaka ma lusansu lwa Yerobame, una kanuanina e vita+ ye ngiala kayala, masonama muna nkand’a lusansu lwa ntinu mia Isaele.
20 Mvu 22 i kolo* kayala o Yerobame, i bosi olele yo mase mandi;+ Nadabi wa mwan’andi oyantikidi yala vana fulu kiandi.+
21 Muna ntangwa yayina, Rekabame wa mwan’a Solomo oyantikidi yala muna Yuda. Rekabame mvu 41 kakala miau vava kayantika yala, mvu 17 kayala muna Yerusaleme, e mbanza ina Yave kasola+ muna makanda mawonso ma Isaele kimana kasia mo e nkumbu andi.+ E nkumbu a ngudi a Rekabame, Nama wa musi Amone.+
22 Yuda wavanga mambu mambi vana meso ma Yave,+ muna masumu mau baluta kumfungisa makasi ke mu mana bavanga mase mau ko.+
23 Batungidi mpe mabata, malunzi mavauka ye kuyitelamesena mavindi mavauka*+ muna miongo miawonso+ ye kuna nsi a nti miawonso miasavuka.+
24 Muna nsi mwakala mpe wan’amakala bakala se akembi a tempelo.+ Bavanganga mavangu mawonso ma ngemi mana bavanga e zula ina Yave kayinga vana vena Aneyisaele.
25 Muna mvu wa tanu wa luyalu lwa Rekabame wa Ntinu, Sisaki+ wa ntinu a Engipito wizidi nuanisa Yerusaleme.+
26 Obongele lusalu lwa nzo a Yave ye lusalu lwa nzo a* ntinu.+ Obongele yawonso, kumosi ye ngubu zawonso za wolo zina kavanga o Solomo.+
27 Muna kuma kiaki, Rekabame wa Ntinu ovangidi ngubu za nsongo yo vingisa zo vana fulu kia ngubu za wolo, ovene zo kwa mfumu za ayingidi* ana bayingilanga e mwelo a nzo a ntinu.
28 O ntinu konso ntangwa kakotanga muna nzo a Yave, ayingidi banatanga ngubu, i bosi bavutulanga zo muna suku dia ayingidi.
29 Mambu mankaka ma lusansu lwa Rekabame ye mawonso kavanga, nga ke masonama ko muna nkand’a lusansu lwa ntinu mia Yuda?+
30 Vakala kaka vita vana vena Rekabame yo Yerobame.+
31 Rekabame olele yo mase mandi, ozikilu yo mase mandi muna Mbanz’a Davidi.+ E nkumbu a ngudi andi, Nama wa musi Amone.+ Mwan’andi Abiyami*+ oyantikidi yala vana fulu kiandi.
Mvovo vana yand'a lukaya
^ Yovo “Owu y’owu ofwete kunzayisa.”
^ Yovo “teke yazunzwa.”
^ Mvovo wa sina: “kendona ikendona.”
^ Mvovo wa sina: “ndiona osubilanga muna yaka.” Mvovo a luvezo muna Kiyibere, wan’amakala uyikanga.
^ Mvovo wa sina: “okendona.”
^ I sia vo, Uferate.
^ Tala Nsas’a Mvovo.
^ Mvovo wa sina: “lumbu.”
^ Tala Nsas’a Mvovo.
^ Yovo “lûmbu lwa.”
^ Mvovo wa sina: “atikuni; alundumuki.”
^ Oyikilwanga mpe vo “Abiya.”
