Wantete wa Ntinu 15:1-34
15 Muna mvu una wa 18 wa luyalu lwa Yerobame+ wa Ntinu wa mwan’a Nebate, Abiyami oyantikidi yala muna Yuda.+
2 Mvu tatu kayala muna Yerusaleme. E nkumbu a ngudi andi, Maka+ wa ntekelo a Abisalome.
3 Wakangalela muna masumu mawonso ma se diandi, ntim’andi ke wasikila ko muna Yave wa Nzambi andi, nze una wasikidila o ntim’a Davidi wa nkulu andi.
4 Kansi, muna kuma kia Davidi,+ o Yave wa Nzambi andi wamvana mwinda muna Yerusaleme,+ wavingisa mwan’andi vana fulu kiandi yo sikidisa Yerusaleme.
5 Kadi Davidi wavanga mambu mansongi vana meso ma Yave, e lumbu yawonso ya zingu kiandi, kasidi vengomoka ko muna nkanikinu mia Nzambi, nanga muna diambu dia Uriya wa Nkete kaka.+
6 Vakala e vita vana vena Rekabame yo Yerobame e lumbu yawonso ya zingu kiandi.+
7 Vo i mambu mankaka ma lusansu lwa Abiyami ye mawonso kavanga, nga ke masonama ko muna nkand’a lusansu lwa ntinu mia Yuda?+ Vakala diaka e vita vana vena Abiyami yo Yerobame.+
8 Abiyami olele yo mase mandi, banzikidi muna Mbanz’a Davidi; mwan’andi Asa+ oyantikidi yala vana fulu kiandi.+
9 Muna mvu una wa 20 wa luyalu lwa Yerobame wa Ntinu a Isaele, Asa oyantikidi yala muna Yuda.
10 Mvu 41 kayala muna Yerusaleme. E nkumbu a nkak’andi ankento Maka,+ wa ntekelo a Abisalome.
11 Asa wavanga mambu mansongi vana meso ma Yave,+ wauna Davidi wa nkulu andi kavanga.
12 Oyingidi akembi amakala a tempelo muna nsi,+ okatwidi teke yawonso yangemi* yavanga mase mandi.+
13 Okatwidi nkutu Maka+ wa nkak’andi vana fulu kia ntinu ankento wa ngudi a ntinu,* kadi wavanga teke kia ngemi mu kuma kia nsambil’a vindi diavauka.* Asa obangwidi teke kiandi kia ngemi+ yo yoka kio vana Ndimb’a Kiderone.+
14 Kansi, mabata ke makatulwa ko.+ Kana una vo i wau, o ntim’a Asa wasikila emvimba muna Yave muna lumbu yawonso ya zingu kiandi.
15 Otwese muna nzo a Yave e lekwa ina se diandi kavaula ye ina yandi kibeni kavaula, palata, wolo ye salanganu ya mpila mu mpila.+
16 Vakala e vita vana vena Asa yo Basa+ wa ntinu a Isaele ntangwa zawonso.
17 Ozevo, Basa wa ntinu a Isaele otombokele kanuanisa e Yuda, oyantikidi tunga* Rama+ kimana mwalembi vaika ngatu kota muntu muna zunga kia Asa wa ntinu a Yuda.+
18 Muna kuma kiaki, Asa obongele palata ye wolo wawonso wasala muna lusalu lwa nzo a Yave ye lusalu lwa nzo a ntinu, ovene wo kwa ntaudi zandi. Asa wa ntinu ubatumini kwa Benadadi wa mwan’a Taberimone wa mwan’a Kezeyone wa ntinu a Suria,+ ona wakala muna Damaseke, oku vo:
19 “Kangu* tuna diau ngeye yo mono, o se diame yo se diaku. Itwikidi lukau lwalu lwa palata ye wolo. Kulula e kangu* una diau yo Basa wa ntinu a Isaele, kimana kakatuka mu zunga kiame.”
20 Benadadi owididi Asa wa Ntinu, otumini mfumu za makesa mandi banuanisa e mbanza za Isaele, bafwasidi Iyone,+ Dani,+ Abele-bete-maka ye Kinerete yawonso ye nsi yawonso ya Nafetali.
21 Basa vava kawidi wo, vana vau oyambwidi tunga* Rama, wele zingila muna Tiresa.+
22 Asa wa Ntinu obokelese Yuda yawonso—kasisidi muntu ko—banete matadi ye mabaya ma Rama mana Basa katungilanga, o Asa wa Ntinu otungidi* mo Ngeba+ muna Benyamini ye Misepa.+
23 Vo i mambu mawonso mankaka ma lusansu lwa Asa, mavangu mandi ma nkuma, mawonso kavanga ye mbanza zina katunga,* nga ke masonama ko muna nkand’a lusansu lwa ntinu mia Yuda? Kansi, muna kinunu, Asa oyelele kimbevo kia malu.+
24 I bosi, Asa olele yo mase mandi, ozikilu yo mase mandi muna Mbanz’a Davidi wa nkulu andi; Yosafate+ wa mwan’andi oyantikidi yala vana fulu kiandi.
25 Nadabi+ wa mwan’a Yerobame oyantikidi yala muna Isaele muna mvu una wazole wa luyalu lwa Asa wa ntinu a Yuda, mvu miole kayala muna Isaele.
26 Wavanga mambu mambi vana meso ma Yave, wakangalela muna nzil’a se diandi+ yo sumukisa Isaele muna sumu diandi.+
27 Basa wa mwan’a Akiya muna nzo a Yisakare, umvuandidi e mfulu, o Basa umvondele muna Ngibetone+ ya Afelesetia, ekolo Nadabi ye Isaele yawonso bazungidi Ngibetone.
28 O mvu una watatu wa Asa wa Ntinu a Yuda, Basa ovondele Nadabi yo kituka se ntinu vana fulu kiandi.
29 Vava kayantik’o yala, ovondele awonso muna nzo a Yerobame. Kavukisi kana mosi ko* muna nzo a Yerobame; ovondele awonso mun’owu wa diambu dia Yave dina kavova muna selo kiandi Akiya wa musi Silo.+
30 Ediadi diavangama mu kuma kia masumu Yerobame kavola yo sumukisa Isaele, kadi wakendeleka kikilu Yave wa Nzambi a Isaele.
31 Vo i mambu mankaka ma lusansu lwa Nadabi ye mawonso kavanga, nga ke masonama ko muna nkand’a lusansu lwa ntinu mia Isaele?
32 Vakala vita vana vena Asa yo Basa wa ntinu a Isaele+ ntangwa zawonso.
33 Muna mvu watatu wa luyalu lwa Asa wa Ntinu a Yuda, Basa wa mwan’a Akiya okitukidi se ntinu muna Tiresa, muna Isaele yawonso, mvu 24 kayala.+
34 Wavanga mambu mambi vana meso ma Yave,+ wadiatila muna nzil’a Yerobame yo sumukisa Isaele muna masumu mandi.+
Mvovo vana yand'a lukaya
^ O mvovo wau muna Kiyibere nanga wau umosi kwandi ye “doti,” usadilwanga se mvovo wa luvezo.
^ Yovo “ndon’ankento.”
^ Tala Nsas’a Mvovo.
^ Yovo “tungulula; kumika.”
^ Yovo “Ngwizani.”
^ Yovo “ngwizani.”
^ Yovo “tungulula; kumika.”
^ Yovo “otungulwidi; okumikini.”
^ Yovo “tungulula.”
^ Mvovo wa sina: “Kasisidi kana mosi ko ofulumunanga.”
