Wantete wa Ntinu 17:1-24
17 Eliya*+ wa Ntesebe wa musi Ngiladi+ ovovese Akabi vo: “Ndidi e ndofi muna Yave wa Nzambi amoyo, wa Nzambi a Isaele ona isadilanga,* mu mvu miami ke kunoka lowa ko ngatu mvula, avo ke mu nkanikinu ame ko.”+
2 E diambu dia Yave dizidi kwa yandi, oku vo:
3 “Katuka va fulu kiaki, nda swekama kuna Ndimb’a Kerite, kuna este a Yodani.
4 Onua maza ma nkoko, ikanikina ngono zadikila ekolo okala kûna.”+
5 Vana vau wele, ovangidi mun’owu wa diambu dia Yave; okedi vana Ndimb’a Kerite kuna este a Yodani.
6 E ngono zantwasilanga mbolo ye mbizi muna mene ye muna nkokela. Wanuanga maza ma nkoko.+
7 Kansi, vava vavioka yaka lumbu, o nkoko wayuma,+ kadi e mvula ke yanokanga ko muna nsi.
8 E diambu dia Yave dizidi kwa Eliya:
9 “Telama, wenda kuna Sarefate, kuna zunga kia Sidone, wakala kûna. Ikanikina nkento mosi wafwilwa yakala kadikila.”+
10 Otelamene, wele kuna Sarefate. Vava kalweke vana fula dia mbanza, owanane yo nkento mosi wafwilwa yakala otiamanga e nkuni. Ozevo, umbokele yo kumvovesa vo: “Do, untwasila fimaza muna mbungwa yanua.”+
11 Vava kayenda bonga maza, umbokele vo: “Dodokolo, untwasila mpe fimbolo.”
12 O nkento umvovese vo: “I nkal’a Yave wa Nzambi aku kaka, kina kwame ye mbolo ko, fimfumfu kaka ngina fiau muna mbangu anene ye fimazi muna nkalu akete.+ Owau nkuni nzolele tiama kimana ngienda yo lamba mu kuma kiame ye mwan’ame. Vava tumana dia, tufwa kweto.”
13 Eliya umvovese vo: “Kumoni wonga ko. Wenda vanga una ovovele. Kansi, umpangila ntete fimbolo muna eki una kiau, untwasila yo. I bosi, lamba mu kuma kiaku yo mwan’aku.
14 Kadi i wau wuwu kavovele o Yave wa Nzambi a Isaele: ‘E mfumfu muna mbangu anene ke imana ko, yo mazi muna finkalu ke memana ko yamuna lumbu kina Yave kenokesa e mvula ova ntoto.’”+
15 Wele, ovangidi una Eliya kamvovese, oyandi y’esi nzo andi ye ngunza badidi mu lumbu yayingi.+
16 E mfumfu muna mbangu anene ke yamana ko, yo mazi muna finkalu ke mamana ko mun’owu wa diambu dia Yave dina kavova muna Eliya.
17 Kuna kwalanda, mwan’a nkento wa mfumu a nzo oyelele, e kimbevo kiandi kisakidi yavana kafwidi.+
18 Ovovese Eliya vo: “Nkia diambu umbakidi ongeye muntu a Nzambi aludi? Nga sumu diame wizidi kunsungamesa, wavonda mwan’ame?”+
19 Kansi, Eliya umvovese vo: “Umpana mwan’aku.” Umbongele vana moko mandi, otombokele yandi kuna suku diantandu kuna kakalanga, unlekese vana mfulu andi.+
20 Ododokele Yave, oku vo: “E Yave wa Nzambi ame,+ nga otwese mpe mpasi kwa nkento ndioyu wafwilwa yakala ona untambwidi omu nzo andi mu vonda mwan’andi?”
21 Olambalele nkumbu tatu vana ntandu a mwana, ododokele Yave, oku vo: “E Yave wa Nzambi ame, dodokolo yambula moyo a mwana wavutuka muna yandi.”
22 Yave owidi ndomb’a Eliya,+ o moyo a mwana umvutukidi, ofutumukini.*+
23 Eliya obongele mwana, ovaikidi muna suku diantandu, okulumukini yandi muna nzo, umvene kwa ngudi andi; Eliya ovovele vo: “Tala, mwan’aku una o moyo.”+
24 Muna diadi, nkento ovovese Eliya vo: “Kieleka, owau nzeye wo vo u muntu a Nzambi,+ e diambu dia Yave dina muna nu’aku, dialudi.”
Mvovo vana yand'a lukaya
^ Ina ye nsasa vo: “Yave i Nzambi Ame.”
^ Mvovo wa sina: “ntelamene vana kena.”
^ Yovo “ovutukidi zinga.”
