Wantete wa Ntinu 18:1-46
18 Vioka kolo, o mvu una watatu,+ diambu dia Yave dizidi kwa Eliya, oku vo: “Wenda kuyisonga kwa Akabi, nokesa inokesa e mvula va ntoto.”+
2 Eliya wele kuyisonga kwa Akabi, vava mvengele wasaka+ muna Samaria.
3 Muna ntangwa yayina, Akabi obokele Obadiya ona wakala selo kia nzo andi. (Obadiya Yave kikilu kavuminanga,
4 vava Izebele+ kavonda* ngunza za Yave, Obadiya obongele 100 ngunza ubaswekele makumatanu-makumatanu muna nduka, wabadikilanga mbolo ye maza.)
5 Akabi ovovese Obadiya vo: “Wenda zieta nsi yawonso, nto zawonso za maza ye ndimba miawonso. Nanga tulenda solola madilu mafwana muna dikila mvalu ye mula, kimana bulu yeto yawonso yalembi fwa.”
6 Bakayanene e nsi ina bezieta. Akabi wele muna nzila imosi, Obadiya wele yandi mosi muna nzila yankaka.
7 Obadiya vava kakala muna nzila, Eliya wele wanana yandi. Vana vau, Obadiya unzayididi, umvumbamene, ovovele vo: “Ngeye i mfumu ame Eliya?”+
8 Umvutwidi vo: “I mon’oyu. Nda vovesa mfumu aku vo: ‘Eliya una vava.’”
9 Obadiya ovovele vo: “Nkia sumu mpangidi dina ozolele yekolwela ntaudi aku kwa Akabi, kamponda?
10 Kieleka, wau vo Yave wa Nzambi aku, Nzambi amoyo, kavena zula ko yovo kintinu kina mfumu ame kalembi tuma wantu benda kuvava. Vava bavovanga vo, ‘Kena vo ko,’ o ntinu wavovesanga konso kintinu ye zula badia ndofi vo, ke basolwele ko.+
11 Owau ovovele vo, ‘Nda vovesa mfumu aku vo: “Eliya una vava.’”
12 Avo ngiele kwame, o mwand’a Yave ukunata+ ku fulu kina kizeye ko. Vava izayisa wo kwa Akabi yo lembi kusolola, okumponda. Kansi mono ntaudi aku, Yave ivuminanga tuka muna kileke kiame.
13 Nga ke diazayiswa ko kwa mfumu ame dina yavanga vava Izebele kavonda ngunza za Yave? Yasweka 100 ngunza za Yave, makumatanu-makumatanu muna nduka yo kubadikila mbolo ye maza.+
14 Owau ovovele vo, ‘Nda vovesa mfumu aku vo: “Eliya una vava.”’ Vonda kekumponda.”
15 Eliya ovovele vo: “Ndidi e ndofi kwa Yave a vu, wa Nzambi amoyo ona isadilanga* vo, o unu sunzula ikuyisunzula kwa Akabi.”
16 Obadiya wele wanana yo Akabi, unzayisi wo, Akabi wele wanana yo Eliya.
17 Akabi vava kamwene Eliya, umvovese vo: “Nga ngeye otwese mpasi* zazi zawonso mu Isaele?”
18 Eliya ovutwidi vo: “Ke mono kwame ko ntwese mpasi mu Isaele, kansi ngeye kibeni ye nzo a se diaku, kadi nubembwele nkanikinu mia Yave yo landa teke ya Bale.+
19 Owau, bokelesa Isaele yawonso kuna Mongo a Kamele+ ye 450 ma ngunza za Bale ye 400 za ngunza za vindi diavauka,*+ ana bedilanga vana meza ma Izebele.”
20 Akabi otumini nsangu kwa nkangu awonso a Isaele, okutakese angunza kuna Mongo a Kamele.
21 Eliya ofinamene nkangu wawonso, ovovele vo: “Yamu nkia kolo nukatikisa muna mambu mole?+ Avo Yave i Nzambi aludi, nunlanda;+ avo Bale, nunlanda!” Kansi, nkangu ke bamvutwidi diambu ko.
22 I bosi, Eliya ovovese nkangu vo: “Mono kaka i ngunz’a Yave nsidi,+ kansi e ngunza za Bale, 450.
23 Yambula batuvana wan’a ngombe wole, basola mwan’a ngombe mosi, basasa yo kunsia vana ntandu a nkuni. Kansi ke bankwiki tiya ko. Omono mpe ikubika mwan’a ngombe wankaka, ikunsia vana nkuni, kansi kikunkwika tiya ko.
24 Nubokela muna nkumbu a nzambi eno,+ omono mpe ibokela nkumbu a Yave. O Nzambi ona otwika e tiya, i Nzambi aludi.”+ O nkangu awonso uvutwidi vo: “Diambote ovovele.”
25 Eliya ovovese ngunza za Bale vo: “Nusola mwan’a ngombe, nuteka kunkubika, kadi ndonga nuina. I bosi nubokela muna nkumbu a nzambi eno, kansi ke nunkwiki tiya ko.”
26 I bosi, babongele mwan’a ngombe ona babatwasidi, bakubikidi yo, bayantikidi bokela nkumbu a Bale tuka mene-mene yamuna midi, oku vo: “E Bale utuvana e mvutu!” Kansi, ke vawakana ndinga ko ngatu ona ovutula.+ Bakwamanene kina yo zieta e ziku dina bavanga.
27 Muna tezo kia midi, Eliya oyantikidi kubasiesiekela, oku vo: “Nukaza kweno! Mbe oyandi nzambi!+ Nanga mu yindula kena yovo wele ku nzo akete.* Dilenda kala vo waleka kena, muntu kevava kansikamesa!”
28 Basakisi okaza, bayilwekele muna nsosolo ye maswanga mun’owu wa fu kiau yavana babuka menga.
29 Vava midi miavioka, bavanganga kaka mambu nze lau* yakuna masika muna ntangw’a tambika lukau lwa mbwaza, kansi ke vawakana ndinga ko ngatu ona ovutula; ke muntu ko wasianga sungididi.+
30 I bosi, Eliya ovovese nkangu wawonso vo: “Numfinama.” Nkangu wawonso umfinamene. Otungulwidi e ziku dia Yave dina diabangulwa.+
31 Eliya obongele matadi 12, landila lutangu lwa makanda ma wan’a Yakobo, ona walwakilwa diambu dia Yave, oku vo: “Isaele i nkumbu oyikilwa.”+
32 Muna matadi momo otungidi e ziku+ muna nkumbu a Yave. I bosi, otimini e wulu muna nzinguluka yawonso ya ziku, o nene wandi wafwana mu kuna sea zole* za mbongo.
33 Otomene singika e nkuni, osasidi mwan’a ngombe yo kuntenseka vana ziku.+ Ovovele vo: “Nuzadisa mvungu nyá mia maza, nuyitila mo muna lukau lwa ngioka ye muna nkuni.”
34 Ovovele vo: “Nuyitila mo mu nkumbu wanzole.” Bayitidi mo mu nkumbu wanzole. I bosi, ovovele vo: “Nuyitila mo mu nkumbu wantatu.” Bayitidi mo mu nkumbu wantatu.
35 O maza makukwidi e kinzieta kia ziku diawonso, ozadisi mpe wulu yo maza.
36 Vava kiafwana e ntangwa ya tambika lukau lwa mbwaza muna masika,+ Eliya wa ngunza ofinamene vana ziku, ovovele vo: “E Yave wa Nzambi a Abarayama,+ a Isaki+ ye Isaele, yambula diazayakana o unu vo u Nzambi mu Isaele, mono i ntaudi aku, muna lutumu lwaku i mpangidi mawonso mama.+
37 E Yave, ungwila! Ungwila kimana nkangu wau wazaya vo ngeye Yave u Nzambi aludi, ozolele vilula ntima miau oku wina.”+
38 O tiya twa Yave tutukidi kuna zulu tubomwene lukau lwa ngioka+ ye nkuni ye matadi ye mbundukutu yo yumisa maza makala muna wulu.+
39 Nkangu wawonso vava bamwene wo, vana vau bafukamene yo vova vo: “O Yave i Nzambi aludi! O Yave i Nzambi aludi!”
40 Eliya ubavovese vo: “Nubaka e ngunza za Bale! Ke nutinisi kana mosi ko.” Vana vau bababakidi, o Eliya ubanete kuna nkoko a Kisone,+ ubavondele kûna.+
41 Eliya ovovese Akabi vo: “Tomboka, wadia yo nua, kadi e zú dia mvula angolo diwakane.”+
42 Akabi otombokele kadia yo nua, vo i Eliya otombokele kuna ntandu a mongo a Kamele, ofukamene yo sia lose vana kati kwa makungunu mandi.+
43 I bosi, ovovese selo kiandi vo: “Dodokolo, wenda tala kuna kalunga.” Wele otadidi, ovovele vo: “Ke kuna lekwa ko.” Eliya nkumbu nsambwadi kantuma, oku vo, “Vutuka diaka.”
44 Muna nkumbu ina ya nsambwadi, selo ovovele vo: “Tala, mumonekene tuti diakete dina ovonga nze koko kwa muntu, ditombokanga muna kalunga.” Eliya umvovese vo: “Wenda samunuina Akabi vo, ‘Kubika kalu diaku dia vita! Kulumuka, mvula zalembi kukakidila!’”
45 Muna ntangwa yayina, e zulu dilombokele yo matuti, vakedi tembwa, e mvula yangolo inokene;+ Akabi wele kuna Yizerele+ muna kalu diandi.
46 O koko kwa Yave kwakala yo Eliya, okangidi mvuatu andi muna luketo, otikwini kuna ntwal’a Akabi yakuna fula dia Yizerele.
Mvovo vana yand'a lukaya
^ Mvovo wa sina: “kakendona.”
^ Mvovo wa sina: “ntelamene vana kena.”
^ Yovo “mpambani.”
^ Tala Nsas’a Mvovo.
^ Nanga, “mu nkangalu kena.”
^ yovo “angunza.”
