Wantete wa Ntinu 19:1-21
19 Akabi+ ozayisi Izebele+ mawonso kavanga Eliya ye mpila kavondela ngunza zawonso muna nsosolo.+
2 Muna kuma kiaki, Izebele otumini nati a nsangu kuna kwa Eliya, oku vo: “Yambula nzambi zampanga wo yo sakisa wo vanga, avo mbazi e ntangwa yayi kikukitula ko nze mosi* muna ngunza zazi!”
3 Dianu vo, Eliya omwene wonga, otelamene, otinini muna vukisa moyo andi.+ Olweke kuna Bere-seba+ ya Yuda,+ osisidi ntaudi andi kûna.
4 Wele muna makanga, odiete lumbu kimosi, wele fonga kuna nsi a mvanga, osambidi vo kafwa kwandi. Ovovele vo: “Difwene, e Yave, katula moyo ame,+ kadi kisundidi mase mame ko.”
5 Olavalele yo leka kuna nsi a mvanga. Kansi, o mbasi wizidi kumviakana,+ umvovese vo: “Sikama wadia.”+
6 Vava katadidi, omwene mbolo vana matadi ma tiya, ye nkalu a maza kuna kasidi o ntu. Odidi, onuini, olambalele diaka.
7 I bosi, mbasi a Yave wizidi mu nkumbu wanzole, umviakane yo vova vo: “Sikama wadia, kadi nkangalu wandá kikilu.”
8 Osikamene, odidi, onuini, wele kuna Korebe muna ngolo za madia mama mu lumbu 40, fuku yo mwini, kuna mongo a Nzambi aludi.+
9 Okotele muna nduka,+ olele mûna; e diambu dia Yave dizidi kwa yandi, oku vo: “Eliya, adieyi ovanganga vava?”
10 Ovovele vo: “Nsongo kikilu mbwene muna Yave wa Nzambi a vu;+ kadi nkangu a Isaele bayambwidi e kangu diaku,+ babangwidi maziku maku, bavondele ngunza zaku muna nsosolo,+ mono mosi kaka nsidi. Owau moyo ame bevavanga.”+
11 Oyandi ovovele vo: “Vaika, telama vana mongo, vana ndose a Yave.” O Yave mu vioka kena,+ e tembwa kiangolo kibudidi miongo yo wula matadi vana vena Yave,+ kansi Yave kakala muna tembwa ko. Vava tembwa kiavioka, vakedi nzakam’a ntoto,+ kansi Yave kakala muna nzakam’a ntoto ko.
12 Vava nzakam’a ntoto yavioka, vavaikidi tiya,+ kansi Yave kakala muna tiya ko. Eki kialandila tiya, i ndinga yalembama, yakuluka.+
13 Eliya vava kawa e ndinga, ofukidi ndose andi muna mvuel’andi,+ ovaikidi, otelamene muna nu’a nduka. E ndinga inyuvuidi vo: “Eliya, adieyi ovanganga vava?”
14 Ovovele vo: “Nsongo kikilu mbwene muna Yave wa Nzambi a vu; kadi nkangu a Isaele bayambwidi e kangu diaku,+ babangwidi maziku maku, bavondele ngunza zaku muna nsosolo, mono mosi kaka nsidi. Owau moyo ame bevavanga.”+
15 Yave umvovese vo: “Vutuka, wenda kuna makanga ma Damaseke. Vava olwaka, kusa Kazaele+ mazi kimana kakala se ntinu a Suria.
16 Kusa mpe Yeu+ wa ntekelo a Nimesi e mazi kakala se ntinu a Isaele, kusa mazi kwa Elesa* wa mwan’a Safati wa musi Abele-mekola kakala ngunza vana fulu kiaku.+
17 Ndiona ovuka muna nsosolo a Kazaele,+ Yeu okumvonda;+ ndiona otaya muna nsosolo a Yeu, Elesa okumvonda.+
18 Yakinu ye wantu 7.000 muna Isaele,+ awonso bena vo makungunu mau ke mafukamene Bale ko,+ e nua miau ke miamfiba ko.”+
19 Ozevo, Eliya okatukidi ko, wele, owanane ye Elesa wa mwan’a Safati ekolo kevatanga ntoto ye ngombe 24 kuna ntwal’andi, zakangama zole-zole. Elesa wavatanga ye ngombe zole zansuka. Eliya umfinamene, untubidi mvuel’andi.+
20 Elesa osisidi ngombe, wele ntinu kwa Eliya, ovovele vo: “Dodokolo, ungiambula ngienda fiba se diame ye ngudi ame, i bosi ikulanda.” Umvutwidi vo: “Wenda kwaku, kadi kisimini ko.”
21 Ovutukidi, obongele ngombe zole, otambikidi zo se kimenga. Osadidi vangu kia mabaya se nkuni, olambidi mbizi, ovene yo kwa nkangu, badidi yo. I bosi, otelamene, olende Eliya yo yantika kunsadila.+
Mvovo vana yand'a lukaya
^ Yovo “kikitula moyo aku ko nze moyo a mosi.”
^ Ina ye nsasa vo: “Nzambi i Mvuluzi.”
