Wantete wa Ntinu 6:1-38
6 Muna mvu una wa 480 kuna nim’a mpaik’a Aneyisaele* muna Engipito,+ muna mvu wa nyá wa luyalu lwa Solomo muna Isaele, muna ngonde a Ziu*+ (i sia vo, ngonde yazole) o Solomo wayantika tunga nzo a Yave.*+
2 E nzo ina Solomo wa Ntinu katungila Yave, o lambuka kwandi yinkoso* 60, o sanzuka yinkoso 20, o lá yinkoso 30.+
3 E veta+ kiakala kuna ntwal’a tempelo,* kiakala ye yinkoso 20 muna lambuka, mun’owu wa sanzuka kwa nzo. O sanzuka kwandi kuna ntwal’a nzo, yinkonso 10.
4 Ovangidi zianela zabatakana+ muna nzo.
5 Otungidi nzo yankaka muna yaka kia nzo, yayikakiana ye yaka ya nzo—i sia vo, yaka ya tempelo* ye muna suku dia kati,+ otungidi mpe masuku muna mpati, ndambu eyi ye ndambu ina.+
6 E banga kiantete kia masuku ma mpati yinkoso tanu kiakala muna sanzuka, e banga kiakati yinkonso sambanu kiakala muna sanzuka, e banga kiatatu yinkonso nsambwadi kiakala muna sanzuka, osisidi mawulu muna yaka ya nzo kimana mabaya malembi lwaka muna yaka ya nzo.+
7 E nzo mu matadi mavalwa yatungilwa,+ dianu vo ke mwawakananga mazu ma malutelo ko yovo soka* ngatu sadilwa kia sengwa ekolo yatungwanga.
8 O mwelo a masuku ma mpati kuna ndambu a sude a nzo wakala,+ ye sikada yazunguluka batombokelanga muna banga kiakati yo lwaka yakuna banga kiatatu.
9 Wakwamanana tunga e nzo yo manisa yo;+ ofukidi e nzo ye mvuambu ye mabaya ma nsedele.+
10 Otungidi masuku muna ndambu zawonso za nzo,+ konso suku diakala ye yinkoso tanu muna lá, mayikama nzo muna mabaya ma nsedele.
11 Muna ntangwa yayina, diambu dia Yave diayiza kwa Solomo, oku vo:
12 “Mu kuma kia nzo yayi otunganga, avo odiatidi muna nkanikinu miame ye nzengo zame yo lemvokela nsiku miame miawonso yo diatila mo,+ ilungisa e nsilu yasila kwa Davidi wa se diaku,+
13 Kala ikala vana vena Aneyisaele,+ kibembola nkangu ame Isaele ko.”+
14 Solomo wakwamanana tunga e nzo kimana kamanisa yo.
15 Otungidi yaka ya nzo muna kati ye mabaya ma nsedele. Ofukidi yaka ya kati ye mabaya tuka vana yanda yakuna nludi, oyadidi mabaya ma sipelese vana nsi.+
16 Otungidi ndambu ya yinkoso 20 kuna nim’a nzo muna mabaya ma nsedele tuka vana nsi yakuna nludi, otungidi mo* suku,+ Fulu Kisundidi o Vauka.+
17 E tempelo,*+ i sia vo, ndambu a nzo kuna ntwala, yinkoso 40 yakala.
18 Mabaya ma nsedele makala muna suku dia kati, mabandulwa fwaniswa+ ya nkalu ye mvuma za yalumuka.+ Yawonso ya nsedele; o matadi ke mamonekanga ko.
19 Okubikidi suku+ muna kati kwa nzo kimana kasia mo e nkel’a kangu dia Yave.+
20 E suku diadi yinkoso 20 diakala muna lambuka, yinkoso 20 muna sanzuka, yinkoso 20 muna lá;+ olengele dio wolo walembi sangwa lekwa; ofukidi e ziku+ ye mabaya ma nsedele.
21 Solomo olengele wolo walembi sangwa lekwa+ muna kati kwa nzo, osidi tuvambu twa wolo vana ntwal’a suku dia kati+ edi diakuswa wolo.
22 Olengele wolo muna nzo yawonso yavana yafokoka; e ziku+ diakala vana ndambu a suku dia kati, olengele dio mpe wolo.
23 Ovangidi akelubi wole+ a mabaya ma pino* muna suku dia kati, o lá kwa konso nkelubi, yinkoso kumi.+
24 E ve dimosi dia nkelubi yinkoso tanu, e ve diankaka yinkoso tanu. Tuka kuna nsuk’a ve dimosi yakuna nsuk’a ve diankaka yinkoso kumi.
25 O nkelubi wanzole mpe yinkoso kumi kakala. Akelubi yau awole tezo kimosi ye mpwa mosi bakala.
26 O lá kwa nkelubi mosi yinkoso kumi, diau dimosi mpe yo nkelubi wankaka.
27 Osidi akelubi+ muna suku.* O mave m’akelubi mayalumuka, e ve dia nkelubi mosi diaviakana e yaka kimosi, e ve dia nkelubi wankaka diaviakana e yaka kiankaka, o mave mau mayalumuka vana kati kwa nzo, dianu vo mave mau matotakana.
28 Olengele akelubi e wolo.
29 Obandwidi fwaniswa y’akelubi,+ maba+ ye mvuma za yalumuka+ muna yaka yawonso ya nzo, tuka muna suku* dia kati ye dia kumbazi.
30 Olengele wolo muna kati kwa nzo ye muna suku dia kati yamuna suku dia ku mbazi.
31 Muna mwelo a suku dia kati, ovangidi yelo ya mabaya ma pino, malunzi muna ndambu ye malunzi ma mwelo, se tini kia tanu.*
32 E yelo yau yole ya mabaya ma pino, obandwini yo akelubi, maba ye mvuma zayalumuka, olengele yo wolo; olengele akelubi ye maba e wolo watutwa muna malutelo.
33 Muna mwelo a tempelo,* ovangidi nkambikwa za mabaya ma pino, ma tini kia yá.*
34 Ovangidi yelo yole ya mabaya ma sipelese. E kielo kimosi kiakala ye ndambu zole zabundakananga vana kati, e kielo kiankaka mpe kiakala ye ndambu zole zabundakananga.+
35 Obandwini yo fwaniswa y’akelubi, maba ye mvuma za yalumuka, olengele wolo muna fwaniswa.
36 Otungidi yaka kia yanzala kia kati+ kia nlonga tatu mia matadi mavalwa ye nlonga umosi wa mabaya ma nsedele.+
37 Muna mvu una wa yá, muna ngonde a Ziu,* bakuba e nkubilw’a nzo a Yave;+
38 muna mvu una wa 11, muna ngonde a Bule* (i sia vo, muna ngonde ya nana), e nzo yamana tungwa, mun’owu wa mpw’andi.+ Mvu nsambwadi katunga yo.
Mvovo vana yand'a lukaya
^ Mvovo wa sina: “wan’a Isaele.”
^ Mvovo wa sina: “tempelo a nzo.”
^ Fulu Kiavauka kiyikwanga ovava.
^ Yovo “sengele.”
^ I sia vo, muna kati kwa nzo.
^ I sia vo, Fulu Kiavauka, kuna ntwal’a Fulu Kisundidi o Vauka.
^ Mvovo wa sina: “mabaya ma nti a mazi,” nanga nti a pino ya alepo.
^ I sia vo, Fulu Kisundidi o Vauka.
^ Mvovo wa sina: “tuka muna kati yakuna mbazi.”
^ Nanga tungwa yasimbanga yelo yovo tezo ya yelo iyikwanga.
^ I sia vo, Fulu Kiavauka.
^ Nanga tungwa yasimbanga yelo yovo tezo ya yelo iyikwanga.
